A ka zot shtëpie këtu?

Shkruan: Mehmet Bislimi

Një kalimtar rasti po thërret tek një shtëpi; Oooo, i zoti i shtëpisë, Oooo i zoti shtëpisë!

Pas pak doli një çunak.

Kalimtari po i thotë: Thirrma të zotin e shtëpisë or djalë!

Unë jam i zoti i shtëpisë- ia ktheu ai! Më pas doli një çunak tjetër ca më i rritur dhe tha:

Jo, unë jam i zoti i shtëpisë! Më vonë doli një djalë ca më i rritur se ata të dy dhe i tha:

Jo, unë jam i zoti i shtëpisë, nuk janë këta dy të parët! Se fundi, doli një mysafir që kishte qëlluar aty dhe po i thotë kalimtarit:

Lëri këta or burrë se unë vet jam zot shtëpie këtu!...

Kalimtari luajti kokën dhe ua ktheu:

Mor djem, kësaj shtëpia iu paska luajt e ëma me gjithë të zotin e saj!...

Përderisa shtetin e Kosovës e kanë njohur shtetet më të fuqishme të botës si SHBA- të dhe shumica e atyre evropiane, është jo pak kontradiktor dhe absurd fakti që misione të caktuara dhe të dërguara nga vetë këto shtete në Kosovë, sikur ngurrojnë të zbatojnë vullnetin e shteteve që ata përfaqësojnë, duke denigruar kështu edhe misionin diplomatik dhe paqësor të tyre!

Rasti më i freskët është kur shefi i EULEX-it, Gjenerali Yves de Kermabon deklarohet pa ngurrim se: “ Jemi në rrugë të mirë në bisedimet me Beogradin për vendosjen dhe shtrirjen e misionit të EULEX-it në territorin e Kosovës!”. Kermabon, mendon së me këtë mund të rekuperojë diçka më shumë se ç’kanë bërë paraardhësit e tij. Në fakt, ai më këtë veprim dhe me deklaratëne e tij pasuese vetëm sa rrit segmentet e caktuara konsistence përballë problemeve të shumta në Kosovë. Si duket gjenerali ka ngatërruar fushat e lëmisë ushtarake me ato të shërbimeve civile, të atyre që nga njëra anë lojalitetin e nënkuptojnë me bindje, nënshtrim dhe zbatim të urdhërave, nga ana tjetër ato relevanca nënkuptojnë kooperavitetin e bashkëpunimin e ndërsjellë. Kermabon me gjasë duhet që të reflektojë më shumë për misionin e tij i cili ka të bëjë me sferat dhe dimensionet më fundamentale të dialogut dhe organizimit të komuniteteve tona për të kapur realitetin e ri në Kosovë, jetën e re në një shtet demokratik. Roli i tij nuk është përcaktuar si tjetër pos për angazhim më të madh konsultativ, politik e institucional, gjithnjë në funksionin e vlerave etike, mbi parime të shëndosha këshillëdhënëse dhe konsultative, rol monitorues e mentorues etj.

Kermabon, sikur harron se të gjithë paraardhësit e tij të cilët kanë luajtur politikën e dyfytyrësisë kanë dështuar në Kosovë me akrobacionet e tyre politike. Që nga vendosja e misionit të UNMIK-ut dhe KFOR-it në Kosovë, janë vërejtur si bie fjala qëllimet enigmatike të Xheksonit që vendosi forcat ruse në aeroportin e Prishtinës, pastaj tendencat e Hakerupit për të devalvuar organet vendore, veprimet kundër vullnetit të popullit shumicë të Kosovës nga Shtaineri, nga Galluqit, të Rajnhardit, Huan Ortunjos,Kamerhoffit e të tjerëve që kaluan në misonet e tyre nëpër Kosovë duke përfunduar edhe me emrin e fundit të quajtur Zanier, kanë dështuar dhe kanë për të dështuar keq. Kosova është shtet i pavarur duhet ta dijë zoti Kermabon dhe për çdo që duhet biseduar dhe marrëveshur, duhet bërë në koordinim të plotë me udhëheqësit e këtij vendi i cili ka mandatin e këtij populli.

Nuk e di sa kuptim do të kishte që për të vendosur diçka për Francën tuaj, ju paraprakisht të merrnit pëlqimin e Anglisë! Këto janë dy shtete sovrane dhe nuk ka më përtej se ku të shkohet. Kosova dhe Serbia janë dy shtete - mësojeni këtë zotëri Kermabon dhe ju zoti Zanier, nëse nuk e keni mësuar deri me tani nga vendet tuaja që njohën dhe ndihmuan aq shumë për pavarësinë e këtij vendi. Këtë pavarësi e njohën madje edhe vetë shtetet fqinjë të rajonit e më gjerë si Mali i Zi dhe Maqedonia që ndoshta shumëherë kemi llogaritur se do të jenë nga fundi i listës së njohjes për shkak politikave antishqiptare të tyre të derisotme!

Kur ishin në pyetje shqiptarët, ju zotërinj të misioneve paqësore në Kosovë, kurrë nuk u treguat kaq të sjellshëm me ne dhe me tokat tona; i copëtuat ato dhe i dhuruat si plaçka tregu që nga viti 1912 e këtej, hoqët zonën mbrojtëse kokë me vete mes kufirit Serbi - Kosovë në gjerësi prej 5 Km. Ndryshuat kufirin mes Kosovës dhe Maqedonisë, dhe atë pas marrëveshjes së Kumanovës, duke krijuar kështu konflikte të reja, vratë mbi 11 shqiptarë të parmatosur tek ura e Ibrit! Forcat “paqësore” të Rumanisë, vranë dy të rijnë shqiptarë mu në mes të Prishtinës, as sot e atë ditë nuk e dha kush as më të voglën përgjegjësi!? Arrestuat dhe burgosët me dhjetëra ish pjesëtarë të UÇK-së anëekënd Kosovës, vendosët forcat tuaja për të ruajtur tokat që ua grabitët shqiptarëve për t’ua dhuruar më pas ato kishave serbe pa pyetur njeri, keni ndarë Mitrovicën pikërisht në qershor të vitit 1999 dhe atë pikërisht forcat franceze të atëhershme, i imponuat këtij populli kornizën kushtetuese që ishte në kundërshtim me luftën çlirimtare të popullit dhe vullnetit të tij, mbani hapur për sa vjet kufirin mes Kosovës e Serbisë duke mos penguar elmentet kriminale serbe që infiltrohen pa asnjë vështirësi në tokën e Kosovës, e shumë e shumë veprime tjera të këtilla. Të gjitha këto i bëtë pa treguar aspak modestinë për t'u konsultuar me të zotët e shtëpisë së këtij vendi, madje skajshmërisht mospërfillës ndaj çdo vendimi që shqiptarët kanë e mund të kenë marrë për fatin e vet!

Pikërisht në Mitrovicë nga komuniteti serb, ju keni pësuar edhe me plagosje e vrasje të ushtarëve tuaj paqeruajtës dhe po prapë sot, pa u skuqur fare deklaroheni se jemi në rrugë të mirë që të merreni vesh me Beogradin për të shtrirë misionin e EULEX-it në Kosovë!

Kjo reflekton një mesazh tepër të zymtë dhe anemik për politikën dhe misionin paqësor e ligjor që përfaqësoni ju, aq më keq, populli i Kosovës po ndihet edhe më i fyer nga pazotësia e juaj për të vurë në vend detyrën të cilën ju e keni marrë mbi supet tuaja si duket të brishta për t’i dalë në fund misionit të EULEX-it!

Atakimi i fundit që Rusia "Cariste" e Putinit bëri kundër sovranitetit të Gjeorgjisë dhe çjerrjet histerike e kërcënimet e Beogradit kundër Malit të Zi dhe Maqedonisë, treguan më së miri mentalitetin, njëmendësinë dhe pozicionin e shteteve grabitçare, prandaj nuk e di sa ia vlen që misionin e shteteve të Evropës ta veni në pozitë aq të ulët sa është niveli i vrasësve siç është shteti serb që me konsekuencë nuk pendohet për krimet e saja ndaj Kosovës. Me përulje ndaj Serbisë, ju po veni në dyshim funksionalitetin misionit tuaj në tërë territorin sovran të shtetit të Kosovës. Tani së fundi edhe Krahina Autonome e Vojvodinës me plotë të drejtë (me shumicë votash) tregoi duke votuar statutin e ri që hap dyert për pavarësimin e vendit të saj të shpejtë. Uroj që kjo të ndodhi sa më shpejt pêr hir të lirisë dhe çlirimit të një barre historike që mban Serbia për gjenocidin e ushtruar mbi popujt e Ballkanit.

Evropa me lëpirjet dhe neglizhencën e saj tradicionale karshi Serbisë, duke mbajtur qëndrim tepër oportun e kundërshtues, nuk e votoi rezolutën në KS e cila do të vendoste misionin e saj në Kosovë, duke abrogua administratën e UNMIK-ut dhe rezolutën 1244 e cila në fakt vetëm sa ka zgjatur apatinë në Kosovë, madje ka mbajtur po aq qëndrim apatik për rikonfigurimin e kësaj administrate. Me këtë qëndrim, sikur është ngatërruar edhe më lëmshi i misionit të vet EULEX në Kosovë. Pra, nuk është saktësuar e sanksionuar se në raport me funksionalitetin e disa misioneve përnjëherësh si do të veprohet, kush kujt do t’i japë llogari, kush pi e kush paguan?! Në Kosovë në të njëjtën kohë dhe hapësirë të veprimit të organeve vendore, do të veprojnë forcat e KFOR-it, administrata e UNMIK-ut dhe ajo e EULEX-it! Këto misione nuk po i japin e nuk do t’i japin llogari njëra- tjetrës, kështu zoti Zainer po përpiqet për dialog të ri mes Beogradit e Prishtinës dhe më shumë qëndron në Beograd se sa në Prishtinë (anipse kjo vjen si kofini pas të vjelave), ndërkaq zoti Kermabon, në një rrafsh tjetër, bisedon me Beogradin për shtrirje të misionit të tij në tërë territorin e Kosovës!

A ka në fakt zot shtëpie në Kosovë, dhe nëse ka, a po bisedon kush me ta?!

20. 10. 2008