REAGIM

Kryeministrit të Kosovës, z. Hashim Thaçi

Ministrit të MASHT-it, z. Enver Hoxhaj

Opinionit publik

VENDIMI I MASHT-it DISKRIMINON SHQIPTARËT

Siç duket edhe Qeveria Thaçi, respektivisht Ministria e Arsimit, Shkencës dhe Teknologjisë do ta vazhdojë praktikën diskriminuese ndaj studentëve shqiptarë të Luginës së Preshevës dhe atyre të Malit të Zi, të aplikuar që nga viti akademik 2003-2004.

Sipas vendimit të MASHT-it, nr. 176/01-B, të datës 20.6.2008, nga Lugina e Preshevës dhe nga Mali i Zi në Universitetin e Prishtinës në vitin akademik 2008-2009 do të pranohen vetëm 306 studentë, të cilët në vendim quhen paturpësisht “studentë nga rajoni”.

Është ky një akt absurd diskriminues ndaj shqiptarëve të Luginës së Preshevës dhe shqiptarëve që jetojnë në Mal të Zi, akt i cili do të ketë (siç ka pasur edhe në të kaluarën) pasoja mjaft të rënda për këtë popullatë shqiptare (edhe ashtu shumë të shtypur nga Serbia e Mali i Zi), si dhe pasoja në marrëdhëniet në mes të shqiptarëve në përgjithësi.

Presheva, Bujanoci e Medvegja janë tri komuna të banuara me shumicë shqiptare, të cilat padrejtësisht iu shkëputën Kosovës. Afër 100 mijë shqiptarë të këtyre komunave, që nga aneksimi që iu bëri Serbia, nuk kanë pasur ndonjëherë mundësi tjetër të shkollimit të lartë në gjuhën amtare përveç në Kosovë.

Në kushte pothuajse të njëjta ndodhen edhe shqiptarët në Malit të Zi.

Qeveria e Kosovës, respektivisht Ministria e Arsimit, Shkencës dhe Teknologjisë e Kosovës nuk guxon t’i trajtojë në këtë mënyrë studentët shqiptarë nga Lugina e Preshevës dhe studentët shqiptarë nga Mali i Zi!

Prandaj:

- Kërkojmë nga MASHT-i që pa asnjë vonesë ta rishqyrtojë vendimin e datës 20.6.2008 dhe studentët shqiptarë që vijnë nga Lugina e Preshevës dhe nga Mali i Zi të barazohen me studentët shqiptarë të Kosovës;

- Kërkojmë nga MASHT-i që publikisht t’i kërkojë falje popullatës shqiptare të Luginës së Preshevës dhe shqiptarëve që jetojnë nën Mal të Zi për trajtimin joadekuat të tyre.

Prishtinë Lëvizja për Bashkim

27.6.2008