GJENERALI NUK KA KUJT T’I SHKRUAJ !?

Shkruan: Mehmet BISLIMI

Kaloi një muaj e ca që Gjeneral Sami Lushtaku po dergjet në burgun e Dubravës! Vetë fakti që dënohet një Gjeneral dhe një Kryetar Komune të bën të shtrosh disa pyetje të cilat shikuar nga këndi shumë dimensional bëjnë që të zbrazësh tërë mllefin e arsyeshëm mbi këtë veprim i cili denigron ligjin dhe drejtësinë në legjislaturën e re të Kosovës dhe atë deri në banalitet, madje prodhimi i insinuatave të tilla konfliktuoze nga administrata e UNMIK-ut, nuk përkon as për së afërmi me standardet e ligjeve bashkëkohore evropiane.

Që nga dita e arrestimit të Kryetarit të Komunës së Skënderajt, zotit Lushtaku (8 maj 2008) e deri më sot, nuk iu qasa ndonjë shkrimi për faktin e thjeshtë, duke besuar bindshëm se administrata ndërkombëtare në Kosovë është aq e vetëdijshme sa që të mos “gdhendë në këmbën e saj!”, dhe me kohë do të përmirësoi gabimin e saj, duke e lënë të lirë Kryetarin e Komunës së Skenderajt. I bindur se kjo administratë po vepron për të implementuar ligjin dhe drejtësinë, zhvillimin ekonomik e njerëzor, sigurinë qytetare dhe atë minoritare. Kisha një besim të plotë se e tëra kjo do të finalizohej me sinqeritetin dhe punën e jashtëzakonshme të zotit Lushtaku i cili me autoritetin e tij moral e politik kishte arritur që të qëndrojë vertikalisht si në rrethana lufte, po ashtu edhe në rrethana paqe. Samiu në luftë, me shembullin e tij të përkushtuar prej luftëtari të lirisë, kishte vu jetën e tij në shërbim të lirisë së vlerave universale dhe kombëtare. Samiu është një figurë e virtytshme dhe këtë e ka argumentuar sa e sa herë bindshëm me sjelljet e tij prej një Gjenerali dhe Komunari të shkëlqyer. I përkushtuar, i disiplinuar, i përgjegjshëm ndaj qytetarëve dhe punës së tij, i palodhshëm dhe mbi të gjitha i vendosur që Komunën e Skenderajt ta shpijë drejt zhvillimit dhe progresit ekonomik.

Mirëpo, ky besim dhe shpresat e mia, por edhe të qytetarëve të Skenderajt e më gjerë, tentuan të trazoheshin nga administrata e UNMIK-ut, kur mori hapin naiv dhe “ gdhendi në këmbën e vet!”, duke dënuar një udhëheqës të një Komune zgjedhur bindshëm me votën e lirë të popullit! Kjo do të thotë: dënim i votës së lirë të popullit, dënim të ardhmërisë së një Komune, dënim të zhvillimit të saj ekonomik, politik, etik, goditje ligjit dhe drejtësisë! Më këtë hap, kjo administratë edhe një herë (për të satën herë) tregoi arbitraritetin e saj të pabazë, tregoi paaftësinë dhe naivitetin e saj për të avancuar ligjin dhe drejtësinë, apo mosdashjen e saj që t’i kontribuojë shtetit të brishtë të Kosovës. Burgosja e një komunari, do të thotë stopimi i investimeve atje, kjo bartë me vete; ngritjen e urrejtjes dhe zbrazja e mllefit atje, shpërthimin e revoltës nga qytetarët e ndrydhur nga varfëria e skajshme dhe mbase mbi këtë bazë UNMIK-u ka menduar që të veprojë për të krijuar probleme mbi të cilat do të zgjaste kohën e veprimit të jetës së vet luksoze në Kosovë! Ndryshe zbatimi i dënimit të Gjeneral Lushtakut sot ka mundur të harrohet.

Nga ndonjë analist të cilët i nxjerr pa përtesë me këtë kualifikim televizioni publik i Kosovës, u tha se kryetari i Komunës nuk ka imunitet, por harroi të analizohet nga ky „analist“ se për të futur në burg Sami Lushtakun ka pasur mundësi ta bëjë që disa vite dhe të mos presë fitoren në zgjedhje për krye të Komunës së Skenderajt. „Analisti“ harron të analizojë edhe tendencën e UNMIK-ut që të shtiret edhe më i fuqishëm se vota e qytetarëve të Kosovës dhe të zgjedhurit e saj i fut dhe i nxjerr prej burgut kur t’i teket përfaqësuesit të padronit të Kullës së Qelqtë të Nju Jorkut! Ndryshe, ia lë qytetarit të thjeshtë që të ndajë drejtësinë mes rastit të Milan Ivanoviqit i cili plagosi me granatë dore mbi 20 paqeruajtës Polak në Mitrovicë dhe për këtë u “dënua” që të jetë udhëheqës i një subjekti politik atje dhe mes veprës së Gjeneral Lushtakut që “pengoi” një zyrtarë ndërkombëtar dhe sot vuan dënim me burg të Dubravës, ky pra është shkopi i drejtësisë dhe ligjit ndërkombëtar të UNMIK-ut!...

UNMIK- gjuajti në kohë të pakohë me qëllime të caktuara?! Ndryshe Gjenaral Lushtakun që në fillim e kishte shpallur në kërkim pushteti millosheviqian nën akuzën e përpiluar nga Gjyqtarja Danica Marinkoviq që në tetor të 1996-të, ku kërkohej koka e tij dhe e shokëve të tij në mesin e të cilëve edhe koka e Komandantit Legjendar Adem Jasharit dhe e kryeministrit të sotëm të Republikës së Kosovës, zotit Hashim Thaçi!

Kronologjikisht ndjekja e Gjeneral Lushtakut rodhi kështu:

- Gjyqtarja serbe Danica Marinkoviq më 1996, shpalli fletëarrest për Sami Lushtakun.

- Lushtaku, atëbotë dënohet nga “drejtësia” serbe me shumë vite burg (në mungesë).

- Përjashtohet nga radhët e TMK-së në korrik të vitit 2001 me një arsyetimin absurd.

- Arrestohet dhe mbahet për 10 ditë i burgosur në muajin prill 2004.

- Rrethohet fshati Prekaz, në veçanti lagjja Lushtakaj, ku me ekskavator gërmohet kopshti i Gjeneral Lushtakut, në mënyrën më brutale dhe më të neveritshme nga forcat e KFOR-it dhe të UNMIK-ut. Deri më sot asnjë sqarim nuk është dhënë çka gjetën apo më mirë se çka kërkuan në oborrin e gjeneralit, një lagje e tërë në shtetrrethim!?

- 8 maj 2008, arrestohet Gjenerali, tani në pozitën e Kryetarit të Komunës së Skenderajt?!

Ky veprim i administratës ndërkombëtare të UNMIK-ut për këto gati 10 vite në Kosovë, vetëm sa ia ka zënë frymën ligjit dhe progresit tonë. Për më shumë, ky veprim sikur tregon fare hapur e më këmbëngulje një disponim shumë armiqësor kundër pjesëtarëve të radhëve Çlirimtare të Kosovës e në veçanti kundër bartësve të këtyre proceseve. Kjo politikë diskriminuese, vetëm sa thellon hendekun politik të veprimit mes kësaj administrate dhe popullit tonë liridashës. Pse hapa të tillë nuk u bënë ndaj kriminelëve dhe pjesëtarëve të makinës vrastare serbe që në Kosovë me vite bënë me mijëra e mijëra vdekje, krime dhe gjendocid mbi shqiptarët. Jo ata u lanë të lirë në Kosovë madje edhe të ruajnë organizimin e tyre politik në veri të Kosovës. Ndryshe si mund të shpjegohet fakti ose pse deri më sot nuk u arrestuan:

- Milan Ivanoviq i cili me bombë plagosi mbi 20 paqëruarës Polak?!

- Kush u arrestua për vrasjen e një polici ndërkombëtarë në Albanik (Zubin Potok)?

- Kush u arrestua për vrasjen e policit shqiptarë në Lumbardh? Fshat ky afër Milloshevës, shih më këtë rast serbi vrasës i policit shqiptar, kishte shkuar drejt e te Tadiqi në Beograd?

- Kush u arrestua nga serbet për vrasjen e paqeruajtësit ukrainas më 2008?

- Kush u arrestua nga policët e kontingjentit rumun që vranë dy të rinj shqiptarë në pikë të ditës mu në mes të Prishtinës?

- Kush u arrestua për vrasjen e shqiptarit në mënyrën më kriminale (me kmesë) në Gojebulë të Vushtrrisë, vrasësi serb, sot jeton i qetë e pa ferrë në këmbë në Beograd?

- Ku janë të arrestuarit: Një policë vrasës egjiptian që vrau në Pejë Violetë Berbatin?

- Ku po vuan dënimi polici pakistanez i cili kishte abuzuar seksualisht minoret rome?

- Ku po vuan dënimi trashaluci që Kosovës i rroi 4 milion euro e shumë të tjerë?...

Me të drejtë shtrohet pyetja nga ana e qytetarëve tanë, se të gjitha këto veprime të bëjnë të dyshosh: në mos vallë Kosova është bërë arenë interesash e makutërisë politike të ndërkombëtarëve të cilët u zhytën në llumin e interesave të ulëta individuale? Në Kosovë sot apo thënë më së buti, deri dje një pjesë nga stafi i ndërkombëtarëve, duke qenë “beqarë” iu nxorën bojën kabareve dhe punëve të ndyra të imoralitetit. Një pjesë tjetër doli se ishte e lidhur pas ish ministra vendorë të korruptuar, që padyshim të dy palët së bashku mbushën strajcat e tyre të zdralta me lekë si në kopsht të babës. Disa vodhën vetë e ashiqare nga 4 milionë e më shumë euro, disa Galuqë të tjerë u pozicionuan hapur për ndarje të Kosovës në dobi të agresorit serb, disa bënë sehir etj. Pra, shtrohet pyetja: Ku është ky ligji i ndërkombëtarëve në këto raste, ku janë të arrestuarit, apo të dënuarit për këto vepra. A ka burg në Kosovë që duhet t’iu hapen dyert për punëtorët dhe bashkëpunëtorët e UNMIK-ut që meritojnë qelitë e burgut për fajet e tyre që kanë bërë në Kosovë?! UNMIK-u pse nuk vepron njëjtë për të gjithë, apo mos është në pyetje “ ligji dhe Maliqi?!”...

Gjenerali nuk ka kujt t’i shkruaj! Dhe kjo nuk çon shumë peshë për drejtësinë ndërkombëtare, pasi që UNMIK-u, ka gjetur zgjedhjen - për të gjitha këto të pabëra, dënimin dhe haraçin e padrejtësive të tyre po e “lanë me nam” sot Gjenerali dhe Kryetari i një Komune zoti Sami Lushtaku!

21 qershor 2008