Në Viti u themelua Shoqëria Shqiptare “28 Nëntori”

Shkruan Kastriot Vishi

Me nismën e disa të rinjve dhe të rejave në Viti u themelua Shoqëria Shqiptare “28 Nëntori”. Shpallja e themelimit të saj u bë në një tubim të organizuar për nder të festave të 28 Nëntorit në mjediset e restoranit “Drenica”. Të ftuar në këtë tubim ishin të gjithë përfaqësuesit e shoqatave të UCK-së dhe të shoqatave të tjera të kësaj komune, përfaqësuesit e partive politike dhe të mediave. Në këtë tubim ishin ftuar dhe morën pjesë edhe një “grup” pleqësh plisëbardhë. “Drenica” ishte e vogël për të gjithë ata të rinj që kishin dëshirë t’i bashkoheshin tubimit dhe të festonin me Shoqërinë e sapothemeluar, “28 Nëntori”… Në këtë tubim u paraqitë edhe Kryesia (nëntë anëtarë) e Shoqërisë. Kryetare u zgjodhë Sarandë Salihu, maturante, nënkryetarë Lumturie Pira, studente dhe Ilir Bejta student, sekretar Palë Dema, student dhe arkëtar, Rexhep Bislimi, student. Të rinjtë dhe mysafirët i argëtuan dy shoqëri muzikore nga kjo komunë. Për qëllimet e kësaj Shoqërie për lexuesit po japim të plotë fjalimin e Kryetares së kësaj Shoqërie:

Të nderuara familje të dëshmorëve, veteranë të Luftës Antipushtuese-Çlirimtare të UÇK-së, përfaqësues të institucioneve, të partive politike, të shoqatave, të mediave dhe ju të gjithë të pranishmit e këtij tubimi,

Sonte, bashkë me ju, jemi mbledhur të shënojmë dhe festojmë datën më të madhe të kombit shqiptar, 28 Nëntorin, dhe festat kombëtare që lidhen me këtë datë të shenjtë për shqiptarët: Kthimin e Gjergj Kastriotit në Krujë, Shpalljen e Pavarësisë së Shqipërisë ose Ditën e Flamurit, Çlirimin e shtetit shqiptar më 1944, Shpalljen e UÇK-së dhe Ditëlindjen e Komamandantit Legjendar, Adem Jasharit. Prandaj, urime festat e 28 Nëntorit të lavdishëm!

Sonte, rini e dashur dhe ju mysafirë, jemi këtu edhe për t’i kujtuar dhe nderuar të gjithë ata që u përpoqën, vepruan dhe luftuan me penë e me pushkë në dorë duke rënë në altarin e lirisë. Ata ranë për t’i dhënë gjak me gjakun e tyre Flamurit shqiptar, ranë për t’i dhënë jetë me jetën e tyre popullit më të lashtë në Evropë, popullit shqiptar. Prandaj, lavdi në jetë të jetëve dëshmorëve të kombit shqiptar!

Sonte, të dashur bashkëkombës dhe bashkëqytetarë, po shpallim para jush edhe themelimin e Shoqërisë Shqiptare “28 Nëntori”, e cila është krijuar me nismën e të rinjve të komunës sonë. Krijimi i kësaj Shoqërie erdhi si nevojë dhe dëshirë e ne të rinjve për të dhënë ndihmesën tonë modeste në zhvillimin dhe fuqizimin e mëtejmë të ndjenjës së dashurisë, bashkimit, mirëkuptimit dhe solidaritetit me njëri-tjetrin. Në botën e qytetëruar shoqëritë ose shoqatat përbëjnë qelizën e demokracisë dhe të demokratizimit të shoqërisë.

Gjeografia e copëtuar e kombit tonë ka prodhuar dhe po prodhon edhe sot tendenca dezintegruese në fushën shpirtërore, gjuhësore, kulturore, etj. të kombit tonë. Kjo ishte dhe është arsye e mjaftueshme që të krijohen kudo shoqëri me tendenca unifikuese të kombit tonë shqiptar dhe të vlerave të tij shpirtërore, gjuhësore, artistike, historike, gjeografike, etj.

Në këtë kuptim dhe në shërbim të kësaj ideje madhore edhe Shoqëria jonë, “28 Nëntori”, në themele të saj do të ketë kontributin për përhapjen, nxitjen dhe thellimin e dashurisë, nderimit dhe përkushtimit për gjuhën, kulturën, traditën, artin, muzikën, letërsinë, gjeografinë dhe historinë mbarëshqiptare, si një ndihmesë me vlerë në realizimin e synimeve kombëtare. Qëllim tjetër themeltar i Shoqërisë sonë është edhe angazhimi dhe përkushtimi ynë që 28 Nëntori të jetë gjithmonë në krye të festave tona kombëtare dhe fetare dhe si i tillë të përjetohet dhe festohet nga çdo familje dhe nga çdo shqiptar. Shoqëria jonë do të përdor të gjitha format dhe mjetet demokratike për realizimin e qëllimeve të saj. Veprimtaria e Shoqërisë “28 Nëntori” do të shtrihet kryesisht në territorin e komunës sonë, por ajo ka anëtarë dhe përkrahës të saj edhe nga mërgimtarët tanë në Francë, Itali, Gjermani, etj.

Drejtuesit, anëtarët dhe mbështetësit e Shoqërisë “28 Nëntori”, për realizimin e qëllimeve të tyre do të bashkëpunojnë dhe do të jenë në krah të të gjithë atyre që kanë pikëpamje dhe qëllime të njëjta me këto tonat.

Ne respektojmë të drejtën dhe përcaktimin politik, fetar, ideologjik, etj. të secilit shqiptar, por ne konsiderojmë se mbi të gjitha jemi shqiptar dhe duhet të angazhohemi për një komb, një atdhe, një flamur dhe një gjuhë. Këto janë shtyllat që mbajnë edhe sot kombet bashkëkohore. Tendencat për dobësimin e ndonjërës prej këtyre shtyllave janë përpjekje për dobësimin dhe çintegrimin e kombit tonë. Nëse flasim me gjuhën e fetarëve do të thoshim se këto përpjekje janë edhe kundër dëshirës dhe vullnetit të Zotit, i cili me fuqinë e tij mund të na krijonte që me kohë anglezë, gjerman, arabë, turq, grekë, etj., por na krijoi shqiptarë dhe vetëm të këtillë na do dhe na pranon. Kushdo që i drejtohet dhe i lutet atij, Zotit, në gjuhë tjetër është kundër dëshirës dhe vullnetit të tij. Prandaj, ta nderojmë dhe ruajmë si sytë e ballit vlerën e shenjtë, gjuhën shqipe, ta ruajmë dhe nderojmë Flamurin, historinë, kulturën dhe traditën tonë të lashtë dhe të bukur shqiptare. Mbarë bota sot e njeh dhe pranon se gjuha shqipe është prej gjuhëve të para në botë. Gjuhëtarë dhe studjues botëror sot pranojnë se vetëm me gjuhën shqipe shpjegohet emri Adam ose Adem, që ka kuptimin, Atë dhe Ëmë ose Amë. Na del se shqiptarët dhe gjuha e tyre shqipe janë populli i parë dhe gjuha e parë e krijuar dhe e njohur nga Zoti. Ta njohim dhe nderojmë edhe ne bijtë e këtij populli dhe të kësaj gjuhe si të këtillë, siç e krijoi dhe e njohu Zoti.

Vetëm ata që njohin dhe nderojnë veten e tyre mund të presin të jenë të njohur dhe të nderuar nga të tjerët. Njohje dhe nder për të gjithë, por vetëm pasi të njohim dhe respektojmë veten tonë, vlerat dhe traditën tonë. Imitimi i të tjerëve në veshje, gjuhë, sjellje, muzikë, art, etj., jo vetëm që është në kundërshtim me dëshirën dhe vullnetin e Natyrës ose të Zotit, por na bënë edhe qesharak, dordolecë e majmunë... Në përpjekjet për realizimin e qëllimeve të Shoqërisë sonë kërkojmë edhe përkrahjen e shkollës shqipe, të partive, klerit, shoqatave dhe të çdo shqiptari të komunës sonë.

Pra, sipas nesh, gjuha, kultura, politika, ekonomia, feja, letërsia, arti, mediat, etj. duhet të jenë në shërbim të dëshirës, përpjekjeve dhe luftërave shekullore për bashkimin shpirtëror, kulturor dhe fizik të kombit dhe atdheut tonë, Shqipërisë Natyrale. Për këtë qëllim ne do të përpiqemi të mbjellim në çdo familje dhe në çdo zemër shqiptare nga një lule që bie erë dashurie për gjuhën, gjakun, atdheun dhe flamurin shqiptar. Vetëm si komb i integruar ose bashkuar mund të integrohemi ose bashkohemi me popujt tjerë evropian, me Evropën e Bashkuar.

Fjalën time po e mbyll me disa rreshta të shkruar nga shqiptari i njohur, Ukshin Hoti, i vrarë dhe i zhdukur nga forcat policore dhe ushtarake fashiste serbe. “Populli shqiptar duhet të bashkohet, deklaronte Ukshin Hoti në gjykatën pushtuese serbe. Bashkimi i popullit shqiptar dhe i tokave shqiptare në një shtet është parakusht për çfarëdo rregullimi të marrëdhënieve ndërkombëtare në këtë pjesë të Ballkanit... Bashkimi i popullit shqiptar është një e drejtë e tij historike, imperativ i kohës, është fati i tij historik. Ai duhet të ballafaqohet me fatin e tij politik, pa asnjë dyshim, në çfarëdo mënyre qoftë, dhe ai do ta bëjë këtë!

Këtë e dinë të gjithë dhe kjo më nuk kontestohet!... Ai duhet të bashkohet për shkak se është i bashkuar në planin shpirtëror, ka një gjuhë, një kulturë dhe një histori... Populli shqiptar duhet të bashkohet edhe sipas të drejtës për vetëvendosje, njërës prej vlerave më të rëndësishme të civilizimit evropian, të cilin Evropa e ka reklamuar dhe nuk mund t’ia mohojë e shkurtojë asnjë populli...”

Rroftë populli shqiptar! Rroftë 28 Nëntori! Rroftë Shqipëria Natyrale!