«Rruga» e Shqipërisë Natyrale

Shkruan : Koço Danaj

Është një titull me kuptim të trefishtë.Por gjithsesi është një imperativ që ngrihet mbi çdo lloj interesi partiak, mbi çdo lloj zgjedhjesh dhe që kapërcen të gjitha grindjet dhe sherret politike

Shqiptarët e dinë se BE dhe SHBA nuk pranon kombe mitesh, por kombe të gjallësh

Kuptimi i parë ka të bëjë me rrugën që duhet ndjekur për sendërtimin e Shqipërisë Natyrale. Që do të thotë se krahas politikës dhe diplomacisë publike, shqiptarët po mësojnë gjithmonë e më mirë të aplikojnë politikën dhe diplomacinë reale. Qarkullimi i lirë i njerëzve dhe ideve po sjell në mënyrë të natyrshme edhe largimin nga folkpatriotizmi, por edhe afrimin tek identiteti i përbashkët kombëtar. Shqiptarët nuk kanë më nevojë për mite dhe legjenda për të ruajtur identitetin e tyre kombëtar. Këtë ata po e bëjnë nëpërmjet njohjes reale, kulturës reale, gjuhës reale, politikës reale dhe ndjenjave reale. Ky është një proces i pakthyeshëm. Eshtë progresiv dhe europeist. BE nuk pranon popuj mitikë, por popuj reale. Nuk pranon kombe legjendash, por kombe reale. Nuk pranon shtete që ekzistojnë vetëm në këngë, por shtete që ekzistojnë realisht dhe kontribuojnë realisht. Dhe shqiptarët duke e njohur mire këtë kërkesë të BE, janë nisur në rrugën e pakthyeshme të Shqipërise Natyrale. (Sa larg është politika shqiptare e sotme nga vetëdija kombëtare shqiptare. Politika shqiptare ka mbetur tek ODIHRI ne Vienë, ndërsa vetëdija kombëtare e shqiptarëve ka shkuar tek BE dhe SHBA në Uashington dhe Bruksel)

Rruga që «zvogëlon Shqipërinë e Madhe»

Ndërsa kuptimi i dytë ka të bëjë me një rrugë konkrete që do të lidhë Shqipërinë me një nga pjesët kryesore të saj, Kosovën. Kjo rrugë ka filluar të ndërtohet. Duket se kjo do të jetë «Rruga» e Shqipërisë Natyrale. Nuk ka rëndësi se si po quhet sot, nuk ka rëndësi se kush financion. Nuk ka rëndësi kush e nisi dje, kush e vazhdon sot dhe kush do ta përurojë nesër. E rëndësishme është se kjo rrugë do te zvogëlojë figurativisht dhe realisht Shqiperinë e Madhe dhe do të jetë pararoja e Shqipërisë Natyrale.

Po përse do ta «zvogëlojë Shqipërinë e Madhe»? Po ja përse? Të gjithë e dinë se sa qindra kilometra duhet të përshkosh sot nga Durrësi për të shkuar në Kosovë. Dhe përsëri të gjithë duhet ta dinë se sa do ta zvogëlojë kjo rrugë distancën nesër.

Stabiliteti i Ballkanit kalon nga Tirana

Dhe kuptimi i tretë ka të bëjë me atë se në të ardhmen e afërt, stabiliteti i Ballkanit Perëndimor në mënyrë figurative do të kalojë nga Tirana. Përse vallë ?

Duket se zhvillimet gjeopolitike po çojnë në një rinkonfigurim të hartës së Ballkanit Perëndimor në të ardhmen. Pa e emërtuar si të tillë, pra rikonfigurim, është një proces që po ndodh. Fuqitë e mëdha janë duke riparuar gabimet e së kaluarës. «Riparimi» i Versajës, duket se do të shoqërohet me «riparimin» e Londrës. Ky është realiteti, pavarsisht se mbulesa e tij politike quhet integrim. Shtyrja e pranimit në BE të 5 shteteve të Ballkanit Perëndimor, ka të bëjë me këtë rikonfigurim të hartës së rajonit.

Ka edhe një fakt tjetër që e bën më të dukshëm dhe më të besueshëm këtë rikonfigurim. Kush është ky fakt? Fakti ka të bëjë me nervozizmin e politikës dhe diplomacisë së Greqisë që po shfaqet kohët e fundit. Rrallë herë ka qënë kaq nervoze politika dhe diplomacia greke sa të hapë sherre me të gjithë fqinjët e saj. Ajo sot hap sherre me Shqipërinë duke përdorur dyshtetësinë apo ceshtjen came, apo varret e ushtarëve greke. Ajo eshte ne sherr me Maqedonine duke ngulur kembe ti heqe emrin. Ajo eshte ne sherr me Turqine. Janë këto sherre që flasin për nervozizimin e saj. Nuk kemi të bëjmë me nervozizëm rastësor, naiv apo te castit. Politika dhe diplomacia greke është e zgjuar. Dhe duke qënë e tillë, ajo e ndjen rikonfigurimin e Ballkanit Perëndimor. Ajo e ndjen se në këtë rikonfigurim, Shqipëria Natyrale do te jete ne epiqëndër të rajonit dhe ekuilibri i këtij rajoni.

Sot Shqipëria aktuale eshte nje nder faktoret kryesore të eleminimit të konflikteve në rajon. Nesër Shqipëria Natyrale do të jetë faktori kryesor i stabilitetit dhe paqes në Ballkan. Prandaj pohimi se stabiliteti i Ballkanit do të kalojë nga Tirana është i saktë, i pranueshëm, ashtu siç do të jetë edhe i meritueshëm.