Kryeministri Thaqi po mbron kushtetutën e Kosovës!

Shkruan: Mehmet Bislimi

Kryeministri Thaçi dhe Presidenti Sejdiu, po kryejnë detyrën e tyre denjësisht, po mbrojnë Kushtetutën e vendit; Për këtë i obligon vota e popullit!

Mes ndjenjave të përziera të qytetarëve tanë të shkaktuara me plot arsye që janë të ndikuara nga situata politike aktuale që po kalon Kosova dhe populli ynë, realisht ne më nuk mund të mbajmë një pozicion asnjënës, duke u hequr sikur nuk po ndodhë asgjë nën këmbët tona! Sa herë që vendi ynë ka qenë i kanosur me rrethana dhe procese rënduese, burrat e dheut janë bërë tok dhe kanë treguar në kohë se këtu janë dalzotësit e kësaj toke të cilët përgjigjen me kokën e vet!

Më këtë rast, për mos t’i hy në hak edhe opozita po mban qëndrim adekuat. Gëzon fakti së kur janë në pyetje interesat madhore të atdheut, sot, për të mos thënë për herë të parë, ne rreshtohemi drejt dhe tok, duke dëshmuar se dimë dhe jemi të vendosur të mbrojmë dinjitetin tonë dhe të drejtat kombëtare sa herë që rrezikohen ato. Po në këtë mënyrë popuj dhe shtete të mëdha të botës arritën të mbijetojnë presioneve dhe obskurantizmave siç i vijnë Kosovës sot nga kriminelja e Ballkanit – Serbia.

Kryeministri Thaçi dhe Presidenti Sejdiu, po kryejnë detyrën e vet në përputhshmëri të plotë me kushtetutën e Kosovës, duke arsyetuar votëbesimin që gëzojnë nga populli ynë! Ky qëndrim nuk mohon bashkëpunimin me politikën përparimtare të botës demokratike, por përkundrazi ndihmon botën e progresit ndërkombëtar për të ecur përpara duke mos e lejuar atë që të bëjë shkarjet e radhës të cilat mbi të gjitha do t’i kushtonin këtij procesi. Mospranimi i planit gjashtëpikësh mbron Kosovën dhe popullin e saj nga anarkia totale e cila mund të marrë dimensione të paparashikueshme, njëkohësisht ndihmon Bashkësinë Evropiane që të jetë funksionale në rolin e saj në tërë tërësinë e territorit të Kosovës.

Kryeministri Thaçi dhe Presidenti Sejdiu, duke qenë të arsyeshëm dhe plotësisht të vetëdijshëm në këtë qëndrim, popullit të Kosovës dhe bashkësisë ndërkombëtare po i tregojnë se janë figura të duhura në kohën e duhur me të cilët mund të ecët përpara. Populli mbështet fuqishëm qëndrimin tuaj të drejtë dhe është me ju. Jeni në krye të detyrave që Kushtetuta e Kosovës ju ngarkon prandaj edhe duhet kryer obligimin tuaj që kanë marrë në mbrojtjen e saj dhe interesave të shtetit të Kosovës. Populli ua ka dhënë besimin me votën e tij dhe në asnjë çast nuk dëshiron që të zhgënjehet me të zgjedhurit e tij. Duke pasur mbështetjen e popullit shqiptar arsyetojeni besimin dhe mbështetjen me punë dhe veprime konkrete e të vendosura. Për Kosovën nuk jeni vetëm!...

Nuk ka rrugë tjetër. Koha e tanishme na obligon që të ndërtojmë shtetin e Kosovës, ta ruajmë tërësinë e saj territoriale, pavarësinë dhe sovranitetin e saj. Kushtetuta e vendit respekton në mënyrë të barabartë popullin e saj - si askund në botë, pra për të gjithë ata që e duan dhe që e pranojnë për shtet të vetin Republikën e pavarur të Kosovës! Çdo zgjidhje tjetër, do të nëpërkëmbte dhe do të përbalte dinjitetin tonë kombëtar. Edhe ju sikur të gjithë ata që mbrojnë interesat dhe pacenueshmërinë e atdheut kanë popullin mbrapa!

15. 11. 2008