Shoqëria Shqiptare

"ILIRIA"

Lyon – Francë

e-mail: iliria@free.fr

Kuvendit të Kososvës

Kryetarit të Kosovës

Kryeministrit të Kosovës

Letër mbështetjeje

Zonja dhe zotërinj,

Bashkatdhetarë të nderuar,

Gjatë ditëve të fundit është nisur një sulm i ri kundër çështjes shqiptare. Burimi i këtij sulmi është si shumë herë tjera Beogradi që fatkeqësisht edhe pak vite pas luftës së Kosovës po gjen mbështetje të qarqeve të caktuara ndërkombëtare. Fushata e re për ndarjen e Kosovës së pavarur i paraparë me gjashtë pikat e Ban Ki Munit, nuk është tjetër pos vazhdim i lakmisë dhe hegjemonisë serbe ndaj tokave shqiptare të Kosovës.

Duke qenë të bindur se populli shqiptar ka forcë që edhe këtë herë t'iu bëjë ballë sulmeve serbe, mbështesim fuqishëm qëndrimin e institucioneve të Kosovës për refuzimin e planit gjashtëpikësh që copëton edhe njëherë Kosovën. Kushtetuta e Kosovës e dalë nga Plani i Ahtisarit ishte dhe duhet të jetë kompromisi i fundit që mund të bëjnë shqiptarët ndaj pushtuesve serbë të tokave tona. Nuk mund të bëhen më lëshime ndaj Serbisë përkundër gatishmërisë së popullit shqiptar të ulë tensionet ndëretnike në Gadishullin Ballkanik. Duhet të kërkohet edhe njëherë nga të gjithë mbështetësit e shqiptarëve në Amerikë dhe Evropë që presione duhet ushtruar ndaj Serbisë që është shkaktarja e gjithë këtyre luftërave në Ballkan dhe lakmia e saj për tokat e kombeve tjera bën shumë të pasigurtë edhe më tutje Ballkanin.

Banorët e Kosovës nuk mund të heqin dorë nga trojet e tyre që sot po rrezikohen për ndarje nga trungu i saj. Tërësia tokësore e Kosovës është paprekshme siç është e paprekshme pavarësia e saj.

Edhe ne mërgimtarët shqiptarë që jetojmë në Lyon të Francës, jemi fuqishëm në mbrojtje të integritetit territorial të Kosovës. Jemi fuqishëm në mbështetje të institucioneve të Kosovës për të përballur këto presione që burim kanë Beogradin apo janë në përkrahje të qëllimeve pushtuese të tij.

Lyon më, 16 nëntor 2008 Nga Kryesia e Shoqërisë Shqiptare "Iliria" - Francë