Misioni i (pa)drejtësisë

"Më trim e më i fortë është ai që lufton kundër padrejtësisë, sesa ai që bën padrejtësinë". Barleti

Shkruan : Kushtrim Gashi

Me sistemin e organeve të  drejtësisë, përkatësisht me sistemin e drejtësisë kuptojmë një sistem të veçantë organesh  dhe institucionesh shtetërore, që organizohen dhe funksionojnë jashtë organeve përfaqësuese dhe organeve ekzekutive e të administratës, të cilat ushtrojnë pushtetin gjyqësor si veprimtari shtetërore  dhe dallohen për nga format dhe metodat e ushtrimit të saj, për nga parimet e organizimit dhe për nga veprimtaria e tyre.

Në të shumtën e rasteve, qëndrimi ndaj të së drejtës është qëndrim ndaj diçkaje që duhet zbatuar dhe nga ai qëndrim buron kuptimi i së drejtës. Mirëpo shumë shpesh ndodh në vendin tonë që njerëzit ndaj të drejtës të kenë një qëndrim si ndaj diçkaje "të huaj dhe të imponuar". Nga ky qëndrim buron kuptimi i së padrejtës në Kosovë. Padrejtësia ekziston, atëherë kur drejtësia shtrembërohet. Më pastaj kërkohet një kohë shumë e gjatë për ta vënë drejtësinë. Mendimtarë të shumtë mbrojnë pikëpamjen për të drejtën e të fortit, gjë që praktika në vendin tonë i verifikon mendimet e tyre, sepse drejtësia shpeshherë ndodh që të kërcënojë jo ligjin e arsyes, por ligjin e privilegjit.

Misioni i Bashkimit Evropian për sundimin e së drejtës, EULEX, arriti në Kosovë me ftesën e institucioneve të Republikës së Kosovës, në mënyrë që të zbatojë ligjin dhe drejtësinë në përgjithësi. Ne web faqen e këtij misioni thuhet se synimi kryesor i tij është t'i ndihmojë dhe mbështesë autoritetet kosovare në fushën e sundimit të ligjit, posaçërisht në fushën e policisë, gjyqësisë dhe doganave. Qëllimi i misionit po sipas kësaj web faqeje nuk është të sundojë apo të administrojë në Kosovë. Ky është një mision teknik i cili do të monitorojë, udhëzojë dhe këshillojë përderisa do të mbajë një numër të kufizuar të kompetencave ekzekutive. EULEX vepron në një kuadër të përgjithshëm të Rezolutës 1244 të Kombeve të Bashkuara dhe ka një zinxhir të njësuar komandues në Bruksel.

Ne njërën anë, në faqen e EULEX-it, në internet, thuhet se qëllimi misionit nuk është të sundojë, ndërsa në anën tjetër theksohet se megjithatë ka kompetenca ekzekutive, gjë që është kontradiktore. Edhe më keq se kaq, kur ky mision nuk na e njeh shtetin.

EULEX-i pas vendosjes në vendin tonë, çdo ditë e më shumë proklamonte vënien e drejtësisë dhe duke besuar qytetarët e Republikës së Kosovës se ndoshta vërtet do punojë për zbardhur krimet që kanë ndodhur në Kosovën e pasluftës, përkatësisht do të merret me reketizmin, pastrimin e parave, trafikimin e qenieve njerëzore, korrupsionin dhe format tjera të krimit të organizuar etj. etj. Në këtë drejtim, kryeprokurori i EULEX-it Teo Jakobs më 3 nëntor të vitit të kaluar deklaroi se për pak muaj do të ketë edhe arrestime për korrupsion dhe krim të organizuar, mirëpo ndodhi saktësisht e kundërta e asaj që deklaroi.

Ky mision pasi u vendos në vendin tonë, filloi të nënshkruajë protokollet me Serbinë, filloi t'i dënojë ushtarët e Ushtrisë së lavdishme Çlirimtare, gjegjësisht vëllezërit Arsim e Burim Ramadani, Arben Kiqina, pastaj dënoi edhe Rrustem Mustafën, Latif Gashin dhe Nazif Mehmetin (këta të fundit i dënuan me 13 vjet burgim) dhe të gjitha këto dënime u bënë me qellim të etiketimit dhe njollosjes së vlerave të luftës së UÇK-së.

Kurse tanimë së fundit është rifilluar edhe gjykimi i motivuar politikisht kundër liderit të lëvizjes "VETËVENDOSJE", Albin Kurti, dhe pikërisht riaktualizimi i këtij procesi është fyerje për të gjithë ata shqiptarë që kemi parë me sytë tanë se çfarë ndodhi më 10 shkurt 2007, kur rrugët e Prishtinës u lanë me gjak shqiptarësh nga policia e UNMIK-ut.

Tashmë dihet fare mirë se ata që ishin fajtorë për ngjarjet e 10 shkurtit 2007 janë policët rumunë, të cilët jo vetëm që ikën nga vendi i krimit, por edhe u dekoruan në vendin e tyre për vrasjet që kishin bërë.

Gjyqet politike kundër ushtarëve të UÇK-së dhe individëve që mendojnë ndryshe nga EULEX-i përfaqësojnë dhunë kundër lirisë së fjalës, kundër vlerave të luftës së UÇK-së, kundër sakrificës së kombit për liri, kundër synimeve për bashkim kombëtar.

Misioni i EULEX-it, kur ka të bëjë me dënimin e shqiptarëve, është shumë efikas dhe i shpejtë, ndërsa kur është fjala për serbët të cilët kanë kryer krime të luftës, kanë djegur pikat doganore, kanë vrarë policë ndërkombëtarë dhe bëjnë kontrabandë dhe kriminalitet të organizuar i fut veshët në lesh.

Një mision i tillë nuk i duhet Kosovës, sepse është mision i (pa)drejtësisë, i diskriminimit, pabarazisë, i privilegjeve, salltanetit etj., dhe si i tillë nuk i duhet askujt e aq më pak vendit tonë.

Kosova ka nevojë për barazi, mosdiskriminim, liri të mediave dhe mbi të gjitha drejtësi.

Martë, 23 Shkurt 2010

 (Autori është student i Fakultetit Juridik në studimet postdiplomike-master, drejtimi civil si dhe absolvent në Departamentin e shkencave politike dhe administratës publike të UP-së)