Zërit të Radios Kosova e Lirë dhe Agjencisë Kosovapress

(në dhjetëvjetorin e punës së tyre)

Shkruan: Mehmet Bislimi

Duke e vënë ndërgjegjen në sprovë, shumë nga bjerrakohësit tanë, sot kanë zënë vend atje ku nuk e meritojnë, kanë zënë vend jo pa qëllim atje në TV-të, Radio-të e medie tjera të shkruara dhe elektronike, duke u bërë kështu pengesë e zërit të vërtetë të lirisë së popullit tonë, të progresit, të zhvillimit dhe të përhapjes së të vërtetës që është një dhe vetëm një- liri!?

Ata si edhe dikur ( në shërbim të hyqymetit), si gjithmonë, në mundësinë e vet të prapët po japin shembullin e së ligës, shembullin prej poltronit duke mos e vënë ndërgjegjen në sprovë, ngase kjo u mungon kështu duke i fry politikës ditore e cila vepron e jeton sot për nesër.

Në një kohë kur nuk guxonte kush të dëgjohej me tej se pragu i portës së shtëpisë, ngase Kanibali Serb ishte të porta e lërë më të dëgjohej zëri i një radioje që do të përhapte kumbueshëm zërin e shpresës së shqiptarëve, zërin e pushkëve të lirisë të cilat po këndonin bukur në duart e bijve tanë më të denjë rreshtuar në radhët e UÇK-së të cilët kishin nevojë që lufta dhe sakrifica e tyre mbështetur fuqishëm nga populli shqiptarë të pasqyrohej drejt para opinionit ndërkombëtarë. Këtë gatishmëri e tregoi dhe e realizoi “Radio Kosova e Lirë” dhe “ Agjencia Kosovapress”. që në janar të vitit 1999- të, kur edhe u themelua Radio Kosova e lirë dhe agjencia Kosovapress. Pa dyshim me iniciativë të liridashësve tanë e me mbështetje të domosdoshme të Shtabit të Përgjithshëm të Ushtrisë Çlirimtare të Kosovës dhe të drejtorisë së saj politike.

Ju, njerëzit e sakrificës, në emër të dashurisë për lirinë e atdheut morët këtë barrë mbi supe, ju iu përveshën punës me përkushtim, duke dhënë çdo gjë nga vetja e juaj në mënyrë që të thuhet dhe të mbrohet e vërteta dhe vetëm e vërteta. Edhe përkundër vështirësive shumëdimensionale, po kaq madhërishëm ia dolët dhe realizuat misionin tuaj kombëtar që në sekondat e parë të lindjes së saj me zërin kumbues nga malet e Berishës, duke iu drejtuar popullit tonë liridashës: “Ju fletë Radio Kosova e lirë!”.... Ky zë fuqishëm kumboi maleve, istikameve e fushave të Kosovës të djegura për liri! Ky zë ngriti në këmbë qindra e mira luftëtarë të lirisë, ky zë mbolli shpresa të fuqishme tek popullata jonë që makineria ushtarako-policore serbe e kishte dëbuar nga vatrat e veta shekullore, ky zë mobilizoi shqiptarët, duke i orientuar drejt për mes të vërtetës që Radio Kosova e lirë po e thoshte dhe po e përhapte gjithandej meridianëve shqiptare. Ky zë mobilizoi mijëra mërgimtarë me zemër të plasur për ta dëgjuar zërin e vërtetë të lirisë së atdheut të tyre! Ky zë mikloi zemrat e nënave, të nuseve, të motrave dhe të fëmijëve të qindra e qindra dëshmorëve të kombit tonë që kishin ra për një tokë të lirë e të bashkuar shqiptare! Ky zë po thoshte të vërtetën se Kosova do të çlirohet dhe pushtuesin serb do ta dëbojmë me pushkët e lirisë nga trojet tona! Ky zë ishte dhe mbeti zëri më i fuqishëm dhe më i guximshëm i shqiptarëve që quhet “Radiokosovaelirë!”, ky zë që kaq gjatë i kishte munguar Kosovës dhe shqiptarëve gjithandej.

Se bashku me zërin e lirisë po aq fuqishëm përhapi të vërtetën e madhe edhe Agjencia Kosovapress, duke u bërë burim i informimit korrekt, të sinqertë, të shpejt e burimor. Agjencia Kosovapress përballoi kohët e liga dhe botës i ofroi pasqyrën e realitetit të luftës sonë çlirimtare, njëkohësisht demaskoi fuqishëm barbaritë e makinerisë së pushtuesit serb. Kosovapress me punën e saj si brenda vendit ashtu edhe jashtë tij, bëri punë kolosale për atë kohë kur zëri ynë, pra zëri i shqiptarëve ishte ngulfatur nga pushtuesi më qëllim që krimet e tija të mbesin të mbuluara nën petkun e errësirës, pa dyshim që shumë nga agjencitë e botës u furnizuan me të vërtetën e madhe për krimet e padëgjuara ndonjëherë më parë, që pushtuesi serb po i zbatonte mbi popullatën shqiptare në Kosovë. Kosovapress, me punën e vet dëshmoi se ata djem punëtorë atje, që gdhinë net të tera për ta thënë të vërtetën, janë pikërisht ata më meritorët që këtë Agjenci e avancuan edhe më, pra e sollën deri këtu ku sot e njeh dhe e pranon edhe opinioni ndërkombëtarë! Dorën në zemër gjatë kohëve kur Kosova po digjej nga flakët e lirisë një punë kolosale ka bërë edhe gazeta “Zëri i Kosovës” me botim në Zvicër, gazeta “Rruga Jonë” me botim në Lion të Francës si dhe TVSH-ia.

Sot kur po shënohet viti i dhjetë jubilar i këtyre dy mediave të fuqishme, jam duke shënuar këtë shkrim me zemër të plasur që nuk kam mundësi reale për të qenë së bashku me ju atje si fizik, por ja që ndjenjat e shpirtit tim i keni këtu në këtë letër: Të dashur e të nderuar vëllezër e motra, familjar të dëshmorëve të kombit dhe ju stafi i redaksisë; ne mërgimtarët ku do që jemi të shkapërderdhur nëpër botë gdhihemi dhe ngrysemi me zërin e së vërtetës, pra me zërin e Radiokosovës së lirë e cila me emisionet e saja të përditshme ditët e kurbetit na i bënë më të shkurtra!... RKL, me emisionet e veta, po hap dyert e familjeve të Dëshmorëve të kombit e cila po miklon zemrat e nënave tona të shumëvuajtura, të cilat në këto kohë të harlisura pak kush po i kujton e shumë më pak kush po ua qan hallin! RKL. fëmijëve të dëshmorëve të kombit po ua ndez shkëndijat e shpresës se ky vend nuk i ka harruar, krijueseve të fushave të ndryshme po ua hap portat e dijës duke iu dhënë atyre hapësirë të mjaftueshme, kulturës së mirëfilltë po i jap shtytje të mëtutjeshme, melosit tonë popullor po i jap ngjyrat e veta edhe më të bukura. Ish të dënuarve politik të cilët kanë lënë vitet më të bukura të rinisë së tyre, për mes emisionit: ”Letra nga burgu!”, po ua lehtëson plagët e dikurshme duke e kujtuar këtë popull se rrugët e lirisë nuk ishin kopsht me lule mbjellë nga agronomet e hortikulturave Evropiane, por ishin rrugë të rimuara me gjakun e shqiptarëve që lanë edhe lëkurat e tyre nëpër kazamatët e pushtuesit serb- fatkeqësisht edhe sot gjakatarët serb po të njëjtën gjë po ushtrojnë mbi shqiptarët- siç ishte rasti i arrestimit të bijve tanë në Preshevës para pak dite.

Po këtë fuqi veprim po e dëshmon për ditë edhe Agjencia Kosovapress, duke rritur shtatin e saj tanimë si agjenci kombëtarë e shtetërore!

I vetëdijshëm se do të ngacmoi ca në plagët e liga të shumë mediave të cilat për fat të keq edhe tani, po si në të kaluarën ia kanë mbajtur ison pushteteve aktuale në fuqi, cilat do qofshin ato. Dikur nën ish Jugosllavi, Televizione, Radio, gazeta e çka jo ishin vënë në garë se kush kujt do t’ia kaloi duke sharë bijtë e popullit që ua prishën vëllazërim- bashkimin me pushtuesin serbo-sllav! Edhe tani, po njëjtë gati- veç ka ndryshuar forma dhe mënyra e të shprehurit dhe e të paraqiturit, pra në garë kush po shanë e kush po hedh më shumë baltë mbi tezat dhe aspiratat e popullit tonë për liri e bashkim kombëtar, duke i cilësuar ato si kohë të demoduara, primitive, apo si botëkuptime të mykura të disa të “pandreqshmëve!”... Radiokosovaelirë dhe Agjencia Kosovapress as edhe një herë nuk ka rënë pre e pushtetarëve, por as e politikës ditore, urojmë që të qëndroj kështu dhe mos të pranoi që të futët nën sqetullat e huaja! Ju, nuk jeni nënshtruar para as një sfide dhe atë as në kohërat më të vështira, ju me vetmonim të pa parë keni rezistuar edhe kohërat e ndryshkura të pasluftës të cilat jo pa qëllim kanë goditur ZËRIN E LIRË TË KOSOVËS, nga kudo që është emetuar ai! Duke uruar që përvjetor të tillë të Radiokosovaelirë dhe të Agjencionit Kosovapress të përjetojmë gjatë- me shpirt e zemër iu uroj sukses.

10.01.2009