Ata që dhunuan, uzurpuan dhe vandalizuan vullnetin e popullit të Kosovës akuzojnë demonstruesit dhe “Vetëvendosjen”

Shkruan Xhevat Bislimi

Një shpërthim i paparë mllefi, sulmesh, denoncimesh dhe akuzash për demonstratën e këtij 28 Nëntori dhe për organizatorët e saj. Tamam sin ë kohën e “komunizmit” (pushtimit serb)! Politikanë, zyrtarë dhe zëdhënës institucionesh dhe partish, por edhe shumica e mediave të shkruara dhe elektronike shpërthyen si në kor kundër “Vetëvendosjes”, Albin Kurtit dhe popullit që demonstroi dhe manifestoi fuqishëm pakënaqësinë dhe kundërshtimin ndaj Grupit negociator (“elitës” politike), ndaj institucioneve kukulla të Kosovës dhe kundër atij që ka grabitur sovranitetin e popullit të Kosovës, UNMIK-ut. Se kush është “dirigjenti” i këtij kori të turpshëm, që derdh lotë krokodili për demokracinë, mund të merret me mend nga lexuesi shqiptar… Këtij kori qyqarësh iu bashkua edhe një “përfaqësues” i KMLDNJ-së, që pretendon se mbron liritë dhe të drejtat e njeriut, por nuk çan kokën për liritë dhe të drejtat e shqiptarëve!

“Festë vandale”, “dhunë revolucionare”, dhunë ndaj institucioneve vendore dhe ndërkombëtare”, “vandalizim i institucioneve dhe pasurisë publike”, etj., çirrej kori i dirigjuar mirë. Kështu u cilësua demonstrata popullore dhe organizatorët e saj nga shumica e mediave të shkruara në gjuhën shqipe nga dora e atyre që nuk menduan asnjëherë shqip… Kështu u cilësua demonstrata nga ata që flasin në gjuhën tonë shqipe, por që financohen dhe drejtohen nga ata që mendojnë në gjuhë të tjera… Kështu u shkrua dhe u folë nga mediat e atyre që janë të përfshirë në bisedimet e turpshme me Serbinë, u bënë deklarata dhe kualifikime të këtilla nga “politikanë” që janë bërë zëdhënës dhe sinonim të copëtimit të Kosovës në emër të “zemërgjerësisë”, ata që me tokën shqiptare të Kosovës bënë pazare me Serbinë sikur ta kishin tokën e babës… Kualifikimet dhe fushata e këtillë histerike ndaj të drejtës elementare për protestë përbëjnë rrezik dhe kërcënim real për demokracinë e brishtë në Kosovë. Përpjekjet për ndërtimin dhe fuqizimin e një “uniteti” monist në Kosovë janë përpjekje për t’i zënë frymën pluralizmit dhe të drejtës për të menduar, folur, shkruar dhe vepruar ndryshe nga “elita” politike. Ata që dhunuan të drejtën dhe vullnetin e popullit shqiptar të Kosovës për vetëvendosje, jetë të lirë dhe vetëqeverisje, ata që nxorën në tregun e Vjenës tokën dhe të drejtat e Kosovës, ata që bënë rrush e kumbulla ekonominë dhe pasurinë e Kosovës, ata që po shpërdorojnë dhe vjedhin bugjetin e Kosovës morën “guximin” dhe gjetën fytyrë të akuzojnë dhe denoncojnë ata që demonstruan (mbi dhjetë mijë vetë) dhe organizatorët e tyre për “vandalizëm”, “dhunë ndaj pronës publike”, “dhunë ndaj institucioneve të zgjedhura nga populli”, e xhevahire të tjera që mund të dalin vetëm nga goja e atyre që mendojnë se janë vetë populli, vetë demokracia, vetë liria, vetë…, duke besuar se këto vlera të mëdha të njerëzimit u takojnë vetëm atyre dhe se vetëm ata janë kandari që i mat ato… Lavdi marrëzisë dhe marries së tyre!