MITROVICA E NDARË PASQYRË E VËRTETË E UNMIK-ut DHE EULEXIT NË KOSOVË

Alarmit të arsyeshëm nga shumë analistë përparimtarë, brenda dhe jashtë atdheut, duke filluar pas përfundimit të luftës çlirimtare e deri sot, se: UNMIK-u, është organizatë e dështuar në Kosovë, për faktin se kjo organizatë është instaluar në Kosovë, ad –hoc, nga OKB-ja, pa e pyetur askush popullin e Kosovës; pastaj kjo organizatë e kamufluar si legjitime: me të drejtë u kritikua ashpër nga Lëvizja Vetëvendosje - kjo u dëshmua dhe me aksionet e saj, kundër UNMIK-ut.

Shkruan: Fadil SHYTI

Prej kohësh, kjo organizatë e korruptuar dhe pa strategji afatgjate për ndihmë Kosovës, por kishte dhe ka  një strategji dinake për ta penguar procesin e bërjes shtet të Kosovës; ishte futur në rrugë pakrye, duke lejuar me të madhe burokracisë e vendit të zhytet në korrupsion deri mbi gju, pastaj, duke e ndarë “prenë” me pushtetarët pa shtet të Kosovës, dhe mbi të gjitha për faktin e hidhur se UNMIK-u pa rezerva e ka lejuar minoritetin serb në Kosovë të bëhet i zoti i shtëpisë në shtëpinë e huaj!!!

UNMIK-u, duke i pasur duart e lira sipas Rezolutës famëkeqe 1244, i dërgonte “princat” e vet, (kryeadministratorët) që herë me dinakëri e herë me një të rënë lapsi - t´i anulonte madje dhe vendimet e Parlamentit të Kosovës, kur rrallë herë ky Parlament sillte ndonjë ligj të favorshëm për shqiptarët dhe Kosovën. Parlamentarët e Kosovës ishin dhe janë të përkrahur vetëm kur i pranonin dhe i pranojnë vendimet e UNMIK-ut. Për të sjellë në fuqi “spica të reja” si Korniza Kushtetuese dhe ato tetë standardet e “famshme”, të cilat e paqësonin dhe e shkretonin Kosovën.

Parlamentarët e Kosovës, përkraheshin dhe përkrahen  nga UNMIK-u, vetëm kur e stabilizonin dhe e stabilizojnë  situatën, kur populli i shumëvuajtur shqiptar në Kosovë rebelohej dhe kërkonte zgjidhje më të shpejtë dhe më të drejtë për Kosovën, kujtoj këtu ngjarjet e marsit të vitit 2004.

...Dhe, i bazuar në rrethanat e krijuara tani;  jam i bindur, kështu ka për të ngjarë më tej!...

Pastaj, UNMIK-u, i përkrahte parlamentarët e Kosovës, kur këta lejonin që para syve të tyre të rrihej, të burgosej dhe të vritej rinia heroike e Kosovës, kur ShPK-ja, tregohej tepër aktive në kapjen dhe torturimin e djemve dhe cucave të Lëvizjes Vetëvendosje. Kur kjo polici “demokratike” e nxitur dhe e paguar nga qarqe të huaja e burgosi herë pas herë, udhëheqësin sypatrembur - Albin Kurtin.

Atëbotë, për të gjitha këto padrejtësi kryesisht në aspektin politik, nuk reagohej me kohë nga pushtetarët pa shtet të pavarur dhe sovran!!! Por, kjo nuk ishte e tëra: pushtetarët e krekosur për pushtetin e tyre kukull, me kokën në Nju Jork, dhe bishtin në Bruksel, nuk brengosen as për faktin se shqiptari në Mitrovicën e ndarë po hiqte të zitë e ullirit duke jetuar nën strehë të huaja, për faktin se ishte ndjekur nga serbët e “Dollce Vita-s ”, nga vatrat e veta shekullore.

Dhe, kjo gjendje mjerisht ende po vazhdon!

Këta qeveritarë me politikën e mjerë, në qëndrime servile tek të huajt, nuk bënë për bashkëkombasit e tyre as më të voglën përpjekje që t´i ndihmonin për rikthimin e tyre në vatrat veta, t´i ndërtonin shtëpitë e tyre të djegura nga çetnikët serbë; por, për më keq: kinse për t´i zbatuar ato tetë standardet famëkeqe, të cilat ishin bërë pengesë për pavarësinë e Kosovës, këta “demokratë” evropianë, ndërtonin banesa për rikthimin e kolonëve serbë të ikur pas qerres së thyer e të përgjakur të S. Millosheviqit.

Pra, UNMIK-u, printe në vendime arbitrare kundërshqiptare, ndërsa qeveritarët shqiptarë vraponin në këtë rrugë pa krye! …Dhe, si përfundim, Kosova e futur “me hatër o me zor” në bisedime atje në Vjenën Hasburgëve, me çetnikët e Beogradit me GU në krye; pastaj shkëlqeu ajo fitorja e shumë pritur u arrit “pavarësia dhe sovraniteti i Kosovës”!!!

Tani, të shohim pas gjithë këtyre krajatave dhe gabimeve të pafalshme politike çfarë do të bëjë Qeveria e Kosovës së “pavarur” në krye me Hashim Thaçin, do të reagojë ashtu siç duhet apo do të bëjë sehire, si dikur kur ishte qeveri “në hije”?! Deri kur kjo qeveri, do të merr ajo përgjegjësitë për t´i mbrojtur kufijtë e Kosovës, për ta bashkuar qytetin e ndarë verior, Mitrovicën dhe rrethinën e saj, të pasur me xehe e pasuri të tjera tokësore e nëntokësore?!

Deri kur kjo qeveri do të merr përsipër mbrojtjen e sovranitetin e Kosovës, apo ky sovranitet do të lejohet të shkelet deri në ditën e amshimit, pra, siç thonë besimtarët; deri në ditën e “kiametit”! Ndërsa, kryeministri i Kosovës, së “pavarur” do të krekoset me kënaqësi se ja e fituam pavarësinë dhe sovranitetin e Kosovës, madje duke u çjerrë me sloganin e kullerëve: Bacë, u kry!!!

E shtroj pyetjen deri kur, sepse sipas deklaratave të politikës ndërkombëtare dhe asaj vendore, misioni i UNMIK-ut, nuk do të hiqet së shpejti nga Kosova, madje as sipas direktivave të Paketës së Ahtisarit!!!

Ndërsa, parlamentarët e Kosovës, po nguten si mos më keq, sikur i ka përfshirë breshëri i politikës evropiane, për t´i sanksionuar e zbatuar ligjet e kësaj Pakete “magjike”, e cila “e solli” lirinë e lëvizjes për qytetarët e Mitrovicës dhe "kthimin" në trojet e tyre etnike! Paketë, e cila “theu” bllokadën e Serbisë duke i zbatuar me përpikëri me dorën e zezë serbe aksionet e minoritetit serb mbi Kosovën: thyerja e kufijve, pushtimi i gjykatës komunale në Mitrovicë e të tjera...

Tani, shtrohet pyetja: përse UNMIK-u dhe Qeveria e Kosovës, tregoheshin aq të papërmbajtur ndaj shqiptarëve që kërkonin VETËVENDOSJE, duke i rrahur, burgosur plagosur e vrarë demonstruesit shqiptarë duarthatë;  Ndërsa, tani tregohen kaq të përmbajtur ndaj huliganëve, demonstrues serbë, të cilët nën urdhrat e Serbisë, e djegin flamurin e Evropës, e djegin flamurin shqiptar, i cili prej mbarimit të luftës e deri sot, nuk valon i lirë në Mitrovicën e andej Lumëbardhit?

Po, EULEX- i, ku gjendet vallë?!

Ku i ka ngritur çadrat “princi”i tyre i rrallë?!

Sot, i pari i tyre shëtitej në Pejë; sa bukur e pyetën gazetarët atdhetarë të Kosovës: “përse nuk shkove të shëtitësh në Mitrovicë?! Por, ai me dinakëri thinjake evropiane ua ktheu: “Mitrovica, nuk është përgjegjësi jona - atë, e kanë në përgjegjësi UNMIK-u dhe KFOR-i”!

Derisa, çdo ditë deklarojnë zëdhënësit e tyre: “përgjegjësitë tona do t´i shtrijmë në tërë Kosovën”!!! Sigurisht, ju besojmë se do t´ i shtrijnë lakmitë e tyre, por jo edhe përgjegjësitë, kur përballen me furtunat e sulmeve serbo-çetnike; ata si mjeshtër të tërheqjeve që janë “çadrat” e tyre i vendosin në lëndinat brigjeve të lumit, Bistrica ku i përhapë rrezet dielli, e jo ku fryjnë stuhi brigjeve të Lumëbardhit.

Serbët e dehur me kundërshqiptarizëm, po bëjnë goditje të pandërprera, goditje të brendshme, madje me aksione të dhunshme që po t´í bënin shqiptarët, pa mëdyshje do të quheshin terroriste?!

Kjo, përmbajtje tani nga disa politikanë servilë tek të huajt, po konsiderohet si diçka e moralshme, e mëshirshme, kësaj i thonë sikur të kesh moral tolerues ndaj atyre që ta shkelin moralin, si të kesh mëshirë ndaj atyre që të përdhunojnë e t´i përbuzin vlerat shtetërore dhe kombëtare.

Kjo, maksimë “paqësore” kapitulluese nuk shkon!

Fundi, këtu nuk ka asgjë të bëjë as me moralin as me kulturën e vlerave; sipas përkufizimit se dikush qenka tolerues, ose jo !...

Kjo, mbi të gjitha është detyrë!

Detyrë, për mbrojtjene atdhut, që duhet kryer, sepse kur politikanët ndërkombëtarë pretendojnë se "e kemi njohur shtetin me mbikëqyrje"; kurse vendorët shkojnë më tej, kur thonë: "e kemi shtetin e pavarur dhe sovran të Kosovës" , natyrisht, kjo kërkon përgjegjësi që: urgjentisht të aktivizohen mekanizmat e këtij shteti për mbrojtjen e vlerave të këtij shteti , të bëhet mbrojtja tij levave të tij siç janë gjykatat , dhe të ruhet përbërja e konstruktit të tij dhe identiteti i tij,  siç janë kufijtë etj... !

Ideja e mjeranëve pacifistë, të shtyrë sipas motos: "ja të presim, sa të ulen gjakrat, të mos e provokojmë situatën" etj, etj; duhet të vdes njëherë e përgjithmonë, së bashku me themeluesit e kësaj teorie famëkeqe disfatiste! Përndryshe, popullit tonë do t´i përsëritet historia e hidhur e projektuar dhe e zbatuar nga  klika disfatiste, që në analet e historisë së vërtetë përparimtare shqiptare, do të shkruhet me shkronja të zeza turpi, pavarësisht që sot ajo “politikë e hollë”, ldk-iste, po vlerësohet lart, pikërisht nga ithtarët e saj dhe sivëllezërit e tyre aleancistë..

Pra, të luftohet me kohë e keqja e vogël, përderisa dobiçi unmikas Enklavisti serb ende nuk ka marrë fuqi!

Kërkohet urgjentisht të ndërmerren hapa konkret për ta marrë margaritarin autokton, gjysmën e qytetit të bukur shqiptar, të quajtur Mitrovicë.

Suedi, më 15 Mars,  2008