HAPJA E DOSJEVE TË ANËTARËVE TË EKIPIT NEGOCIATOR

Qytetarët e Kosovës kanë të drejtë të mos i njohin rezultatet e negociatave apo marrëveshjeve të mundshme me Serbinë, si dhe të angazhohen në një padëgjueshmëri qytetare.

Shkruan: Ismet Hajrullahu

Hapja e dosjeve, është bërë e domosdoshme që pas dëbimit të të gjitha forcave të segmenteve të ndryshme serbe nga UÇK-ja e lavdishme dhe forcat e NATO-s. Populli i Kosovës në fakt kishte pritur se me në fund gjërat do të shqyrtoheshin ne thellësi dhe gjerësi, në aspektin e njohjes së krimit, por edhe të ndëshkimit të gjenocidit që kishte ushtruar Serbia dhe bashkëpunëtorët e saj. Mjerisht një gjë e tillë nuk ngjau. Në vend se të merreshin masa ndëshkimi, u hodh një mbulesë, mbi krimet antinjerëzore të diktatit sllav mbi shqiptarët në Kosovë dhe viset e tjera shqiptare . Për fat të keq, edhe sot, nëpër administratën publike të Kosovës, gjyqësi, media publike, qeveri, parlament, lëvizin elementë të instrumentit famëkeq gjenocidial , që jo vetëm nuk janë ndëshkuar për shërbimet që i kanë bërë shërbimeve famëkëqija serbe, por shpërblehen me poste kyçe në administratën e Kosovës së pasluftës.

Me Kosovën dhe qytetarët e saj ende po luhet në mënyrën më djallëzore. Duke mos i hapur dosjet, të paktën të një kategorie të caktuar , i zgjatet jeta krimit monstruoz që është zhvilluar dhe po vazhdon te zhvillohet po në të njëjtën formë, por paksa më të kamufluar edhe pas largimit zyrtar të trupave kriminale ushtarake serbe. Nëse hapja e dosjeve do të përbënte “kërcënim për destabilizimin” e Kosovës , gjë që do të mund të “shoqërohet detyrimisht me konflikte”, atëherë le të gjendet të paktën një kompromis duke i hapur vetëm dosjet e anëtarëve të “Ekipit të Unitetit” si dhe të gjithë anëtarëve të “Ekipit Negociator”, të cilët në rastin konkret e kanë ngarkuar veten që t`i mbrojnë interesat jetike të Kosovës! Me hapjen e këtyre e dosjeve, të paktën qytetarët e Kosovës do të ishin të qetë se ata përfaqësohen nga elementi që nuk është involvuar në çfarëdo segmenti të shërbimeve sekrete serbe e sllave në përgjithësi. Në të kundërtën qytetarët e Kosovës kanë të drejtë të mos i njohin rezultatet e negociatave apo marrëveshjeve të mundshme me Serbinë, si dhe të angazhohen në një padëgjueshmëri qytetare.

Fatkeqësisht si në UNMIK dhe te disa nga forcat politike parlamentare dhe jo parlamentare të Kosovës , si dhe të ndonjë intelektuali, që për çudi, kërkojnë faljen e bashkëpunëtorëve të shërbimeve kriminale serbe, shihet një hezitim kur vihet ne diskutim problemi i bashkëpunëtorëve të sigurimit famëkeq jugosllav ose thënë në gjuhën e popullit, të “udbashëve”. Ky hezitim vjen si rezultat, se një pjesë e mirë e tyre, apo një numër relativisht jo i vogël i politikanëve të sotëm, janë involvuar direkt ose indirekt nëpër shërbimet e inteligjencës sekrete serbe e sllave.

Prandaj, hapja e dosjeve, pa paragjykuar askënd, bëhet edhe më e domosdoshme në këtë kohë, kur po negociohet me palën serbe, sepse ata që dje flisnin për reformë të pushtetit lokal, sot negociojnë për komuna të reja serbe; sepse ata që dje flisnin per mbrojtjen e vlerave të trashëgimisë kulturore, sot deklarojnë se të gjitha objektet fetare ortodokse të Kosovës janë serbe… Andaj është krejtësisht morale dhe e ligjshme që qytetarët e Kosovës të bëjnë një presion edhe më të madh te kjo klasë politike , sepse, duke hezituar për hapjen e dosjeve, mbështetet krimi dhe bëhen veprime antikombëtare, gjë që paraqet rrezik serioz, permanent për të ardhmen dhe për të gjitha zhvillimet e mëvonshme të shoqërisë kosovare.

Për hir të qetësisë shpirtërore të popullit, për hir të atyre që dhanë gjithçka nga vetja - edhe jetën e tyre, për lirinë e këtij vendi , për hir të demokracisë që shumë trumbetohet dhe për hir të sigurisë dhe ardhmërisë së vendit, le të hapen dosjet e atyre që e kanë ngarkuar veten për të negociuar me serbet. Nëse është e “pamundur” të hapen dosjet nga UNMIK-u, KFOR-i apo shërbimet inteligjente të përfolura të Kosovës, atëherë le të kërkojmë që në emër të demokracisë dhe transparencës, te zbardhen dosjet e anëtarëve të “Ekipit të Unitetit” dhe atij Negociator, nga shërbimet inteligjente te disa vendeve të Kuintit, të cilat kanë për obligim, në mos tjetër moral, t`i vënë themelet e një shteti dhe shoqërie të shëndoshë demokratike.