Shkollat në Kosovë e turizmi tek ne

Shkruan: Bashkim Kopliku

Tani nga qershori, kanë ardhur shumë pak plazhistë nga Kosova, sepse vijnë kryesisht në korrik e në gjysmën e parë të gushtit. Sezoni i tyre është i shkurtër, praktikisht vetëm një muaj e gjysmë. Ja një zgjidhje fare e thjeshtë, që do ta rriste sezonin turistik shqiptar, e me të edhe numrin e turistëve: shkollat në Kosovë të fillojnë më 16 shtator, dhe jo më 1 shtator. Ministri Ylli Pango duhet të jetë “më i interesuari”, sepse ka deklaruar se do të japë dorëheqjen, nëse nuk rritet numri i turistëve këtë vit. Sa për kryeministrin, e dimë se ai nuk ka kohë, se merret me shfaqje televizive, me inaugurime etj.

Sistemi ynë shkollor sikur është përshtatur me sezonin turistik korrik-gusht, bile dhe pak para (qershori), dhe pak mbrapa (shtatori). Para korrikut ka mbaruar shkolla, dhe pas gushtit shkollat tona nuk fillojnë para 16 shtatorit. Kështu, nxënësit e studentët tanë, si dhe prindërit e tyre, mund të shkojnë në plazh pa u penguar nga shkolla, në dy muajt korrik e gusht. Nuk kanë ngut të lënë plazhin para “31 gushtit” sepse tashmë prej dhjetëra vjetësh shkollat në Shqipëri, nuk fillojnë më 1 shtator, siç fillojnë në Kosovë.

Në masën e njerëzve që lidhen me plazhin, janë edhe me mijëra kamerierë, pastrues e punonjës të tjerë sezonalë të turizmit që janë nxënës shkollash dhe studentë. Të gjithë këta janë të përshtatur rreth dy muajve korrik e gusht. Por nuk janë të përshtatur kosovarët.

Po në këto muaj, korrik e gusht, vijnë për pushime, edhe shumë shqiptarë që jetojnë e punojnë jashtë. Kryesisht janë ata që vijnë nga Italia dhe Greqia. Në Itali, pushimet janë përqendruar kryesisht në gusht, bile në pjesën e dytë të tij. Quhet ferragosto (pushimet e gushtit), festa e 15 gushtit, por pushimet shpesh shtrihen nga 1 deri më 31 gusht, ose bile dhe nga 25 korrik deri në 10 shtator. Edhe në Greqi, pushimet shtrihen kryesisht në korrik dhe gusht.

Por shumicën e turistëve “të huaj”, i përbëjnë kosovarët, e për ta duhen menduar më shumë. E ata kanë probleme me pjesën e dytë të gushtit, sepse shkollat në Kosovë fillojnë më 1 shtator.

Nëse në Kosovë shtyhet shkolla për 16 shtator, praktikisht sezoni turistik, nga 1, 5 deri 2 muaj, bëhet 2 deri 2,5 muaj, gjë që po t’i hysh llogaritjeve statistikore, mund të sjellë një rritje të turizmit edhe prej 25%, gjë që nuk është pak.

Kemi diskutuar sa shpjeguam, prej disa vjetësh, me disa operatorë turistikë (persona që merren me turizmin, si pronarë hotelesh, agjencish, restorantesh etj.), nga Shqipëria dhe nga Kosova. Mbase tani që Kosova u bë edhe zyrtarisht e pavarur, qeveritë tona do të veprojnë.

Por, nuk kemi shpresë se do të merret ndonjëherë “me këto vogëlsira”, kryeministri ynë aktual. Ai është i zënë deri në mani me inaugurime etj. Besojmë se e patë se deri në ç’turp arriti, sa t’i rrëmbejë nga dora kryetarit të Bashkisë Durrës, z. Vangjush Dako, gërshërën e prerjes së shiritit, kur durrsaku dhe kosovari (kryeministri Thaçi) po inauguronin rrugën “Pavarësia e Kosovës” në Plazhin e Durrësit. Nuk kishte punë fare të furej kryeministri, qoftë se aty ishte i pari, kryetari i Durrësit, qoftë dhe se rruga që po inaugurohej, “Pavarësia e Kosovës”, ka qenë investimi më i anatemuar nga kryeministri aktual, kur ai ishte në opozitë. Mbase kryeministrit iu duk si “i vogël” kryetari i bashkisë së Durrësit, sepse në bashkitë e Tiranës dhe atë të Vlorës, nuk guxoi, jo më të përzihet kur ato u vizituan nga kryeministri Thaçi, por as të jetë prezent.

Qeveritë tona, në Tiranë dhe në Prishtinë, duhet të merren fillimisht me gjërat më kryesore dhe më lehtë të zgjidhshme. Zgjatja e sezonit turistik, është një prej tyre, e shumë më kryesore se “ndërtimi i një tec-i shtetëror të përbashkët” (central elektrik me qymyr)—centralin e ndërtojnë më mirë privatët sesa shtetet, kurse fillimin e shkollës nuk e caktojnë dot privatët.