Budallallëku i Fatmir Sejdiut dëmton Kosovën

Shkruan : Xhevat Bislimi

Njëvjetori i vdekjes së Ibrahim Rugovës rinxori në skenë tërë budallallëkun, naivitetin, hipokrizinë dhe shpirtin e robit të një pjese të politikës, medias dhe inteligjencies së krahinës shqiptare, që quhet Kosovë. Budallallëku më i madh, meqë ky është edhe “maja” e politikës në Kosovë, erdhi nga njeriu që quhet Kryetar i Kosovës, Fatmir Sejdiu. Ky njeri-kryetar deklaroi se “Rugova ishte themelues i shtetit të Kosovës, ndërsa idetë e tij busullë orientimi për ata që ka lënë pas”!!! Të njëjtën ditë, kundërshtari kryesor i Fatmirit, Nexhat Daci, deklaron se “pavarësia e Kosovës është e shkruar me emrin e Ibrahim Rugovës”!!! Marrëzia dhe poshtërsia nuk përfundojnë me kaq. Fatmir Sejdiu, me një “urdhër” të posacëm shpalli Ibrahim Rugovën “Hero i Kosovës”!!! Hipokrit dhe mashtrues të tjerë vrapuan të ndezin qirinj në Prishtinë, e marrëzira të tjera të kësaj natyre.

Po të pranonim konstatimin e Fatmir Sejdiut se “Rugova ishte themelues i shtetit të Kosovës”, atëherë natyrshëm shtrohen dy pyetje. E para: Kundër kujt luftoi Ushtria Clirimtare e Kosovës dhe populli shqiptar? Dhe e dyta: Kundër kujt u angazhua SHBA-ja dhe NATO-ja? Sipas Fatmir Sejdiut dhe bashkëmendimtarëve të tij UCK-ja, populli shqiptar dhe NATO-ja paskan luftuar kundër shtetit të Ibrahim Rugovës!! Sepse, sipas tij, Kosova paska qenë shtet, por e paskan shkatërruar UCK-ja me NATO-n!! Prandaj, gjithmonë sipas logjikës së Fatmirit dhe “partizanëve të tij”, Ibrahim rugova është i vetmi “hero” i Kosovës!! Të tjerët, ata që luftuan dhe e shkatërruan “shtetin” e Ibrahim Rugovës, janë tradhtarë… Cfarë strategjie manipulative? Cfarë strategjie e rrezikshme për kombin shqiptar dhe të ardhmen e tij? Këtë budallallëk dhe marrëzi po përpiqen ta “hijeshojnë” (me pjesëmarrjenë e tyre) disa drejtues të UCK-së dhe drejtues të PDK-së. Me duartrokitjet dhe temenat e tyre në këto ceremoni tragjikomike këta “shefa” po japin kontributin e tyre për legalizimin e kësaj katrahure të rrezikshme… Ata që dje Rugovën e quanin “Esat Pashë Toptan”, “kolaboracionist”, “tradhtar”, etj., para se t’i duartrokasin, t’i bëjnë temena dhe të mbajnë zi do të duhej të kërkonin falje për ato epitete… Kjo është edhe një arsye më shumë që figurat e diskutueshme t’i lihen historisë. Figura të tilla nuk mund të vlerësohen nga bashkëpunëtorët dhe “partizanët” e tyre. Ne e kuptojmë “entuziazmin” e Fatmirit, që ia mbante cantën Rugovës e sot ia zuri vendin, por ky “entuziazëm” është i dëmshëm për Kosovën dhe shqiptarët përgjithsisht. Ka të ngjarë, që Fatmiri me kompani, duke glorifikuar Rugovën po përpiqen të mbulojnë dhe harrojnë të kaluarën e tyre të “lavdishme” sa edhe ajo e idhullit të tyre…