Republika e Kosovës

Komuna e Vitisë

Xhevat Bislimi-Nënkryetar i Komunës

Për Kuvendin e Kosovës – Kryetarit, Jakup Krasniqi

Letër e hapur

Kopje për:Qeverinë e Kosovës – Kryeministrit, Hashim Thaçi

Ministrinë e Ad. të Pushtetit Vendor – Ministrit, Sadri Ferati

Këshillin (bordin) e Drejtorëve të AKP-së – Kryetarit, Dino Asanaj

Agjencionin Kadastral të Kosovës – Drejtorit, Hajzer Bublaku

Gjykatën Komunale të Vitisë – Kryetarit, Hajriz Lubishtani

AKP-në – Zëvendësdrejtorit Menaxhues, Shkumbin Bicaj dhe

AKK-së – Drejtorit, Hasan Preteni

Të gjitha mediave

Zoti Kryetar i Kuvendit të Kosovës, të nderuar qeveritarë dhe zyrtarë të lartë,

E lexuamë me shumë vëmendje “letrën” e mbushur me kërcnime dhe shantazhime të nënshkruar nga Shkumbin Bicaj, Zëvendësdrejtor menagjues i Agjencionit Kosovar të Privatizimit. Ne as u tronditëm as u mbushëm me mllef. Pas leximit të kësaj “letre” aktpaditëse dhe aktgjykuese po mendonim të qetë: Si ka mundësi që një Zëvendësdrejtor menagjues (udhëheqës) i një Agjencie të themeluar nga Kuvendi i Kosovës të jetë i mbushur deri në grykë me mllef dhe vrer ndaj një Komune që po përpiqet me të gjitha forcat dhe kapacitetet e saj që ta mbrojë interesin publik, por edhe privat të qytetarëve të saj? Ku duhet ta ketë burimin kjo revoltë e papërmbajtur e këtij Shkumbinit të Bicajve? Dhe, pas një meditimi të gjatë, erdhëm në përfundimin logjik se rrënjët e kësaj revolte dhe të këtij mllefi duhet të jenë te e kaluara e “lavdishme” e Shkumbinit dhe e AKM-së “famëmadhe”. Rrënjët janë te “miza pas veshit” e atyre që në emër të privatizimit rrënuan dhe shkatërruan pronën, pasurinë, ekonominë dhe industrinë e Kosovës. Në emër të privatizimit AKM-ja dhe Shkumbini, nënë ombrellën e hekurt të UNMIK-ut, e trafikuan dhe e kontrabanduan pronën, ekonominë dhe pasurinë e Kosovës. I njëjti Shkumbin po përpiqet ta “udhëheq” dhe përdor edhe AKP-në për realizimin e interesave të individëve dhe grupeve shpeshherë të dyshimta, me pasuri dhe para me origjinë të dyshimt dhe aspak për zhvillimin dhe mirëqenien e Kosovës e të popullit të saj.

I nderuar Kryetar i Kuvendit dhe ju qeveritarë e zyrtarë të lartëshënuar,

Komuna e Vitisë dhe Kuvendi i saj nuk kanë pasur mundësi tjetër për ta hapur debatin për këtë çështje jetike për Komunën tonë, për Kosovën dhe për popullin e saj dhe për ta “imponuar” për shqyrtim nga organet më të larta të Republikës së Kosovës. Prandaj, kanë sjellur VENDIMIN që paska tronditur Shkumbin Bicajn. “Letra” e tij na ka bindur se ne ia kemi arritur qëllimit, kemi qëlluar në shenjë. Besojmë se të njëjtën gjë, nëse nuk e kanë bërë deri tani, duhet ta bëjnë edhe komunat e tjera në Kosovë. Janë për të qeshur dhe për të qarë fjalët e tij (Shkumbinit) të mbushura plotë hipokrizi. Citoj: “Fillimisht dëshiroj të theksoj faktin se rindërtimi dhe zhvillimi ekonomik i Kosovës si dhe mirëqenia e qytetarëve të saj është me rëndësi jetike për Republikën e Kosovës dhe një ndër shtyllat kryesore të këtij procesi ka të bëj me administrimin, privatizimin dhe/ose likuidimin me kohë të ndërmarrjeve në pronësi shoqërore…”. Ne, Zoti Kryetar i Kuvendit të Kosovës kërkojmë edhe zyrtarisht nga Zëvendësdrejtori menagjues i AKP-së të dimë (dosjen komplete) si u “privatizua” “Bahqja” e Vitisë (mbi 12 hektarë tokë e klasit të parë dhe e tërë infrastruktura e saj)? Pastaj, sa u rritë “mirëqenia” e qytetarëve të Vitisë nga ky trafikim i kësaj prone? Si u privatizua fabrika “VINEX”? Si u “privatizua” fabrika e ujit në Kllokot? Si u menagjua “Banja e Kllokotit” për këto nëntë vite dhe prona e saj? Keni privatizuar (trafikuar) 21 hektarë tokë të kësaj Banje për një copë bukë, zoti Shkumbin. Në këtë tokë deri tash është ndërtuar vetëm një shtëpi e zakonshme edhe ajo e papërfunduar tash e sa vjet! Kurse Komuna e Vitisë ka dhënë 45 ari tokë me koncesion dhe konform të gjitha rregullave dhe ligjeve për ngritjen e një spitali që nuk e kemi në Kosovë (trajtimi dhe shërimi i sëmundjeve të grave) dhe ju me sejmenët tuaj në Kllokot e në Gjykatë keni dhënë alarmin! Investitori është privat dhe deri tash ka punësuar mbi treqindë qytetarë nga Komuna jonë. Kurse AKM-ja jote, zoti Shkumbin, me të gjitha privatizimet (trafikimet) e pronës në Komunën tonë nuk ka punësuar as tre vetë! Përkundrazi, ka lënë pa punë mijëra punëtorë. Komuna jonë është seriozisht e angazhuar për ndërtimin e një partneriteti të fuqishëm publik-privat, por jo për rrënimin e pronës dhe të ekonomisë. Ju me Gjykatën dhe me grupe të dyshimta interesi po përpiqeni ta pengoni dhe rrënoni edhe ekonominë private dhe mirëqenien e qytetarëve. “Nëna Naile” me pronarin e saj është investitori më serioz në Komunën tonë. Vetëm për spitalin, që ju po përpiqeni me çdo rrugë e mjet ta pengoni ka paraparë të investoj mbi tre milionë euro dhe të punësojë mbi 70 punëtorë të rinj nga Komuna jonë. Si nuk ju ka shkuar mendja as ju as Gjykatës (prokurorisë) ta auditoni dhe hetoni punën e “Banjës së Kllokotit”, që po milet (mjelet) tash nëntë vjet pa krunde. Si nuk i shikoni gjithë ato mbindërtime dhe ndërtime rreth kësaj Banje? A ju ka shkuar mendja ndonjëherë sa prona shoqërore janë privatizuar (trafikuar) pas vitit 1999 me dokumente dhe letra të fabrikuara nëpër bodrume të ndryshme dhe të vërtetuara nga gjykatat e “pavarura” të Kosovës? Sa e keni respektuar 22 marsin e vitit 1989, që e citoni në nenin 5 të ligjit 03/L-067? Rasti i “Banjës së Kllokotit” dhe i “Nënës Naile” është denoncuesi më i mirë kundër jush dhe Gjykatës komunale. Marifetllëqet e juaja dhe të Gjykatës më së miri janë dukur në këtë rast dhe në rastin e stacionit inekzistues (të imagjinuar) të autobusëve.

Ju, zotri Shkumbin Bicaj, keni përmendur edhe rastin e Stacionit të Autobusëve në Viti. Edhe ky rast zotri është një akuzë, si shumë të tjera, për ju. Sepse, stacionin e autobusëve e keni lënë në mëshirën e fatit dhe të keqpërdoruesëve e hajdutëve të ndryshëm pikërisht ju-AKM-ja. Atë stacion nuk e ka rrënuar Komuna, por e kanë demoluar dhe përvetësuar njerëz të ndryshëm ose më mirë me thënë kush ka dashur. Sa për shpjegim, stacioni nuk ka qenë i ndërtuar me material të fortë. Aty dhe rreth tij janë bërë edhe ndërtime pa leje dhe askush për tetë vite nuk është marrë me te. Pamja e ati vendi ishte tepër joqytetëruese, madje barbare. Toka, ku ishte vendosur ky stacion dhe rreth tij është pronë komunale, zoti Shkumbin. Kjo dëshmohet me të gjitha dokumentet. Ne nuk e kemi marrë për vete, por do ta japim me koncesion. Aty do të ndërtohet një stacion i autobusëve, një pjesë do të bëhet park (lulishte) dhe pesë ari do t’i jepen në shfrytëzim Shoqatës së Gjuetarëve, “Karadaku”, e cila ka fituar tenderin për menagjimin e zonës së gjuetisë në Komunën tonë. Janë shpifje dhe prralla me mbret akuzat e juaja se gjoja Komuna paska rrënuar Stacionin e Autobusëve. Ne mbajmë përgjegjësi për të gjitha veprimet tona, por për politikat dhe veprimet e juaja shkatërruese ne nuk mbajmë përgjegjësi. Citimi i ligjit ose ligjeve dhe kërcënimet me burg është mirë t’i mbani për vete, t’i merrni mbrapsht. Sepse, po të kishte auditim dhe hetim të pavarur, të pandikuar, me siguri që dikush do ta shijonte lezetin e burgut, por jo ne…

Tjetër, ju zoti Shkumbin dhe gjithë ata që ju mbështesin duhet ta keni të qartë se ligji kërkon të jeni të pavarur nga ndikimet “politike” dhe veçmas nga ndikimi i grupeve të ndryshme të interesit dhe grupeve e rrjeteve mafioze që janë profesionalizuar në zanatin e tyre për trafikimin e pronës, dhe jo të pavarur nga Institucionet e Republikës së Kosovës. Komuna, zotri, është njësi themelore e qeverisjes në Republikën e Koësovës, nëse nuk e keni ditur.

Komuna jonë dhe përfaqësuesit e saj, zoti Kryetar i Kuvendit dhe Ju zotërinj qeveritarë, kemi trokitur në të gjitha dyert (edhe në AKM, tash edhe në AKP) dhe me dashamirësinë më të madhe kemi kërkuar të gjejmë zgjidhje për pronat dhe objektet që ishin shoqërore ose shtetërore e që gjenden në qytet, sepse privatizimi i tyre rrezikon interesin publik qytetar, rrezikon planin zhvillimor, rregullues dhe urbanistik të qytetit dhe të Komunës sonë. Komuna jonë, po të zbatohen politikat e juaja të mbrapshta nuk do të ketë një hektar vend për një zonë ekonomike ose industriale, që do të ngritej për mirëqenien e qytetarëve tanë dhe për ndërtimin dhe zhvillimin e partneritetit publik-privat, zotrinj, jo për drejtuesit e sotëm të Komunës. Ish-AKM-ja, sot AKP-ja, ka nxjerr në tender qendrën tregtare (ish-shtëpinë e mallrave), e cila ndodhet mu në zemër të qytetit, pa marrë parasysh interesin e Komunës dhe të qytetarëve, etj. Cili Agjencion dhe cili shtet do ta bënte këtë punë? Në fund të fundit ku i mori këto prona AKM-ja (AKP-ja), që paska të drejtë t’i shesë, stërshesë dhe shpesh t’i trafikojë si prona të shkreta pa marrë mundin as të këshillohet, t’ia bëjë dert Komunës? Pronat, që janë në qytet, por edhe jashtë qytetit, e që janë me interes të veçantë për Komunën dhe qytetarët tanë duhet t’i lihen Komunës (komunave) dhe nuk mund të privatizohen (trafikohen).

Prandaj, Zoti Kryetar i Kuvendit, Zoti Kryeministër dhe Zoti Ministër i Pushtetit Vendor, kërkojmë që Qeveria dhe Kuvendi, nëse është e nevojshme, ta korrigjojnë ligjin, të nxjerrin udhëzimet e nevojshme ose të bëjnë memorandum me komunat, por sidomos ta “disiplinojnë” AKP-në dhe t’ia kujtojnë se më nuk janë Agjencion i UNMIK-ut, por i Republikës së Kosovës. Prandaj, në themel të politikave dhe punës së tyre duhet të jenë interesat e këtij shteti, zhvillimi ekonomik dhe mirëqenia e qytetarëve e jo zhvatja dhe trafikimi i pronës dhe i pasurisë së këtij vendi. Por, jemi skeptik se këtë punë mund ta bëjnë ata që mendojnë, punojnë dhe udhëheqin me logjikën e UNMIK-ut dhe të AKM-së. Prandaj, Kuvendi i Republikës së Kosovës, Qeveria dhe Institucionet tjera politike e shtetërore duhet të mendojnë dhe të veprojnë urgjentisht për ndërtimin dhe zbatimin e një koncepti dhe politike ndryshe, të re, dhe në interes të Kosovës për pronën. Era e konceptit dhe e politikës së UNMIK-ut dhe AKM-së për pronën në Kosovë duhet të marrë fund. Kosova është shpallur shtet i pavarur dhe sovran, prandaj ne, me politikat, angazhimet dhe veprimet tona duhet edhe ta bëjmë shtet të pavarur dhe sovran. Në këtë frymë duhet të sillemi edhe me pronën, të cilën, nuk i lejohet më askujt ta trajtoj si pronë pa zot ose edhe më keq si pronë e ish-pushtuesëve.

Kam shpresë dhe rroj me të se do të na kuptoni drejt, zoti Kryetar i Kuvendit dhe ju zotrinj qeveritarë e zyrtarë të lartë. Jo vetëm kaq. Besoj se edhe do të merreni me këtë çështje të rëndësishme për vendosjen e ekuilibrave ekonomik e social, privat e publik në Kosovë.

Viti, më 27 nëntor 200 Përshëndetjet e mia të sinqerta!