Bashkësia Islame e Kosovës mashtron besimtarët

Shkruan: Xhevat Bislimi

   Pak kush në Kosovë e di se Bajrami i Vogël sivjet u festua më 30 dhjetor vetëm në Prishtinë dhe në Beograd! Sipas kalendarit islamik Bajrami i Vogël do të festohej më 31 dhjetor. Vetëm dy ditë përpara, të enjten (28 dhjetor), Bashkësia Islame e Kosovës shpalli se Bajrami i Vogël do të festohet të shtunën, më 30 dhjetor! Shqiptarët e besimit islam i kaploi habia dhe dyshimi! Si ka mundësi të ndërrohet data e Bajramit nga njeriu,-pyesnin besimtarët e devotshëm. Nuk ka bërë vaki kjo punë, thoshin ata të habitur me këtë ndryshim date. Disa që ishin më "fanatikë" pohonin se kjo është bërë përë shkak të Vitit të Ri, etj. Por, askujt nuk i shkonte mendja për ndonjë hile më të madhe… Madje, edhe politikanët naivë, servil e hipokritë shkuan dhe ua uruan Bajramin krerëve të Bashkësisë Islame të Kosovës!

Gazeta "Express", e datës 3 janar, konstaton se "Kosova është i vetmi vend që ka shënuar Kurban Bajramin një ditë më herët se vendet tjera të Ballkanit". Kurse Kryeimami i Bashkësisë Islame, Sabri Bajgora, thotë se "secili shtet i ka rregullat e veta. Disa e caktojnë ditën e Kurban Bajramit në bazë të mendimeve të dijetarëve, e disa në shikimin e hënës". Kosova, sipas Bajgorës, "ka festuar së bashku me shtetet e Gjirit Arab, Arabia Saudite, Kuvajti, Egjipti, Siria, Jordania, etj.".

Nuk e kam të lehtë, por duhet të konstatoj se krerët e Bashkësisë Islame të Kosovës nuk e thanë të vërtetën (e thënë but) as në këtë shkrim të gazetës "Express". E para, Kosova nuk është i vetmi vend në rajonin tonë që e ka festuar Bajramin e Vogël të shtunën, më 30 dhjetor. Të njëjtën ditë Bajrami i Vogël është festuar edhe në Serbi. Ky Bajram është falur të njëjtën kohë në xhaminë e Sulltan Fati Mehmetit, në Prishtinë dhe në xhamin bajrakli në Beograd!! Prandaj do të ishte më e ndershme të thuhej se Kosova ishte i vetmi vend në rajon që e festoi Bajramin të njëjtën ditë me Serbinë!! E dyta, pajtohem me kryeimamin, Bajgora, i cili thotë se "secili shtet i ka rregullat e veta", por, meqë Kosova nuk është ende shtet, më duhet ta pyes Bajgorën: Rregullat e cilit shtet zbaton Bashkësia Islame e Kosovës? Zot na ruaj, por kësaj radhe po del se u zbatuan rregullat e Serbisë!! Besimtarët shqiptarë kërkojnë shpjegim nga kjo Bashkësi fetare dhe sidomos nga Naim Tërnava. E treta, zotërinj të Bashkësisë Islame, besoj se është koha e fundit që ju dhe çdo shqiptar, i cilit do besim qoftë, të kthehet kah qendra mbarëkombëtare, Tirana. Megjithëse të vonuar, si në të gjitha lëmit tjera, krerët e besimit islam të shqiptarëve duhet urgjentisht të mblidhen në një Kuvend mbarëkombëtar dhe të krijojnë një Bashkësi të vetme islame për kombin shqiptar, një islam për shqiptarët (me fytyrë, gjuhë, frymë, rroba dhe tradita shqiptare). E njëjta gjë vlen edhe për besimet e tjera të shqiptarëve. Populli, gjuha dhe qytetërimi më i vjetër në Evropë dhe botë e meritojnë këtë… Heshtja e inteligjencisë për këtë çështje nuk mund as të shpjegohet, as të arsyetohet… Yryshi i lloj-lloj sekteve fetare, ideologjive, kulturave, gjuhëve, arteve të huaja, etj. përbën kërcënim real dhe tepër serioz për kombin shqiptar dhe të ardhmen e tij të qetë e demokratike. Ky yrysh është edhe kundër dëshirës dhe vullnetit të Zotit që na krijoi shqiptarë. Kjo është dhurata më e madhe për ne, për popullin shqiptar. Prandaj, kemi detyrim hyjnor ta respektojmë vullnetin e Krijuesit...