Fjala e Kryetarit të Komunës së Vitisë për Ditën e çlirimit të qytetit

Të nderuar këshilltarë komunalë, të dashura familje të dëshmorëve, të nderuar veteranë dhe invalidë të Luftës së UÇK-së, ushtarë dhe oficerë të TMK-së, përfaqësues të partive dhe shoqatave të komunës sonë, nxënës dhe arsimtarë, përfaqësues të medias, policë dhe oficerë të Policisë së Kosovës, ushtarë dhe oficerë të KFOR-it, përfaqësues të OSBE-së, mysafirë dhe ju qytetarë të nderuar,

Kam kënaqësinë dhe nderin e veçantë që sot, katër muaj pas shpalljes së pavarësimit të Kosovës edhe de jure nga Serbia, të festoj bashkë me Ju 14 Qershorin - Ditën e Çlirimit të qytetit tonë. Rruga deri te kjo Ditë ishte e gjatë, e mundimshme dhe e përgjakshme. Populli i komunës sonë nuk mund të kishte fat tjetër nga ai i pjesës së pushtuar të popullit shqiptar. Ndjekjet, burgosjet, torturat, dhuna dhe represioni për shpërngulje të shqiptarëve ishin ngritur në sistem edhe ndaj popullit të komunës sonë. Mirëpo, represioni dhe terrori i organizuar shtetëror nuk ia doli ta thyej dhe mposhtë popullin shqiptar. Etjen e popullit tonë për LIRI nuk mund ta shuante pushtuesi dhe egërsia e tij. Përpjekjet për të drejta dhe liri kombëtare, politike e demokratike nuk pushuan për asnjë çast. Mohimi i të drejtës për përdorimin e lirë të Flamurit shqiptar dhe mohimi i të drejtës për jetë të lirë dhe të pavarur çoi në shpërthimin e demonstratave mbarëpopullore të vitit 1968, në ato të vitit 1981, 1989, 1990 dhe në demonstratat e vitit 1997. Copëtimi i tokave të pushtuara shqiptare nga Jugosllavia e Titos midis republikave sllave nuk u pranua dhe nuk u njoh asnjëherë nga populli shqiptar. Në mbështetje dhe përkrahje të vazhdueshme të kërkesave dhe përpjekjeve të pjesës së pushtuar ishte shteti shqiptar.

Të dashur vëllezër dhe motra,

Përpjekjet, angazhimi dhe sakrificat e vazhdueshme për liri kulmuan me krijimin e famëmadhës, Ushtrisë Çlirimitare të Kosovës, e cila fitoi përkrahjen e mbarë kombit shqiptar dhe të mbarë botës demokratike. Lufta Antipushtuese Çlirimtare e popullit tonë fitoi edhe përkrahjen e Aleancës më të fuqishme ushtarake në botë, NATO-s. Sot, në Ditën e çlirimit të qytetit tonë, në emër të institucioneve komunale dhe në emër të popullit të Vitisë falënderoj posaçërisht popullin dhe qeverinë amerikane për miqësinë dhe përkrahjen e vendosur që i dha dhe po i jep Kosovës dhe popullit shqiptar përgjithësisht. Kombi ynë do t’u jetë për jetë mirënjohës Shteteve të Bashkuara të Amerikës dhe aleatëve të saj.

Bashkëqytetarë të dashur,

Në këtë Ditë të shënuar për qytetin dhe komunën tonë përulemi me nderim të thellë para dëshmorëve të kombit dhe para të gjithë atyre që u përpoqën dhe luftuan për çlirimin e tokave të pushtuara shqiptare. Respekti dhe kujtimi për dëshmorët do të rroj sa vetë populli shqiptar. Por, ne të gjallët nuk e kemi borgj vetëm respektin dhe kujtimin për dëshmorët. Ata që ranë për lirinë e kësaj toke, dëshmorët e kombit, nuk do të jenë të qetë deri sa të realizohet ideali dhe amaneti i tyre për çlirimin dhe bashkimin e tokave tona. Ndërhyrjet e vazhdueshme, të tërthorta e të drejtpërdrejta, të Serbisë në Kosovë dhe tendenca e saj për ricopëtimin edhe të kësaj Kosove që ka mbet përbëjnë kërcënim real jo vetëm për sigurinë e Kosovës, por edhe për sigurinë dhe stabilitetin e mbarë rajonit e më gjerë. Tendencat e Serbisë për ta penguar, kufizuar dhe copëtuar lirinë dhe pavarësinë e Kosovës kanë gjetur dhe po gjejnë përkrahje, përveç te Rusia, edhe te disa qeveri dhe qarqe tjera në botë. Beogradi në vend se të jap llogari për gjenocidin dhe holokaustin e kryer ndaj popullit shqiptar dhe në vend se të mendoj dhe përgatitet për kthimin e tokave të pushtuara shqiptare po përpiqet të shantazhoj dhe mundësisht ta ndaj territorin e Kosovës. Prania e mëtejme e UNMIK-ut në Kosovë dhe e Rezolutës 1244 është një problem dhe pengesë tjetër për lirinë dhe pavarësinë e Kosovës. Shteti i pavarur dhe Sovran i Kosovës dhe rezoluta 1244 nuk mund të bashkëjetojnë. Ashtu siç nuk mund të bashkëjetoj ky shtet i Kosovës me praninë dhe ndërhyrjet e qeverisë së Serbisë. Përpjekjet për t’i funksionalizuar katër qeveri paralele në territorin e vogël të Kosovës do të rezultojnë me probleme të mëdha për zhvillimin normal të vendit dhe për sigurinë. Prandaj, krahas festimit të Ditës ose ditëve të çlirimit të qyteteve tona dhe të Kosovës duhet të jemi gjithmonë të përgatitur për më shumë punë dhe angazhim për zhvillimin e Kosovës dhe për ruajtjen dhe mbrojtjen e lirisë dhe të tërësisë së saj.

Urime 14 Qershorin-Ditën e Çlirimit të qytetit tonë!

Lavdi Dëshmorëve të Kombit!

Rroftë populli shqiptar!

Ju falemnderit!