Mërgimi, ky burg i madh!...

Shkruan: Fadil Shyti

“Unë jam hi, aty, ku dikur isha zjarr” (Bajroni).

(Letër shokut Arianit, i dënuar sikur unë, nga jeta mizore, -me burgun -mërgim! )

I nderuar atdhetar, Arianit!

-Më freskove më këto ide gjeniale, të poetit dhe mikut tonë të madh, Bajronit dhe njëkohësisht më mallëngjeve shumë, -sepse; vërtetë, këtej në mërgim, - ne, atdhetarët, jemi hiret, -kurse, në atdhe, ishim zjarret!...

-Por, ja kështu e paska jeta luftë, or vëlla; -të tjera qenkan dëshirat, objektivat, përpjekjet, e, në të tjera rrugë po na detyron, po na shtrëngon të “gjallërojmë”, timoni i jetës mizore!...

Vëllai ynë poet, Zeqir Duraku, këndon idhshëm dhe tmerrësisht, klithë i revoltuar në vargjet e tij melankolike:

"I zi, i zi, i zi, -s´ka më i zi se mërgimi"!...

Epo, dikush thotë, se, -më i zi është burgu!

Jo! Jo! Jo!

-Burgu, e ka një përcaktim kohe (e , ndofta edhe ajo kohë nuk të ngulfat , pra, nuk realizohet, sepse, ngjanë që, njerëzit dalin edhe para kohe nga burgjet, për rrethana të ndryshme...), por, mërgimi, nuk ka përcaktim kohe, dhe, për më tepër, nuk ka përkushtim askush për ne, -të burgosurit e burgut të madh -mërgim!

Pastaj, në burg je i dënuar vetëm personalisht, kurse, këtej, larg atdheut, jemi familjarisht të burgosur!...

Këtej, jemi seriozisht, tmerrësisht, të rrezikuar të “përparojmë” drejt asimilimit!

Ne, po na ndjekë fati i shumë paraardhësve tanë, kudo nëpër botë

si: shqiptarët në Turqi, Itali, Egjipt, Siri, etj.

Me këtë mërgim-ziun , rëndë po na dëmtohet qenia jonë pellazgo- Iliriane-arbërore - shqiptare!

Sikur të ishim bashkë dhe me trojet tona etnike të bashkuara, prej 92.000 km (katrore) ; ne; sot, do të kishim një shtet i fortë, me hiç më pak se, njëzetë milionë banorë!

Kurse, -kështu siç jemi tani, përditë si hienat po na sulmojnë armiqtë dhe miqtë e tyre nëpër botë me teori të reja “moderne” : tani, ata dhe shqipfolësit tanë të shitur kokë e këmbë për interesa të tyre personale; po duan edhe të na tjetërsojnë me komb të ri "kosovar"....nuk ka më ndjellje zie më të madhe në historinë tonë “moderne”....

Po duan deh të na tjetërsojnë me një flamur përçarës, që gjithçka mund të pasqyrojë, por kurrë dhe me asgjë, identitetin tonë, shqiptar!

Po, a nuk është kjo histori zvarranikësh, tmerri i tmerreve; kur një kombi i cenohet gjuha dhe flamuri!

-Por, këtë, disa hallemëdhenj dhe për më keq; disa trutharë, madje, nuk e dinë!

Shumë, shkurtpamës kujtojnë, që ne, "po flemë në dafina”!...

Se, këtej në vendet e huaja mike apo armike, gjithçka po rrjedhë vetëm, “mjaltë e sheqer”!

Ne, -vërtetë, kujtojnë disa se, po bëjmë jetë mondane, jetë moderne, por, ata/ato, nuk dinë që në fakt , -ne po bëjmë një jetë prej të robëruarish!

Po, a nuk i kryejmë ne, punët më të rënda dhe jashtë profesioneve tona, që i kishim, në vendet ku jetojmë?!

Merre me mend sa tragjike është fakti, kur, një intelektual me diplomë profesori apo doktori të shkencave, detyrohet të punojë , p.sh në Amerikë, si sharraxhi, ose një shok i tij detyrohet të punojë elektricist i thjeshtë apo saldues, apo, kur një ish- mjeke në atdhe, detyrohet, të punojë si pastruese, p.sh, në Suedi?!

Këto ditë e lexova në shtyp një shkrim që, vërtetë më la përshtypje, titulli qe pa ekuivok:“Vendet e pasura po ua marrin trurin, (inteligjencën), vendeve të varfra”!

Ndërsa, aty, sqarohej fort mirë kjo dukuri e rëndë, për vendet e pazhvilluara!

Ndërsa, unë këtë titull, do ta deshifroja kështu:

“Vendet e lira, po ua marrin trurin, (inteligjencën), vendeve të robëruara”!

Them kështu, sepse, -jo rrallëherë më ka ngjarë të takojë në punën time, punëtorë krahu, që në vendet e tyre, kishin qenë profesorë, mjekë, inxhinierë, e me të tjera kualifikime të larta shkencore!...

Shqetëson fakti, që edhe në sferën punësimit, bëhen diskriminime dhe segregacione të mëdha,kudo, ndaj të huajve; p.sh, në Suedi, kam lexuar në shtyp se mbi 3000 mjekë të huaj, janë larguar nga ky shtet, për të kërkuar punë gjetiu, kanë ikur në Amerikë, për të kërkuar punë!

Përkundër, se kishin diploma dhe përvojë pune, nuk pranoheshin dot në fushën e mjekësisë.

Pra, detyrimi me punë në burgun-mërgim: të kujton kohën kur dhe, në burg, të burgosurit/at, detyrohen të punojnë punë të tjera, jashtë profesioneve të tyre!

Për punët me detyrim që ngjajnë në burg- mërgim: kujtoj këtu, simbolin e rezistencës sonë kombëtare, shkrimtarin, Adem Demaçin, kur, në burgjet serbe, detyrohej të punonte në një ofiçinë për mprehjen e lapsave dhe punë të tjera, atje në Mitrovicën e Sremit!

Kujtoj, gjithashtu dhe politikologun e madh, vazhduesin dhe ideatorin e madh të ribashkimit kombëtar, akademik, Ukshin Hotin, kur, në burgjet serbe, detyrohej të punonte si rrobaqepës; dhe, atje “i maste” rrugët me penjtë dhe pjesët e këmishëve, në makinën qepëse, se, sa km, qojnë nga Prishtina në Nish apo në Washindon! Dhe, shembuj të tillë kemi të panumërt!

-Po, a nuk jemi ne, në çdo hap të përgjuar dhe të përbuzur dhe të fyer nga vendasit me ide pro-fashiste?!

-A nuk po vriten kudo nëpër botë, pa pikë mëshire dhe shumë herë dhe , pa shkaqe të arsyeshme, të rinj dhe a nuk po keqpërdoren si mos më keq, të rejat refugjate?!

Shembullin më të qartë dhe më të keq, e kemi fqinjin tonë jugor, Greqinë e cila e privilegjuar nga faktori evropian i asimiloi me dhunë shqiptarët e besimit ortodoks, kurse ata të besimit myslimanë i zhduku e i depërtoi në Turqi, Shqipëri e gjetiu; ....shpëtoi kush shpëtoi...kjo me bekimin e shteteve "demokratike" evropiane... ..dhe të dënuar për t'u asimiluar! Ndërsa, Italia, aspak nuk mbetet prapa saj, nga sulmet e egra që i ka bërë dhe po i bën, kundër shqiptarëve mërgimtarë. Kujtoj këtu, tragjedinë e Vlorës , kur me anijen luftarake “Sibila” u vranë afërsisht, 100 shqiptarë, që ia mësynë detit kobzi, drejt një shteti me një polici dhe ushtri të pabesë , atëbotë, të drejtuar prej xhelatësh.!...

Thonë or vëlla, Arianit, se : “gjaku nuk bëhet ujë” -por, gjaku shqiptar as sot e mot, nuk u shpagua nga shovinistët e fashistët e rinj italianë , sot e mot- ata, që e kryen atë vrasje makabër nuk e morën kurrë dënimin e merituar!

Po a të kujtohet or vëlla , pastaj, që; sa e sa të rinj po vriten pa hezitim nga policia greke dhe sulmuesit rrugaçë, shovinistë dhe, ata kurrë deri sot nuk po dalin madje as para gjyqeve, -tragjedi të tilla kanë ngjarë veç në kohërat e tmerrshme të ekspansioneve dhe të dyndjeve të mëdha, bizantine-romake! Se ç´mu kujtua tani ajo nxitje e zezë italiane: dikur , italianët me prirje neofashiste thoshin: “nëse e shihni një arbëresh dhe një ujk në rrugë, arbëreshin vrajeni e ujkun, jo!

Si duket , tani kjo strategji ogurzezë, po zbatohet mbi shqiptarët, nga lindja në perëndim, dhe, pa ngurrim!

...Dikur, na trajtonin si ”njerëz me bishta”, si “popull i egër”, që duhet ç’ farosur, ...e, tani, popull që Ballkani dhe Evropa dhe më gjerë, duhet të bëjnë eksperimente “hibride” , sikur që bëhen ndaj shtazëve dhe bimëve – kur, na servilen ide të “biologëve”, për një komb multietnik, pa çka, se Kosova qenka me mbi 98% e banuar me shqiptarë?!

Po, a ka shembull më injorues ndaj një kombi, dhe më i keq se ky; në botë?!...

Këto janë të mirat dhe “shpërblimet”, që , po na i dhuron dhe po na i njeh “demokracia” evropiane, me zbulimin epokal të edhe këtij shekulli mizor, me Paketën e Ahtisarit, në cilën i ka themelet , Kushtetuta e “pavarësisë dhe sovraniteti “ i Kosovës. Me “ zbulimin” e Kushtetutës ahtisariane, për atë që e sfiduam : shfarosjen dhe asimilimin, që na bëheshin nga fqinjët sllavo-grekë, me civilizimin euro- ortodoks!

Kur jemi këtu im vëlla ideali, Arianit!

Shtroj pyetjen për të gjithë politikanët e Kosovës, pozitë dhe opozitë:

Pse, ju or, z. “mendjendritur”, nuk e themeluat një Kushtetutë , e bazuar mbi PROJEKTPROGRAMET E STRATEGJIVE GJITHËKOMBËTARE, e jetëgjate, që vlojnë ndër shekuj, në damarët dhe mendjet e ndritura të shqiptarëve, si ato: të Lidhjes së Prizrenit, (L.SH.P), të Konferencës të Bujanit, në projektet e L.B.R.SH-së, të F.B.K.SH-së, apo, në projekt-udhë-rrëfimin e ri, për ardhmërinë gjithëkombëtare, të Lëvizjes Vetëvendosje, e cilat, bazohet në të drejtën e VETËVENDOSJES, së popullit tonë, dhe, angazhohen, për RIBASHKIMIN E TIJ NË NJË SHTET KOMBËTAR?!

E ritheksoj faktin që: hiç më mirë gjendja nuk qëndron këtej përtej deteve në shtetet perëndimore; ku, edhe pse, shtete me tradita të madha demokratike, për më tepër se 200 vjeçare, çdo ditë e më shumë, ato, po rrëshqasin në akullnajat siberiane, të nxitjes së urrejtjeve ndaj të huajve, madje, në Danimarkë të rinj flokëgjatë, pa hezitim netëve të vona, kudo dhe pamëshirë, i vrasin të huajt, vetëm pse ata janë me ngjyrë!!! Ata, të sëmurë rëndë, nga ksenofobia, -madje, kanë dalë me sloganin e zi: "në çdo fundjavë- mbrëmje, vikendi), do të vrasim nga një të huaj"!

Mjerisht, jo rrallëherë, kjo thirrje fataliste për jetë njerëzish , po zbatohet!...

Ne, po lexojmë në shtyp dhe dimë, X raste, kur janë vrarë të huajt e pafajshëm dhe kurrë deri tani, askush nuk ka shkuar në përgjegjësi morale as penale!

Dhe, kjo ka ngjarë; jo pse në këto vende nuk sundon ligji, jo pse në këto vende nuk mund të gjenden kriminelët, por, për fat të keq; në këto vende ka hyrë ksenofobia mbështjellë me idetë fashiste, kudo në instancat shtetërore , ka elementë reaksionarë që nuk i ndjekin aspak “të rinjtë e mitur, kinse, të llastuar”!...

Pa harruar këtu të theksoj faktin, që: shpesh ka pasur dhe ka reagime të njerëzve përparimtarë dhe nga këto shtete dhe nga organizata të tyre që i kanë të qarta dhe të pastra si loti situatat e rënda që po kalojnë vendet e robëruara dhe të kolonizuara , të cilat si pasojë kësaj situate, po ngjajnë episodet masive të popujve!

Fjala vjen, vetëm nga Iraku, në Suedi, kanë emigruar hiç më pak se

60 .000 refugjatë!

Këtu, suedezët pyesin: “a mos jemi ne fajtorë që Amerika nxitë luftëra në lindje dhe ne pastaj detyrohemi të ballafaqohemi me fluskun e madh të refugjatëve”?!- dhe, këtë, e thonë, madje, hapur dhe me shumë revoltë!

Krimet që po bëhen mbi shqiptarët mërgimtarë ( e, në veçanti ) nga vendet fqinje, janë të tmerrshme!

-Kjo, është njëra ana e zezë e medaljes; po , ana tjetër është se: -kurrë deri sot qeveria shqiptare nuk protestoi ashpër, as nuk i mori masat për mbrojtjen e qytetarëve të vet, ndaj atyre që sa herë ka zgjedhje në atdheun e tyre, udhëtojnë me kilometra të tërë për t´i votuar udhëheqësit e tyre të preferuar, “demokratë”!...

Mirëpo, pushtetarët e sotëm, nuk interesohen për qytetarët e tyre fatkeq; prej atyre i vjelin qindra e miliona lekë dhe natyrisht, duke bërë këtë po kontribuojnë fuqishëm, për ngritjen e ekonomisë shtetërore dhe gjithëkombëtare!

-Dhe, fundi i fundit, këta mosmirënjohës, nuk po kujdesen për ata, që, kurdoherë dhe kudo nga ishin, e dhanë djersën dhe gjakun për ta bërë Shqipërinë Natyrale; të lirë, të përparuar dhe të ribashkuar- pra, bukëshkalët nuk po interesohen, për pjesët e trupit të atdheut!!!

-Në Kosovën “e pavarur dhe sovrane” –ku, sot veprojnë të lira bandat gjakatare serbe, duke i djegur doganat kufitare dhe duke ngritur flamuj të Serbisë, e kryqe sllave nëpër kodra, për t´i provokuar rëndë shqiptarët, është e formuar, Ministria për Kthim, e cila, gjatë këtyre viteve të pasluftës, i ka kthyer qindra familje serbësh ardhacakë , ish-kolonistë në Kosovë, por, një Ministri për Kthim , ende nuk është formuar dhe, për ata qindra e miliona shqiptarësh, që emigruan nga dhuna dhe terrori serbë, që për më tepër se një shekull?!!!

Prandaj, asnjë familje shqiptare, deri sot, nuk është kthyer nga mërgimi, me ndihmën e qeverive që shkojnë e vinë si stinët e viteve !...

Por, pa bërë ndryshime pozitive, në të mirë të shqiptarëve, mërgimtarë!

-Nga kjo del pyetja-klithmë: vallë, ku është drejtësia për një komb të lashtë dhe të ri, si yni?!
A paska gjë më të tmerrshme se, kur kjo drejtësi shkelet çdo ditë, madje , nga vetë pushtetarët shqiptarë!

Pse, këtë nuk e bëjnë “pushtetarët tanë”; nuk duan apo janë të hendikepuar dhe të nënshtruar nga qarqe të huaja “mike”?!

-Nga ato qarqe të cilat nën rrogoz po ua bëjnë si mos më keq, greminat Kosovës dhe viseve të tjera shqiptare!

Ne, si shkak dhe pasojë të pushteteve dhe të regjimeve të jashtme dhe të brendshme kriminale dhe korrupsioniste e fataliste, -jemi duke hequr të zitë e ullirit!

-Them kështu, për faktin që: as pas kaq vitesh “të pavarësisë dhe sovranitetit” të Kosovës, ne, mërgimtarët, nuk po i përjetojmë, gëzimet dhe hidhërimet, natyrshëm në atdhe?!

Jo! Ne, ato, nuk mundemi t´i përjetojmë tej-skajshmërisht, as ngrohtë, as ftohtë!...

Ne, vetëm i ndiejmë ato, por, sa keq, që nuk i shijojmë!...

Ato, janë frytet e shpirtit, ato, neve po na mungojnë nëpër vitet -shekuj!

-Një trupi, kur shpirtit të tij i mungojnë , dielli dhe vitaminat,-si mund të jetë i shëndetshëm?!

Po, a nuk i dënonin dikur regjimet kriminale, të perandorive të mëdha, njerëzit atdhetarë me internime?!

-Po, si mos të konstatojmë që: a nuk janë dhe, këto regjime kriminale, dhe fatale që popujt po i shfrytëzojnë dhe pastaj, po i dënojnë me rrugë-mërgime, me rrugë pakrye?!...

I nderuar shok ideali, Arianit!

U zgjata ca, me këtë letër, por, më lejo , në fund, të përkujtojë dhe një poezi që e shkrova në vitin 1993, i rënduar keq, nga malli për Shqipërinë dhe kur në familjen time, e kishim një gëzim, ndërsa, unë me familjen time të ngushtë, nuk kishim mundësi të shkonim atje!...

...Nga shpirti im i trazuar, shpërtheu, si rënkim mali dhe gjëmim deti, poezia:

LARG DHE AFËR!

Atje, në vendin e dashur, në atdhe,

Gëzimet as hidhërimet, nuk i përjetojmë,

Jemi bërë si robotë, njerëzit, më fatkeq;

Të mbetur, nëpër botë!...

Suedi, Më 14.02.2009