Politikë « kungulleshkash » me Kosovën

(Analizë e vitit 2002, nga Koço Danaj)

Është një analizë e shkruar në vitin 2002. Megjithë avancimet e problemit të Kosovës, duket se politika e kungulleshkave ndaj saj vazhdon akoma. Për këtë arsye, ribotojmë analizën Politikë Kungulleshkash me Kosovën.

Redaksia

Është tipike politike “kungulleshkash” politika që po luhet me të ardhmen e Kosovës. Termi politik i kësaj sjelljeje quhet cinizëm. Ndërsa termi qytetar quhet tallje. Për të qenë më « diskrete » para opinionit masiv, po përdorim termin politik « Cinizëm ». Duke qenë se jo të gjithë e dinë peshën emocionale të këtij termi, nuk kemi frikë se mund të zemërojmë opinionin masiv, por njëkohësisht nuk mund të na akuzojnë për « nacionalizëm ».

Po pse është politikë « kungulleshkash” politika ndërkombëtare ndaj Kosovës?. Le t’i marrim gjërat me radhë :

Kungulleshka e parë : Kur do diskutohet statusi përfundimtar i Kosovës ?

Pas shtatë vjetësh thotë Shtajneri në Gjermani do flitet për statusin e Kosovës. Jo shtatë i përgjigjet Rasim Lajiçi nga Beogradi. Po sa ? Në vitin 2005, pas tre vjetësh. As tre as shtatë thotë Batiçi. Po sa? Pas dhjetë vjetësh. As tre as shtatë, as dhjetë, thotë Svilanoviçi. Po sa? Pas 10 apo 15 vjetësh. As 3, as 7, as 10, përgjigjet Brukseli dhe OKB-ja. Po sa? Akoma nuk e kemi vendosur. E dimë ne.

Ndërsa në Kosovë qytetarët jetojnë me kujtimet e bukura të pas qershorit të 99-ës dhe ankthin e pas 2002-shi !!!!

Kungulleshka e dytë : Cili do jetë Statusi përfundimtar i Kosovës?

Ka dhjetë variante që duhet të hidhen në tavolinë thotë Instituti Amerikan i Paqes. Jo dhjetë i përgjigjet Gjingjiç nga Brukseli. Po cili? Ua them unë vazhdon Gjingjiç ; Kosova duhet të zgjedhë : Ose Europën, ose pavarsinë. ( A thua se në Europë, nuk ka shtete të pavarura). As njëra as tjetra, ja pret Solana nga Brukseli. Po cili ? Të gjitha variantet janë në tavolinë, ta shikojmë më vonë. Nuk jemi dakord thonë hartuesit kushtetutës së re Serbi-Mal i Zi. Po cili pyesin në kor Instituti i paqes, Gjingjiçi dhe Solana. Kosova pjesë e Serbisë, ky është varianti, prandaj e kemi futur edhe në Preambulë. Jo thotë Bajram Rexhepi nga Prishtina. Po cili ? Ka vetëm një variant, do shpallim pavarësinë. Po “Tirana politike” ? Eh, « Tirana politike » është në hall, kujt t’ja prishë dhe kujt t’ja ndreq. Ajo nuk flet siç mendon, por deklaron siç i thonë. Në këtë çështje ndërgjegja politike e Tiranës është e injektuar, nuk është e formuar. Prandaj Tirana Politike më shumë mendon si të rregullojë fjalitë e deklaratave për shtyp, se sa të mendoje realisht. Dhe loja e kungulleshkave vazhdon me dhjetëra e dhjetëra variante.

Ndërsa në Kosovë, Ibrahim Rugova nuk ka të drejtë as edhe Bob Dolin ta caktojë « ambasador nderi », se nuk e lë Shtajneri.

Kungulleshka e tretë : Kush do vendosë për statusin e Kosovës?

Për Statusin e Kosovës, do vendosë Brukseli dhe Këshilli i Sigurimit thotë Solana nga Brukseli. Jo i thotë Lajiçi nga Beogradi: Po kush? Për statusin e Kosovës do vendosë trekëndëshi Beograd-Prishtinë-Bashkësi ndërkombëtare. E kini gabim thotë Bajram Rexhepi i pamësuar me “kungulleshken” e politikës. Po kush? “Nëqoftëse ju njihni preambulën, ne do shpallim pavarsinë”. Në asnjë mënyrë ia kthen Shtajneri i nervozuar. Po kush? As Beogradi dhe as Prishtina, do vendosë vetëm Këshilli i Sigurimit, domethënë, që nga SHBA dhe Rusia deri tek Senegali dhe Siria që janë anëtarë të Këshillit të Sigurimit.(Rikujtesë: Presidenti Klinton kur dha urdhër për bombardimin e ish-Jugosllavisë nuk e pyeti fare Këshillin e Sigurimit). Po Shqipëria? Cila Shqipëri thonë të gjithë në një zë? Shqipëria na duhet kur ka kriza dhe trazira tek shqiptarët në Kosovë, Maqedoni, Mal të Zi dhe Luginën e Preshevës. Kjo është detyra e Shqipërisë. Pas trazirave, Qeveria e Shqipërisë nuk duhet të trazohet në këto çështje, jo për gjë, po pse ta akuzojnë kot se e ka mendjen tek “Shqipëria e madhe”. Ata na duhen vetëm për të shuar trazirat, jo për të projektuar të ardhmen pas trazirës. Ata vërtetë janë shqiptarë, por politikisht janë të dërguarit tanë të “posaçëm” tek shqiptarët.

E shumta qeveria e Shqipërisë duhet të japë vetëm mendime në forumet etnike të Allen Kasofit dhe t’i japë përgjigje pyetjes : Përse tre forume që nga Budapesti, Athina dhe Lucerna kanë të njëjtën temë : “Shqiptarët dhe fqinjët e tyre në rajon”!!? Prandaj lëreni Shqipërinë dhe qeverinë e saj.

Dhe loja e kungulleshkave vazhdon me shoqëri multietnike, demokraci multietnike, me shtet-komb, me traktatin e Vestfalisë etj etj, një lojë pambarim.

Ndërsa në Kosovë, varfëria është masive, në Kosovë janë 43% të papunë, në Kosovë 613 mijë qytetarë protestuan ndaj « lojës së kungulleshkave », duke braktisur zgjedhjet, në Kosovë shpresa e së djeshmes është zëvëndësuar nga ankthi i së nesërmes.