Reagim ndaj debatit "të ekspertëve" për mësimin e maqedonishtes

Larg duar nga eksperimentet me fëmijët shqiptar!

Debati lidhur me mësimin e gjuhës maqedonase nga klasa e parë për fëmijët e etnive të tjera mobilizoi qarqet “shkencore” të Maqedonisë të udhëhequr nga patronët e ministrit të arsimit, si dikur iniciativa e ngjashme e Millosheviqit që pat mobilizuar qarqet “shkencore” të Serbisë.

Ata që shtiren se kanë harruar dhe për ata që nuk kanë pasur moshën apo mundësinë për të ndjekur zhvillimet në Serbinë diktatoriale, po u rikujtojmë se në kohën kur Millosheviqi përpiqej të impononte mësimin e gjuhës serbe nga klasa e parë e arsimit fillor, dolën në skenë “shkencëtarë” që në mënyrë “shkencore” argumentonin se kjo mund të sjellë vetëm zhvillimin intelektual të fëmijëve.

Madje, “shkencëtarët“ e llojit të komanduar nga politika dolën me konstatimet se “alfabeti cirilik është alfabeti që më së paku i lodhë dhe i dëmton sytë! Ndërsa alfabeti latin është shumë i dëmshëm për të pamurit!” Zbulim shkencor se jo mahi!

Me këto “zbulime të mëdha shkencore” që dëshmojnë për miopinë e tyre politike ata tentuan t’u imponojnë edhe kroatëve, edhe sllovenëve madje edhe shqiptarëve përdorimin e alfabetit cirilik “për të mirën e syve të fëmijëve tanë”!

Maqedonia për pesë dekada rresht të bashkëjetesës komuniste ka qenë laborator i eksperimentimit të praktikave që synojnë etnocidin. Dështimet që qarqet antishqiptare të Beogradit përjetuan në Kosovë tentojnë t’i vënë përsëri në zbatim në Maqedoni.

Përmes satelitëve të vet në Shkup (dhe më gjerë) miratuan ligjin “në interes të fëmijëve tanë” që të mësohet gjuha maqedonishte nga klasa e parë fillore! Madje, alamet profesor të Universitetit dhe “ekspertë” të llojit Pandev, Stefanovski etj, nxorën konkluzione se për deri sa në shekullin e XX na paskan qenë mësuar nga 4-5 gjuhë, pse të mos mundet të mësohet edhe sot në shekullin XXI, kur metodika e mësimit të gjuhëve është “shumë e zhvilluar".

U drejtohemi bashkëmendimtarëve të këtyre “ekspertëve” që këto “metodika”, të cilat nuk paskan asgjë të keqe, t’i eksperimentojnë me fëmijët maqedonas, duke u imponuar mësimin e gjuhës shqipe nga klasa e parë fillore.

Pas disa viteve do të bëjmë bilancin e rezultateve. Nëse rezultatet do të jenë pozitive do të mbështesim që edhe fëmijët tanë të mësojnë maqedonishten. Në të kundërtën u themi larg duar nga eksperimentet me fëmijët shqiptar!

Bashkimit Demokratik Shqiptar

Bardhyl Mahmuti

Kryetar

16 shkurt, 2010