Fjalim i mbajtur nga Kryetari Degës së Veteranëve të UçK-së në Viti

Qytetarë dhe qytetare të Vitisë, motra dhe vëllezër,

Jemi mbledhur sot këtu, në qendër të Vitisë, të gjithë bashkë: Veteranë të Luftës Antipushtuese çlirimtare të UçK-së, familje të dëshmorëve, parti politike, shoqata dhe përfaqësues të Komunës, që të themi fjalën tonë, ta ngrisim zërin liridashës të kësaj treve, të protestojmë dhe të kërkojmë lirimin e luftëtarit të lirisë, Xhavit Hasanit, nga burgu. Ne të gjithë e kemi të qartë dhe e dimë se dënimi dhe burgosja e Xhavit Hasanit nuk ishte një akt juridik, por një akt politik dhe antishqiptar. Njeriu që iu kundërvu pushtuesëve sllavo-maqedonë dhe atyre serbë, jo vetëm me fjalë, por edhe me pushkë, u arrestua dhe po mbahet pa të drejtë në burg tash e tetë vjet. Secili prej nesh vazhdon të pyes: Pse? Sepse, Xhavit Hasani nuk mundi kurrë të pajtohej që mbi dhjetë mijë kilometra katrorë të tokës shqiptare të mbahen të pushtuara nga sllavo-maqedonët. Xhavit Hasani nuk mundi dhe nuk pranoi kurrë të pajtohej me ndjekjet, burgosjet, shtypjen e egër dhe dëbimin me dhunë të shqiptarëve nga shtëpitë dhe tokat e tyre. Ai u angazhua me fjalë e me pushkë për liritë dhe të drejtat kombëtare, politike e demokratike të shqiptarëve të pushtuar nga sllavo-maqedonët. ç’faj ka bërë Xhavit Hasani që të dënohet dhe të mbahet në burg? Sipas gjykatave sllavo-maqedone është fajtor se ua ka kthyer pushkën policëve maqedonë! Sipas tyre ai duhej t’i priste me lule policët sllavo-maqedonë që persekutonin, arrestonin dhe vrisnin shqiptarët. Jo vetëm kaq. Xhavit Hasani iu bashkua edhe Ushtrisë çlirimtare të Kosovës dhe luftoi deri në dëbimin e forcave pushtuese serbe nga Kosova. Pas përfundimit të Luftës në Kosovë, ai i kthehet Luftës për clirimin e tokave shqiptare të pushtuara nga sllavo-maqedonët. Për Xhavit Hasanin nuk ekzistonin kufijtë e vendosur me hekur e zjarr, me dhunë e gjenocid ndërmjet shqiptarëve dhe mes për mes tokave të tyre. Për te, Vitia, Prishtina, Prizreni, Shkupi, Kumanova, Tetova, etj. ishin qytete shqiptare njësoj si Tirana, Vlora, Shkodra, Durrësi, etj. Kjo filozofi politike dhe kombëtare e Xhavitit nuk e pengonte vetëm misionin e OKB-së në Kosovë, që quhej UNMIK, por i pengonte edhe disa qarqe dhe vende tjera antishqiptare dhe argatët e tyre në Kosovë. Vendosja e UNMIK-ut në Kosovë nuk kishte për qëllim vetëm carmatosjen e UçK-së. Misionet e imponuara në Kosovë kishin një qëllim edhe më djallëzor. Ato synonin edhe deshqiptarizimin e Kosovës, në emër të krijimit të një Kosove multietnike, joshqiptare dhe krijimin e një identiteti të ri të quajtur “kosovar”. Për realizimin e këtij projekti famëkeq duhej të krijoheshin edhe komuna dhe rajone të pastra serbe, të cilat do të mbanin lidhje të vecanta me Serbinë! E gjithë kjo politikë dhe i gjithë ky projekt bëhej në emër të decentralizimit! Ky projekt antishqiptar goditi më së shumti Anamoravën. Nga pesë komuna serbe të krijuara me këtë projekt dhe plan të Serbisë, katra u krijuan në Anamoravë, me miratimin dhe dëshirën edhe të Lutfi Hazirit! Njëra prej tyre në zemër të Vitisë. Pengesë për zbatimin e këtyre politikave dhe planeve antishqiptare ishin njerëz atdhetarë dhe të vendosur në vijën kombëtare, si Xhavit Hasani. Kjo ishte arsyeja pse pas mbarimit të Luftës, UNMIK-u dhe kolaboracionistët e tij vendorë nuk i hetonin dhe denonin ata që ushtruan dhunë, terror, gjenocid dhe holokaust në Kosovë, por filluan një fushatë të turpshme për ndjekjen, dënimin dhe burgosjen e luftëtarëve të lirisë. Midis tyre edhe Xhavit Hasanin, i cili u arrestua dhe u dënua me 14 vite burg, duke u bazuar në dënimet që kishin shqiptuar gjykatat sllavo-maqedone. Ndjekja, dënimi dhe burgosja e luftëtarëve të lirisë nga prokurorë e gjykatës të huaj, që fshiheshin pas misionit dhe emblemës së UNMIK – OKB-së ngjalli reagime dhe pakënaqësi të përgjithshme te populli shqiptar i Kosovës dhe te mbarë kombi shqiptar. Protestat, demonstratatë dhe pakënaqësia në rritje e shqiptarëve i detyroi shpeshherë të heqin dorë nga dënimet e tyre, t’i lirojnë luftëtarët e lirisë nga burgu dhe të përmbahen nga persekutimi i ushtarëve, i komandantëve dhe drejtuesëve politikë të UçK-së. Por, Xhavit Hasani dhe disa bashkëluftëtarë të tij vazhdojnë të mbahen në burg edhe sot!

Pas shpalljes së Pavarësisë shqiptarët besonin se do të korrigjoheshin këto padrejtësi të UNMIK-ut. Mirëpo, sic thotë populli, “ke nja na u banë dy”. Para Pavarësisë e kishim një UNMIK, kurse pas saj u bëmë me një UNMIK dhe me një EULEX, me dy misione. Imponimi i EULEX-it u bë në emër të vendosjes së ligjit dhe të drejtësisë në Kosovë! Në fakt EULEX-i po merret me zbatimin e politikave që nuk mundi t’i zbatojë deri në fund UNMIK-u. Ky farë EULEX-i në vend se të ndihmonte drejtësinë dhe të përmirësonte padrejtësitë e UNMIK-ut po mundohet t’i thellojë padrejtësitë dhe t’i zbatoj “amanetet” që ia ka lënë UNMIK-u për ndjekjen e liridashsëve në Kosovë dhe për mbytjen e ndjenjës kombëtare shqiptare në këtë vend. EULEX-i në vend se t’i dënoj kriminelët që vranë bashkombasit tanë duarthatë, mu në qendër të Prishtinës, po ndjek dhe po përpiqet ta dënoj të panënshtruarin, Albin Kurtin, i cili angazhohet jo vetëm për një pavarësi formale, por edhe për një Kosovë sovrane dhe për të drejtën e kombit shqiptar për të jetuar në një shtet të vetëm dhe nën hijen e Flamurit kuq e zi të Gjergj Kastriotit.

Motra dhe vllezër,

Nuk ka dhe nuk mund të ketë Kosovë të lirë, të pavarur dhe sovrane deri sa të mbahen në burg luftëtarët e lirisë. Nuk mund të ketë drejtësi dhe institucione të pavarura e sovrane të Republikës së Kosovës deri sa të ketë UNMIK dhe EULEX në Kosovë, nuk mund të ketë drejtësi dhe demokraci deri sa në Kosovë ta bëjnë ligjin Piter Faiti dhe Zanieri.

Familja e Xhavit Hasanit, partitë politike, shoqatat dhe Komuna e Vitisë kanë kërkuar dy herë radhazi nga Kryetari i Republikës, Fatmir Sejdiu, që ta shfrytëzoj të drejtën e tij kushtetuese për lirimin e Xhavitit. Por, të dashur qytetarë, keni dëgjuar dhe lexuar edhe në gazeta se nga Kryetari i Republikës janë falur dhe janë liruar nga burgu njerëz të dënuar për vrasje, njerëz të dënuar për trafikim droge dhe të burgosur të tjerë ordinerë, por nuk u lirua Xhavit Hasani dhe asnjë luftëtar i lirisë! Prandaj, ne ju bëjmë thirrje qytetarëve të Vitisë pa dallim dhe shqiptarëve kudo që janë që të angazhohen me të gjitha mundësit, format dhe mjetet për lirimin e Xhavit Hasanit dhe të gjithë atyre që mbahen pa të drejtë në burg si pengje të politikave antishqiptare. Ne si qytetarë të këtij vendi kemi obligim të përpiqemi dhe angazhohemi për vendosjen e një rendi demokratik dhe për një drejtësi të bazuar në ligje evropiane, për një drejtësi të liruar nga prangat e UNMIK-EULEX-it, për një shtet ligjor.

Liri për Xhavit Hasanin, liri për të gjithë të burgosurit liridashës! Liri, drejtësi, sovranitet dhe demokraci për Kosovën dhe për të gjithë hapësirën shqiptare në Ballkan!