Përgjigjie dhënë Ministrit Sadri Ferati për çështjen e "komunës" së Kllokotit

Shkruan: Xhevat Bislimi, Nënkryetari i Komunës së Vitisë

Zoti Ministër,

Mendimin, përcaktimin dhe përgjigjien tuaj për cështjen e Komunës së Vitisë dhe të copëtimit të saj e kemi ditur që moti. Ju në mënyrë të dhunëshme, në kundërshtim me vullnetin e qytetarëve shqiptarë (shumicës absolute) dhe në kundërshtim me interesat e pakicës serbe keni “krijuar” komunën e Kllokotit. Në këtë process nuk ka qenë e përfshirë Komuna e Vitisë, sepse nuk kemi patur mandat për krijimin e një “komune” tjetër në zemër të Vitisë.

Ne edhe sot mendojmë se kjo “komunë” nuk ka asnjë mundësi mbijetese. Ndoshta, kur të bëhet riorganizimi territorial dhe administrativ sipas modelit francez apo shqiptar, edhe Kllokoti, Pozherani, Smira e ndonjë tjetër mund të bëhen komuna. Por me këtë model të trashëguar dhe me kompetencat që ka Komuna sot, Kllokoti as nuk mund të mbijetoj, as nuk mund t’i plotësoj dhe përfaqësoj interesat e pakicës serbe, e lëre më ato shqiptare. Rruga e vetme dhe konform frymës, parimeve dhe filozofisë evropiane (Bashkimit Evropian) është integrimi i pakicave dhe i popujve e jo ndarja e tyre me mure Berlini.

Duke patur parasysh interesat e qytetarëve të këtyre fshatrave të shkëputura dhunshëm nga Komuna e Vitisë, Kryetari i Komunës së Vitisë i ka ofruar bashkëpunim Sasha Mirkovicit dhe përkrahje për përmirësimin e jetës së qytetarëve. Kjo ofertë nuk është pranuar edhe për fajin tuaj. Të gjitha veprimet dhe politikat tuaja ishin dhe mbetën partiake në raport me Komunën e Vitisë. Logjika dhe filozofia e Partisë nuk i shkon gjithmonë për shtat logjikës dhe filozofisë shtetërore. Shqiptarët e përfshirë pa vullnetin e tyre brenda kufijve të “komunës” së Kllokotit kanë mbetur të pa përfaqësuar në këtë “komunë”.

Pastaj, kjo “komunë” është komunë pilot dhe Komuna amë është Komuna e Vitisë. Por, ju, me politikat dhe angazhimet e juaja partiake po kërkoni ta bëni njëfarë minishteti në tokën e Vitisë, që nuk mund të bëhet sepse është në kundërshtim edhe me ligjet në fuqi.

Çështja e Drejtorit të Shkollës fillore në Mogilë i vërteton më së miri ato që thash më lartë. Ju nuk merreni me drejtorët paralelë të shkollave të pakicës serbe në Komunën e Vitisë, por merreni me një Drejtor të zgjedhur nëpërmjet konkursit dhe në rrugë krejt legale! Ju merrni në mbrojtje një ish-drejtor që vërtetë ishte i LDK-së, por edhe atëherë i zgjedhur në kundërshtim me ligjin. Si shumica e drejtorëve të zgjedhur në kohën e qeverisjes së LDK-së në Viti, edhe ky ishte zgjedhur drejtor shkolle me shkollë të lartë!

Veç kësaj, po habitem ku po e gjeni atë kohë me u marrë me Vitinë në kohën që e keni Mitrovicën dhe krejt Veriun e Kosovës! Po dua të them që keni mjaft punë para se të merreni me Vitinë…