Kosova në BE – Vetëm me sovranitet të Plotë

Shkruan: Ismet Hajrullahu

Qytetarët e Kosovës duhet ta dinë se duke iu mohuar e drejta e tyre për sovranitet të plotë, e drejtë që e gëzon çdo popull për të vendosur në mënyrë të lirë dhe të pavarur, Kosovës i pamundësohet praktikisht hyrja në çdo organizëm serioz euroatlantik.

Bashkimi Evropian është krijuar si një organizëm që synon t`i bashkojë të gjitha shtetet evropiane në një bashkësi te vetme, me qëllim që njerëzit, idetë dhe mallrat e tyre të qarkullojnë lirisht. Prandaj është plotësisht normal dhe i pranueshëm interesimi i shteteve të Evropës Lindore e veçanërisht i rajonit ton, për t`u anëtarësuar në këtë organizëm perspektiv. Nisur nga ky këndvështrim, pa dyshim që edhe synimi i qytetarëve shqiptarë të Kosovës është që sa më parë vendin e tyre ta shohin të integruar me dinjitet në Bashkimin Evropian dhe në të gjitha strukturat e tjera euroatlantike. Por, dëshirat zakonisht mbesin vetëm dëshira, nëse ato nuk jetësohen. Kosova, që të anëtarësohet në këta organizma, duhet patjetër t`i përmbushë disa kërkesa dhe kritere të BE-së që janë shumë të hollësishme dhe të gjithanshme. Për rrjedhojë institucionet e vendit do të duhej ta vendosin rendin juridik duke i harmonizuar ligjet me ato të Bashkimit Evropian, ta luftojnë pa kompromis korrupsionin, si dhe ta luftojnë me të gjitha mjetet krimin e organizuar.

Kosova dhe Bashkimi Evropian

Filozofia e vjetër dhe e re e “Grupit të Unitetit” që e ka katandisur vendin në një gjendje të mjerë dhe pa perspektivë politike, është pengesë kryesore që Kosova të mund futet me të drejta të plota në Bashkimin Evropian. Kusht thelbësor për t`u anëtarësuar në BE është të jesh shtet me sovranitet të plotë. Në këtë aspekt, kur kemi parasysh se çfarë afron “defteri” i Ahtisarit, Kosova as për së afërmi nuk i plotëson kërkesat për një shtet të pavarur dhe sovran. Qytetarët e Kosovës duhet ta dinë se duke iu mohuar e drejta e tyre për sovranitet të plotë, e drejtë që e gëzon çdo popull për të vendosur në mënyrë të lirë dhe të pavarur, Kosovës i pamundësohet praktikisht hyrja në çdo organizëm serioz euroatlantik.

Shtyrja e zgjidhjes së statusit të Kosovës, që për popullin deri dje do të thoshte pavarësi, ka bërë që qytetarët të ndërgjegjësohen dhe të zgjohen nga një gjumë letargjik. Edhe pse thuhet se faji është jetim, në këtë rast është e kundërta, sepse mashtrimi i popullit është bërë nga një klasë politike që ka ndjekur shkollën e Beogradit ....! Arsyetimi i tyre se Kosova mund ta fitojë pavarësinë nga Serbia për ta fituar një pavarësi të kushtëzuar nën BE, sa është naiv aq është edhe i rrezikshëm. Anëtarësimi i Kosovës në strukturat e Bashkimit Evropian ka kuptim vetëm atëherë kur Kosova integrohet në këto struktura si subjekt sovran dhe i barabartë. Në këtë vështrim edhe lufta e shenjtë UÇK-së, nuk u bë për t`i ndërruar padronët, por për pavarësi dhe sovranitet të plotë. Duke e shkelur këtë parim, dëmet që i kanë sjellë popullit dhe vendit negociatat me Serbinë janë të pallogaritshme.

Revolta e qytetarëve

Revolta e qytetarëve e drejtuar nga ithtarët e Vetëvendosjes, në Ditën e Flamurit, tregon që Institucionet dhe “Grupi i Unitetit “ duhet ta ndryshojë kursin për treqind e gjashtëdhjetë gradë ose duhet urgjentisht të japin dorëheqje. Institucionet e vendit nuk duhet të humbin kohë duke bërë llogari për “dëmet” e shkaktuara nga kjo revoltë, të cilat karshi dëmeve të negociatave me Serbinë, që i kanë sjellë Kosovës, janë të papërfillshme.

Kosova dhe populli janë para një momenti historik dhe vendimtar. Nëse nuk shfrytëzohën këto rrethana, bashkë me kohën do të ikë edhe treni i fundit historik. Dikur mund edhe të reagohet, por atëherë do behet shumë vonë, tepër vonë, për Kosovën dhe të ardhmen e saj, sepse momentet e këtilla historike nuk përsëriten në çdo vit dhe sa herë që duan politikanët tanë.

Pohimin e deputetit Emrush Xhemali, se protestat e 28 Nëntorit mund të duken lodra para asaj që mund të ndodhë në të ardhmen, institucionet, veçanërisht “Grupi i Unitetit”, duhet ta marrin me seriozitet. Qytetarët e Kosovës janë lodhur nga pritja, mashtrimet dhe eksperimentet e vazhdueshme që janë bërë deri më tani në kurriz dhe në dëm të Kosovës.