POSTMORTUM 1 (23 dhjetor 1989 – 9 dhjetor 2006)

Shkruan : Astrit Gashi

E sajuar më 23 dhjetor të vitit 1989, nga anëtarësia e LSPPJ-së dhe LKJ-së, si gjoja një lëvizje masive shqiptare kundër pushtimit serb, zaten kështu paraqitej para popullit. Ajo gjatë tërë ekzistencës së saj parazitare mbi kurrizin e popullit e ruajti formën e saj fillestare, ashtu siç u regjistrua dhe u legjitimua në Beograd, pra atë të lëvizjes së drejtuar nga njëshi i fortë, i shndërruar në mit pas vdekjes edhe fizike të tij dhe që sonte duhej
të zëvendësohej me një pinjoll besnik të tij. Kjo sajesë kishte fatin si të kryetarit të përjetshëm të saj që lindi dhe ndërroi jetë në dhjetor . Pse u kacafytën klanet mafioze brenda LDK-së, nuk mund të fajsojnë dikë tjetër, pos sëmundjes së saj kronike dhe vështirë të shërueshme, ndërsa epilogu dihet: Duhet eliminuar indet kanceroze brenda saj ose të pësojë një vdekje të turpshme politike, të ngjashme me vegjetimin e derisotëm të saj.

Pas një sëmundjeje të gjatë, më 9 dhejtor 2006, rreth orës 21.30, LDK pësoi një infarkt të rëndë dhe për pasojë kaloi në gjendje kome. Në këtë kohë përfunduan debatet dhe komunikimi me gojë në mes të delegatëve të Lidhjes Demokratike të Kosovës. Ata tani më janë kthyer në gjenezën e tyre dhe në orët e vona kanë filluar komunikim tjetër, atë me të cilin shërbeheshin qe shumë vite. Salla e Kuqe në Pallatin e Rinisë dhe të Sporteve në Prishtinë përnjëherë u përmbys dhe u shndërrua në një ring boksi harlemian dhe njëmend nga gjaku që rridhte nga turinjtë e delegatëve ldkist, si pasojë e dialogimit të tyre
“demokratik”, kjo sallë u bë edhe më e kuqe. Skena e krijuar nga gazi lotsjellës, që hodhi njësia speciale e SHPK-së, të kujtonte tetorin e vitit 97, kur polica sllave ndërhynte kundër studentëve të Universitetit të Prishtinës. Por, sot nëpër mjegullën e dendur të këtij gazi qëndronin “burrërisht” ata të cilët nuk i patën përkrahur këto protesta.

Është e ditur, se shkaktari kryesor i kësaj përleshjeje ishte klani fitues i zgjdhjeve, i cili kishte propozuar 70 emrat për anëtarë të mundshëm të Këshillit të Përgjithshëm, kurse pretekst i shpërthimit të mllefit të humbësve ishin 30 propozimet që u dhanë nga kryetarët e degëve të LDK-së. Doli prognoza e djaloshit të ardhur nga radhët e UÇK-së tani kreu i Partisë Demokratike të Kosovës, Hashim Thaçit, që kishte ardhur për t’u vardisur, mos helbete pas përfundimit të kësaj farse “demokratike” të LDK-së, do të krijonte koalicion qeveritar dhe do t’ia zinte vendin Agim Çekut, sepse, siç tha ai, “pa Ibrahim Rugovën jemi më të hendikepuar”.

Të pakënaqur nga kjo, krahu i Nexhat Dacit, demonstrativisht e lëshoi Kuvendin. Kështu vepruan një pjesë e delegatëve të Ferizajt, Gjilanit, Pejës, Vitisë, etj., dhe përfaqësuesit e mërgatës. Parashikimi i Thaçit doli më se i vërtetë kur Gani Geci po bënte be në zot, se askush nuk do të dalë të votojë për listën e propozuar dhe kur iu kundërvu ministri Veliu, duke iu drejtuar me fjalët, "hajt dil e ndalna" dhe kur Ganiu i përgjigjet shkurt: "Mshile gojën bre shpiuni i Ramë Marës". Prej këtij momenti në sallën e kuqe, filluan grushtimet dhe përplasjet e karrigeve mbi trupat e njëri-tjetrit e që për fatkeqësinë e tyre, nuk e kishin gjallë presidentin “mitik”, për të kërkuar ndaljen e këtij “debatimi demokratik” në Kuvendin zgjedhor të LDK-së. Legjenda thotë se pas çdo beteje bile një ushtar mbetet i shëndoshë. Kështu ndodhi edhe pas kësaj beteje “demokratike”, kur një delegat doli nga salla, duke u shprehur me mllef: "Presidentin Rugova s'e paska vrarë sëmundja, por këta njerëz, që paska pasur përreth".

Mund të shpresohet se një LDK-je sakate nuk do t’i bie ndërmend dhe as që do të jetë e aftë për të imponuar gjëra, si njëfarë “flamuri” dardan, himnin, gjuhën, kombin dhe fenë, ngase tani përfundimisht e kanë kuptuar, se e kanë humbur orientimin në hapësirë dhe kohë dhe, se duhet të luftojnë për te mbijetuar. Kjo çka e gjeti LDK-në, mund të konsiderohet se, përveç tjerash, është pasojë e mallkimit nga gjaku i derdhur nga dëshmorët dhe me siguri do t’ia zë frymën secilit që tenton të preke në Flamurin e shenjtë kombëtar. Duhet konstatuar, se i vetmi që nuk ishte në këtë farsë zgjedhore “demokratike”, ishte Albin Kurti, djaloshi me vizione të qarta për të drejtën e patjetërsueshme të popullit për Vetëvendosje, i cili edhe ka dhënë kushtrimin për mbrojtjen e kësaj të drejte. Besoj, se ky kushtrim do të bëhet lak në fyt edhe për simotra të LDK-së.

Në fund një këshillë për liderët e simotrave të LDK-së: Është në të mirën tuaj dhe të Kosovës që të konsultoheni me Lëvizjen Vetëvendosje ose përndryshe fat i tillë do t’ju përcjellë…