Opozita i përgjigjet Bakojanis: Kontestuam marrëveshjen, për interesa kombëtare

Shkruan: Adriatik Doçi

Dalipi: Paktin detar e rrëzoi Kushtetuesja jo Rama

Duke komentuar vendimin e Gjykatës Kushtetuese mbi anulimin e paktit detar me Greqinë dhe akuzat e ish-ministres së jashtme greke, Partia Socialiste mohon çdo pleksje të kryesocialistit Rama me elementë ekstremistë në vend. Deputeti socialist, Alfred Dalipi u shpreh se Partia Socialiste thjeshtë ka mbrojtur interesat e kombëtare nga marrëveshja e Berishës për të shitur detin për përfitime politike. Dalipi gjithashtu theksoi se deklaratat e ish-ministres greke Dora Bakojanis se marrëveshjen e rrëzoi opozita, po përdoren nga maxhoranca, e cila mori një shuplakë të fortë nga Gjykata Kushtetuese. “Së pari shqiptarët dhe kushdo tjetër duhet të dinë se marrëveshjen e fshehtë të Berishës për kufirin ujor më Greqinë, nuk e rrëzoi Partia Socialiste, por Gjykata Kushtetuese e Shqipërisë, si një institucion i pavarur dhe jopolitik. Opozita nuk është Gjykata Kushtetuese. Opozita thjeshtë ka ankimuar një marrëveshje korruptive të qeverisë për interesa kombëtare. Një gjë të tillë, sipas Kushtetutës mund të bënte edhe një qytetar i thjeshtë”, theksoi Dalipi. Ai përgënjeshtroi çdo akuzë se kreu i PS, Edi Rama ka pasur ndonjë ndikim tjetër në këtë marrëveshje përveçse interesit të Shqipërisë dhe transparencës. “Partia Socialiste ka paraqitur vetëm argumente shkencore dhe historike që marrëveshja ishte e në dëm të interesave tona kombëtare. Keqkuptimet e tjera po furnizohen nga maxhoranca për të sjellë një frymë agresive, megjithëse kjo taktikë është e dështuar. Pra këtu përjashtohet çdo pleksje të kryesocialistit Rama me elementë ekstremistë në vend”, pohoi Dalipi. Ai theksoi se vendimi i Kushtetuese nuk i dëmton aspak marrëdhëniet e fqinjësisë së mirë me Greqinë, duke shtuar se grekët kanë reflektuar se marrëveshja ishte në dëm të vendit tonë. “Athina zyrtare është çuditur me sjelljet e qeverisë tonë, sesi kjo e jona pranoi pa asnjë problem të vendosë kufijtë ujorë në territorin e Shqipërisë”, pohoi Dalipi.

Rama

Ndërsa vetë kryetari socialist Edi Rama ka shprehur vlerësim të tij ndaj Gjykatës së Kushtetuese për rrëzimin e marrëveshjes Shqipëri-Greqi, për përcaktimin e kufijve detarë mes dy vendeve. Për më tepër, Rama e konsideroi marrëveshjen si një fatkeqësi kombëtare që u arrit të ndalej. Ai ka akuzuar qeverinë Berisha për një marrëveshje të fshehtë dhe në dëm të interesave Kombëtare. “Berisha duhet t’u kërkonte shqiptarëve ndjesë për marrëveshjen që u rrëzua unanimisht nga Gjykata Kushtetuese pa asnjë votë kundër, ky Esat Toptan i kohëve moderne, akuzonte si antishqiptare opozitën për ngritjen e zërit në Këshillin e Evropës në mbrojtje të vlerave dhe parimeve evropiane të demokracisë”, ka pohuar Rama.

Bakojanis

Një ditë pas rrëzimit nga Gjykatës Kushtetuese të marrëveshjes për përcaktimin e vijës detare midis Greqisë dhe Shqipërisë, ish-ministrja e Jashtme greke, Dora Bakojanis ka akuzuar haptas liderin e opozitës shqiptare Edi Rama, për prishjen e kësaj marrëveshjeje. “Së pari shpreh keqardhjen për anulimin prej gjykatës shqiptare të kësaj marrëveshjeje. Unë akuzoj qeverinë e re greke të Pasok, që nuk e dërgoi marrëveshjen për ratifikim në Parlament, pasi ajo ishte shumë e rëndësishme për Greqinë. Madje, gjatë kohës që unë drejtoja Ministrinë e Jashtme, u mundova ta përfundoja atë sa më shpejt të ishte e mundur. Kjo marrëveshje duhej të dërgohej në Parlamentin grek që javën e parë që ai u hap, me qëllim krijimin e një atmosfere pozitive, e cila do të pengonte këtë fund aspak të këndshëm”, është shprehur Bakojanis.