Misioni impossible i Mustafajt në Kosovë

Shkruan Xhevat Bislimi

Besnik Mustafa kësaj radhe kishte një mission tjetër nga ai i diplomatit dhe ministrit për punët e jashtme. Ai ishte ngarkuar nga Kryetari dhe Kryeministri i tij, zoti Berisha, dhe nga ndonjë vend evropian me një mision impossible: Pajtimin e dy krahëve të LDK-së. Në shikim të parë, shqiptari i zakonshëm i Kosovës, vizitën tri ditëshe të Ministrit të Jashtëm mund ta ketë kuptuar si një dashuri të këtij njeriu për Kosovën! Mirëpo, shumë shpejt u kuptua se misioni i tij ishte ripajtimi i Fatmirit dhe Dacit… Mirëpo, meqë pajtimi i dy krahëve ishte i pamundur, Besniku, provoi t’i pajtonte dy shqiptarë që tashmë nuk janë në jetë: Adem Jasharin dhe Ibrahim Rugovën. I pari, luftëtar dhe atdhetar i paepur për çlirimin dhe bashkimin e tokave të pushtuara të Shqipërisë (Kosovës me viset tjera shqiptare) me një flamur të vetëm kuq e zi, Hero i Kombit shqiptar, Komandant Legjendar, lufta, qëndresa dhe rënia e të cilit përbëjnë rast unik jo vetëm ndër ne, por edhe në botë. Ndërsa, i dyti, ishte njeri i zakonshëm. Në rrethana të caktuara, që i dimë dhe njohim të gjithë, u bë kryetar i një partie pacifiste me tendenca të fuqishme kolaboracioniste... Pas Luftës Antipushtuese Çlirimtare të UÇK-së, nga institucionet e përkohshme u zgjodhë Kryetar i Kosovës së sunduar dhe udhëhequr nga UNMIK-u. Ai kishte çelësat e kashtës… U përpoq që shqiptarët e Kosovës t’i bëjë “kosovarë” me një “flamur” joshqiptar, por dështoi… “Sakrifica” më e madhe e tij ishte vetizolimi dhe vetëngujimi për shumë vite, vecmas pas Luftës!! Vdiq si të gjithë njerëzit që vdesin në shtrat nga sëmundja a pleqëria.

Ministri i Jashtëm, Besnik Mustafai, njihet në Kosovë si njeriu që u angazhua për një Kosovë me pavarësi të kushtëzuar dhe multietnike!! Ky Ministër, në një takim që pati me Ministrin serb, Drashkoviç, e garantoi atë se Kosova nuk do të jetë shtet shqiptar!! Edhe këtu në Prishtinë Besniku u mundua të na e mbushte mendjen se Kosova nuk është shqiptare, por multietnike! Të paktën në Ballkan, zoti Besnik, nuk ka krahinë më kompakte në aspektin e përbërjes kombëtare. Mbarë bota (edhe diplomatët e huaj) na quanë shqiptarë. Ne nuk mohojmë se në Kosovë jetojnë edhe pakica të tjera, të cilatë i njohim dhe nderojmë me të gjitha veçoritë e tyre, por këto pakica nuk ia ndërrojnë karakterin shqiptar Kosovës. Prandaj, angzhimi për shpikjen dhe krijimin e një “Kosove multietnike” përbënë dhunë të pastër mbi karakterin shqiptar të Kosovës… Por, për Ministrin me multiqëndrime kombëtare dhe politike kjo është “normale” dhe mbase edhe “mision”… Ministri i Berishës Kosovën e quan vend fqinj të Shqipërisë?! Jo zoti Ministër, Kosova ishte, është dhe do të jetë përjetë pjesë e pandashme kombëtare, gjeografike, historike, gjuhësore, kulturore, shpirtërore, etj. e nocionit më të ëmbël dhe më të bukur në botë (për çdo shqiptar), nocionit, SHQIPËRI. Vullnet i përbotshëm i shqiptarëve të kësaj krahine dhe krahinave tjera shqiptare ishte dhe mbeti ribashkimi i Shqipërisë. Kjo ishte dëshirë dhe vullnet edhe i Natyrës ose Zotit. Kundër këtij vullneti nuk mund të dal askush dhe asnjë shqiptar… Këtë proces të natyrshëm dhe demokratik nuk do ta pengojnë as vendet e qytetëruara dhe demokratike. Më në fund, zoti Ministër, edhe Franca (me sa duket Besniku nuk e paska dëgjuar) e tha në Këshillin e Sigurimit se “statusi i Kosovës duhet të jetë i pranueshëm për shumicën e popullit të Kosovës”. Këtë deklaratë të përfaqësuesit të Francës, këtë përparim të saj në çështjen e Kosovës, sigurisht që e përshëndesin shqiptarët dhe e kuptojnë si një mesazh që i hap rrugë miqësis shqiptaro-franceze… Franca dhe shumë vende me traditë demokratike tashmë e kanë të qartë se ribashkimi i shqiptarëve në një Shqipëri Natyrale është interes edhe për Serbinë dhe kombet tjera në rajonin e Ballkanit e më gjerë. Shpresojmë që këtë të vërtetë ta kuptoj edhe Besniku dhe Kryetari e Kryeministri i tij dhe të angazhohen për jetësimin e kësaj të vërtete...