Pse UNMIK’u po e arreston të vërtetën?!

Familja e Arben Xheladinit dhe ajo e Mon Balajt që të dy të vrarë më dhjetë shkurt të vitit 2007 si dhe Zenel Zeneli dhe Mustaf Nerjova të lënduar rëndë, janë tërësisht të zhgënjyer me procesin pranë Panelit Këshilldhënës për të Drejtat e Njeriut për rastin e 10 shkurtit.

Në muajin mars, një ditë para datës kur ishte planifikuar të mbahej seanca e hapur dëgjimore, UNMIK-u tentoi të na e imponojë seancën e mbyllur, duke thënë se është shumë e rrezikshme të mbajmë seancë të hapur për shkak të brengave për sigurinë e seancës, pa e bërë asnjëherë publike arsyen e kësaj brengosjeje. Tash, për ta shmangur seancën e hapur që duhet të mbahet më 4 qershor, PSSP-ja ka deklaruar se do ta lëshojë një Udhëzim Administrativ me anë të të cilit do ta ndryshojë kuptimin e “seancës së hapur” në mënyrë që ajo të mbetet e “hapur”, por që të mos jetë realisht “seancë dëgjimore” në të cilën avokatët tonë do t’i ballafaqonin ata të UNMIK-ut në kërkim të së vërtetës për vdekjen e bijëve tanë dhe plagosjen e 80 demonstruesve. Me këtë ndërhyrje UNMIK-u e ka minuar pavarësinë dhe paanshmërinë e Panelit.

PSSP-ja arbitrarisht po i ndryshon rregullat në mes të mbajtjes së seancës. Ne si familje i kemi shfrytëzuar të gjitha kanalet e mundshme për të kërkuar drejtësi për vrasjen e më të dashurëve. Mirëpo këto kanale përherë na janë mbyllur nga UNMIK-u përmes fuqisë së tij absolute juridike, politike e administrative. Në vend se të angazhohet në gjykimin e policëve rumun që e kanë kryer vrasjen e Monit dhe Arbenit, UNMIK-u po na dënon ne, palën e dëmtuar, duke na e mohuar të drejtën mbi mësimin e të vërtetës.

Ftojmë institucionet e Kosovës edhe një herë publikisht që të angazhohen në zbardhjen e së vërtetës për vrasjen e bijëve tonë. UNMIK-u në këtë rast është palë e angazhuar drejtpërdrejt në vrasjen e Monit dhe Arbenit, kështu që ata natyrisht mundohen që e vërteta për krimin të mos mësohet kurrë nga qytetarët e Kosovës. Mirëpo institucionet e Kosovës do të duhej të ishin në anën tjetër - në anën e qytetarëve. Se Moni, Arbeni por edhe të plagosurit tjerë janë qytetarë të Kosovës.

Ne vazhdimisht kemi kërkuar që rasti ynë të dëgjohet në publik, ashtu që qytetarët e Kosovës bashkërisht ta gëzojnë të paktën kënaqësinë nga kjo formë e drejtësisë, meqenëse na janë mohuar të gjitha alternativat tjera. Kjo vazhdon të jetë kërkesë e jona dhe refuzojmë t’i nënshtrohemi çfarëdo ndërhyrjeje politike dhe vendimeve arbitrare të PSSP-së. Dhe insistojmë në drejtësi.

Në emër të familjeve :

Shaban Xheladini

Kadri Balaj

Halim Sylejmani, përfaqësues ligjor i familjeve

Prishtinë, 14 Maj 2009