Shqiptarët të mos harrojnë qëllimin!

Shkruan: Xhavit Haliti

Lajmi se në qeverinë e Maqedonisë do të përfshihet një parti shqiptare, ndërsa tjetra vendosi të qëndrojë në opozitë, mund të mos ketë të njëjtën vlerë për veprimtarët apo eksponentët kryesorë të këtyre forcave politike, por besoj se është një lajm i mirë për të gjithë shqiptarët të lodhur nga situatat e paqeta dhe gati shpërthyese. Më në fund, pas një kalvari skenash të pakëndshme që paraprinë zgjedhjet e parakohshme në Maqedoni dhe i shoqëruan ato, tashmë u vendos; Gruevski do ta bëjë qeverinë në koalicion me një nga partitë shqiptare. Këtë herë radha e pushtetit i takoi partisë së Ali Ahmetit, e cila deri dje ishte në opozitë.

Partia e Menduh Thaçit nuk ra dakord me kushtet e VMRO-DPMNE dhe deklaroi se preferon të bëjë opozitën konstruktive. E natyrshme për një skenë politike ku "protagonistët e shfaqjes" duhet të kenë përballë edhe oponencën. Ashtu si në çdo lojë me rregulla, apo edhe me përjashtime, rotacioni politik ndoshta vonon, por sidoqoftë është i pashmangshëm, por partitë shqiptare në Maqedoni duhet ta shohin të qenit në pushtet apo në opozitë në një plan më të gjerë.

Partia në pushtet (cilado qoftë) duhet të luftojë për plotësimin e sa më shumë të drejtave për shqiptarët, ndërsa ajo në opozitë duhet t‘i mbështesë shqiptarët në pushtet e të mbajë sytë katër që qeveria maqedonase të mos luajë në kurriz të tyre.

Shqiptarët e Maqedonisë i dinë mirë problemet e tyre dhe askush më mirë se ata nuk do të mund t‘i zgjidhë, por këtë përpjekje s‘duhet ta zbehë asnjë nga mosmarrëveshjet që dy partitë kryesore po përvijojnë dukshëm mes njëra-tjetrës. Mendoj madje se në këtë tablo përçarjesh ka hedhur penelin e vet edhe vetë Gruevski, i cili nuk do të hezitonte madje t‘i përfshinte në qeveri të dyja partitë shqiptare, ashtu siç u përfol së fundi. Pse të mos themi që për të, ky do të ishte varianti më i mirë; nuk do të kishte një opozitë potenciale, ndërsa nga ana tjetër do të krijonte me dashje pakënaqësi mes BDI dhe PDSH për portofolat ministrorë, apo vendet në administratë. Për Kryeministrin e Maqedonisë ka rëndësi shumica parlamentare që mundëson miratimin nga Parlamenti të ligjeve dhe programeve qeveritare në mënyrë të papenguar dhe aspak realizimi i të drejtave dhe kërkesave të shqiptarëve. Në një dorë lapsin e nënshkrimit të marrëveshjeve ku pranon kushtet e shqiptarëve, në dorën tjetër shishen e benzinës për të spërkatur herë pas here zjarrin e konfliktit mes shqiptarëve, që ai të qëndrojë gjithmonë i ndezur. Vetëm kështu vëmendja do të shkëputet nga realizimi i programeve qeverisëse të premtuara, marrëveshjeve të nënshkruara me aleatët në koalicion, apo edhe atyre më të mëdha siç është ajo e Ohrit. Mandati i sapopërfunduar i qeverisë së drejtuar nga Nikolla Gruevski sapo e vërtetoi këtë, ndaj shqiptarët nuk duhet të lejojnë edhe një herë tjetër që Kryeministri maqedonas të bëjë lojën e tij. Për shqiptarët, qëllimi i vetëm duhet të mbetet në çdo rrethanë plotësimi i të drejtave të tyre, pa harruar në asnjë çast se lufta dhe jetët e humbura kishin vetëm këtë ëndërr.

Kolltukët e pushtetit apo edhe karriget e opozitës janë të përkohshme!...