FJALIM I LEXUAR NË MBLEDHJEN PARAKUVENDORE TË KUVENDIT MBARËKOMBËTAR

 Nga : Mona AGRIGOROAIEI

 Zonja dhe zotërinj, pjesëmarrës në Mbledhjen Parakuvendore të Kuvendit Mbarëkombëtar!

Kam lindur dhe jam rritur në Rumani. Thirrja e gjakut shqiptar të paraardhësve të mi më obligon t'i rikthehem identitetit tim kombëtar.

Unë jam krenare që jam shqiptare. Jam krenare se i përkas një kombi fisnik, me origjinë të lashtë pelasgjiko-ilire, komb që ka luftuar dhe rezistuar përballë të gjithë stuhive shkatërruese të perandorive apo pushtuesve të tjerë dhe nuk është zhdukur, siç janë fshirë nga faqet e historisë shumë qytetërime në Botë!

Jam krenare që jam shqiptare. Jam krenare se i përkas një kombi luftëtar dhe i papërkulur, kombit të Pirros dhe Teutës, të Skendërbeut, të Ali Pashë Tepelenës, Abdyl Frashërit e Ismail Qemalit, të Shaban Palluzhës e Adem Jasharit, e shumë të tjerëve që armikut nuk iu dorëzuan, pavarësisht nga përmasat e ngjyrat e tij!

Jam krenare dhe e dua Shqipërinë me të gjithë zemrën dhe shpirtin tim, me një zjarr të pashueshëm që më vlon brenda dhe që edhe më obligon të jem e ndërgjegjshme se, si çdo bir apo bije i Nënës Shqipëri, edhe unë kam detyrë që jetën time t'ia përkushtoj tërësisht dhe me të gjitha forcat e mia atdheut tim të dashur, Shqipërisë. Nuk do të jem kurrë e qetë, përderisa të gjithë shqiptarët nuk do të gëzojnë lirinë, në shtetin e pavarur dhe sovran e të ribashkuar, pra të Shqipërisë Natyrale!

Zonja dhe zotërinj!

Shqipëria e Ribashkuar është një domosdoshmëri jetike për ardhmërinë e kombit shqiptar. Një trup pa këmbë e duar nuk mund të lëviz fare drejt zhvillimit dhe përparimit, ai do të mbetet i humbur në pyllin e pafundshëm të historisë.

Sa fuqi politike, ekonomike, diplomatike ka një shtet 28.000 km2, siç është sot Shqipëria Londineze, e Rrudhosur, në krahasim me një shtet 94.000 km2?!

Mendoni cili do të ishte niveli i zhvillimit nëse të gjithë potencialet e rreth 8 milion shqiptarësh në trojet etnike, pa i harruar 7-8 milion shqiptarë në Diasporë, do të ngjitën së bashku! Shqiptarët duhet të kundërshtojnë me të gjitha mjetet demokratike projekteve e planeve pansllaviste dhe terrorizmit e tyre shtetëror, sepse sa kohë do të jemi nën ombrellën e huaj kolonizuese, na kërcënohet qenia e jonë si shqiptarë, një asimilim të ngadaltë, por të sigurt.

Zonja dhe zotërinj!

Politika e diplomacia e mirëfilltë nuk kufizohen në përmasat e ngushta të zbatimit të urdhërave që kanë për qëllim që të shëndrrojnë Shqipërinë administrative në neokoloni të Greqisë, Kosovën në "çiflig" neokolonial të BE-së, Luginën e Vardarit e të Preshevës, Malësinë e Madhe, Çamërinë në prona koloniale të përhershme të sllavo-grekëve. Në mjedisin e sotëm ndërkombëtar, fuqia e një kombi matet me aftësinë e zbatimit të vizionit afatgjatë për realizimin e interesave kombëtare të tij.

Prandaj, edhe zotërinjtë e Tiranës, edhe ata të Prishtinës, të Shkupit, Preshevës e Ulqinit duhet t'i rikthehen kombit dhe interesave të tij, "aspirata shekullore e popullit shqiptar për identitet dhe bashkim kombëtar", siç e ka shkruar me shkronja të arta, sovrani popull në Preambulën e Kushtetutës së Shqipërisë Londineze. Dhe, nëse këtë nuk e bëjnë ata zyrtarisht, duhen gjetur alternativa që burojnë prej vet popullit.

Zonja dhe zotërinj!

Të gjithë izraelitët në Botë, të cilët pa pasur dikur as shtet, as komb, krijuan edhe shtet, edhe komb. Po shqiptarët, që e gëzojnë natyrshëm identitetin e tyre, përse nuk e konsolidojnë një komb-shtet të vetëm?! Çfarë kishin më tepër izraelitët e nuk e kemi ne, shqiptarët për të qenë një komb dinjtoz, në botën e qytetëruar?!

Eqrem Çabej në librin "Shqipëria midis lindjes dhe perëndimit" shpjegon se kombi shqiptar udhëhiqet nga dy forca:

-E para është forca centripidale, që i shpërndan shqiptarët nëpër Botë dhe bën që më shumë të punojnë për të tjerët se sa për veten.

-E dyta është forca centrifugale, që i mbledh shqiptarët së bashku, në momentet vendimtare të historisë dhe që i shpëton prej zhdukjes. Kjo del në sipërfaqe në shumicën e rasteve në mënyrë të pandërgjegjshme, si refleks instinktual mbrojtjeje të kombit shqiptar kundrejt pushtimit dhe kolonizimit të huaj. Masat e gjera popullore, prej natyrës së vet, nuk e durojnë dot robërinë.

Imperativi i kohës është që kjo forcë të manifestohet ndërgjegjshëm, në formë të një Lëvizjeje Antikoloniale, e udhëhequr në mënyrë të koordinuar prej të gjithë kokave atdhetare të ndritura të kombit shqiptar, prej të gjithë shoqatave patriotike dhe organizmave çlirimtare në trojet shqiptare.

Strategjia politike, diplomatike, ekonomike, shoqërore, arsimore, ushtarake gjithëshqiptare për çlirimin e ribashkimin e të çdo pëllëmbe të Shqipërisë Natyrale në një shtet të vetëm kombëtar shqiptar nuk duhet të vonohet më tepër, duhet të krijohet dhe të zbatohet në çdo pikë të saj. Ky mendoj se është misioni më i rëndësishëm i Kuvendit Mbarëkombëtar, Mbledhja Parakuvendore e së cilës po zhvillohet sot.

Rroftë Shqipëria Natyrale!

Rroftë Kombi Shqiptar!

Lavdi dëshmorëve të kombit shqiptar!

Durrës, 14 Qershor 2008