"Fajin" e ka populli, politika lugë e larë

Shkruan : Dr.Hasan Luçi

"Fajin e ka Shqipëria e shqiptarët" është një avaz i vjetër nëpër shekuj i paguar me flori nga fqinjët shovenë dhe fuqitë e mëdha koloniale e pushtuese të kohëve. Ende sot shpenzohet, shumë prej tyre për t'ia mbushur mendjen top opinionit publik botëror se shqiptarët qenkan një racë pa ligje njerëzore e shoqërore, ku kreun e shpifësve e zënë serbët e grekët, por edhe kasnecët e ithtarët e tyre brenda e jashtë vendit, që po i fryjnë erërave të çmendura si sirenat mitike.

Të parët që i fryjën erërave barbare, qenë helenët e romakët që njeri pas tjetrit vërshuan si pushtues, njeri pas tjetrit në hapësirat e trojeve pellazgo-ilire-shqiptare duke mohuar e shkatërruar visaret e monumentet e kulturës sonë autoktone parësore në trojet e veta, duke ngritur kurthet e muret e mbulimit, mashtrimit e tjetërsimit të gjurmëve të qytetërimit të gjuhës sonë amtare që u dha sisë gjuhëve europiane dhe më gjerë. Këtu kaluan edhe barbarët që vijuan rrënimin e veprave tona kulturore, veç atyre të parëve duke i kthyer në gërmadha. Këtë bënë edhe vërshimet e sllaveve të jugut si të tjerët më parë që na rrudhën shumë trojet tona autoktone e historike natyrore deri këtu ku mbijetojmë sot, duke ngritur mite të përbindshme dhe platforma politiko-ushtarake, që ende sot bota e ashtuquajtur e qytetëruar i gëlltit si meze nga miqtë e tyre fqinjët tanë antishqiptarë smirëzinj të pandreqshëm brez pas brezi, në shkollat fetaro-politiko-ushtarake me famë të zezë në Ballkan, Europë dhe në botë duke mbivlerësuar dhe nderuar pa të drejtë kulturën greko-romake, që u zhvillua mbi atë pellazgo-ilire, që tekstet e sotme historike i quajnë mite të shekujve të errët, siç i quajtën qysh herët mashtruesit heleno-romakë. Pasi na pushtuan osmanët, po këta fqinjë ziliqarë, smirëzinj e armiq, që u shërbyen me zell e përulje osmanëve, na quajtën ne shqiptarëve dhe turq të mërguar në trojet e tyre, ku nuk janë rrënjës por janë ardhacakë pushtues në shtëpinë tonë etnike në shekuj siç na njeh kjo botë e qytetëruar, siç kanë dëshmuar edhe historianët e gjeografët e tjerë njerëz të ditur objektivë grekë dhe romakë etj rreth kontinentit tonë.

Grekët dhe sllavët e jugut etj. bashkëpunuan ngushtë me pushtuesit osmanë sidomos përmes fesë për ta ndaluar mësimin e gjuhës shqipe që në fakt ia arritën duke hapur shkollat osmane, greke etj., dhe përndoqën atdhetarët që përhapnin shkronjat shqip dhe fetarët që përdornin gjuhën shqipe ne kasha e xhami si dhe more masa shtrënguese për t'i dëbuar shqiptarët nga trojet e veta etnike, duke i shkëmbyer edhe me pazaret mes tyre dhe për të bërë pastrimin etnik ermes luftërave ballkanike e botërore, genocideve etj., deri në vitin l999 në Kosovë si një përpjekje e hapët para syve të botës. Ende sot fqinjët dhe miqtë e tyre tanë nuk rreshtin së përhapuri mitet e tyre antishqiptare,bëjnë sikur nuk e din ë ç'janë pellazgët,ilirët e shqiptarët, na quajnë si etni më vete si toskë, gegë, kosovarë etj., etj., na quajnë se kemi mërguar këtu ku jemi si turq etj., dhe bëjnë sikur se dine se ne jemi shumicë në trojet tona ku kryesisht grekët e sllavët erdhën si pushtues apo si bujq apo si kolonizues mbi bazat e platformave antishqiptare te njohura. Këta fqinjë, përfshi edhe historianë mashtrues nuk i përmendin perandorët, papët, kryeministrat, filozofët, arkitektët, gjeneralët, shkrimtaret, poetët etj. Shqiptarë të shquar që kane drejtuar në çdo fushë në formacionet shtetërore e publike të kohërave nëpër shekuj, duke i përvetësuar si prone të tyre në Greqi, Romë, Bizant, Iliri e Arbëri, Turqi, etj., në tre kontinentet. Harrojnë qëllimisht të thonë të vërtetën se shqiptarët luftuan dhe siguruan lirinë e pavarësinë në Greqi, bashkimin e Italisë dhe në vendet e tjera ballkanase.

Këto fakte historike nuk përmenden në historitë e këtyre vendeve, veç ndonjë dashamirësi të shqiptarëve apo me origjinë shqiptare. Dihet se nga armiqësia nuk pritet miqësi e bamirësi, tolerancë e objektivitet shkencor,por veç ligësi, smirë e racizëm hapur apo fshehtazi, por që s'mbulohet dot gjatë. Por çfarë t'u bëjmë zengjinëve tanë demokratë zero karatë që në gjurmët e bashibozukëve e mercenarëve bashkëpunëtorë të fashizmit apo kateve agjenturore të huaja në trojet shqiptare në shërbime tradhtare, kur një pjesë e tyre u kthyen gjallë në atdhe si çlirimtarë demokratë të përvëluar pasi shpëtuan nga lufta dhe arratia për të përmbysur komunizmin pa asnjë meritë të vetën dhe ia hedhin sërish fajin shqiptarëve atdhetarë që kurorëzuan LANC-in, që çelikosi lirinë e pavarësinë e Shqipërisë me pjesëmarrjen ne luftën antifashiste botërore, por këta sharlatanë politikanë gjoja feudofisnikë të kulluar, s'kanë turp të pohojnë me gojë e me shkrime paçavure se nuk duhej luftuar as Musolini as Hitleri dhe kuislingët e tyre kudo, se gjoja fashizmi ishte kalimtar në Shqipërinë ariane dhe sot do të ishim si bota tjetër demokrate, duke u munduar kot të tjetërsojnë rrugën e historisë së kaluar me sofizmat e tyre dale boje dhe sidomos antishkencore edhe për ish aleatët e tyre gjatë luftës së dytë botërore dhe pas saj deri në vitet '90. Por këta ithtarë demokratë të një mijë e një hileve thonë se pas çlirimit u shqelmua demokracia perëndimore, kur ajo vet, nuk respektoi vullnetin e popullit tone për vetëvendosje në vendin e vet dhe demokracia perëndimore komplotoi qysh pa mbaruar lufta çlirimtare dhe përligji përpjekjet e ethshme për përmbysjen e pushtetit popullor në Shqipëri e gjetkë siç dëshmojnë arkivat tona dhe të botës. Siç dihet Toni Bler, ish kryeministri anglez dhe miku i shqiptarëve për Kosovën deklaroi botërisht duke kërkuar tërthorazi falje për tentativat e ethshme të 'botës së lire' për të përmbysur regjimin popullor në Shqipëri.

Po këta demokratë akuzojnë për tradhti bashkëpunimin internacionalist të Shqipërisë së Re popullore me vendet aleate antifashiste në kuadrin e luftës së përbashkët dhe përparimtare të kohës dhe Shqipëria eci shpejt para me ndihmën e tyre pavarësisht mangësive e pengesave gjatë asaj rruge të vështirë për të gjithë dhe me ballafaqimet e luftës së ftohtë tejet të ashpër kundër shqiptarëve në tërësi. Po këta demokratë safi e qortojnë rëndë qeverisjen socialiste shqiptare pse u prish me Titon e Hrushovin e kompani deri me Kinën duke mbrojtur pikërisht interesat e kombit tone faqe botës mbarë duke i ngritur lart dinjitetin Shqipërisë Socialiste në arenën ndërkombëtare kur ish miqtë u sollën si kolonizatorë të vjetër apo të rinj siç po luhet edhe sot nga disa fuqi me kombin shqiptar dhe demokratët modernë kanë rënë në gjunjë para tyre dhe bashkëpunojnë në aferat koruptive brenda e jashtë vendit tashmë l8 vjet duke e çuar vendin në tragjeditë e komeditë që i përjetojmë çdo ditë. Urdhëroni e bëni pak krahasimet se jini bashkëkohës të dy sistemeve ekonomike.

Demokratët e orëve të para të viteve 1990-2008 çirren ende, me sharjet më banale, se këta e paskan përmbysur komunizmin në Shqipëri, kur këtu ish-socializëm, dhe kur populli shqiptar vlerësoi se qe vet gati për ndryshimet demokrate në përputhje me kohën e rrethanat botërore, por mos harrojmë aspak se ky popull nuk është kaq i lumtur sa siç i bëri llogarit më pare në fillesat demokrate dhe kjo duket tashmë sheshit me rrjedhojat demokrate kaotike dhe te pafunda me krizat e çdo lloji dhe me fenomenet negative në çdo drejtim brenda e jashtë vendit. Jo vetëm kaq por këta demokratë nuk ndoqën shembujt e vendeve para tyre, por hapen portat me strategjitë zero ekonomike dhe duke dëbuar popullin në migrim, pa kthim nga sytë këmbët dhe vetë përlanë pasuritë e tundshme e të patundshme duke u bërë milionerë e miliarderë në çast dhe ngritën partitë qeverisëse pa anëtarë partie dhe që bëjnë sipas kokës së tyre me ca kaso ligje të bëra sipas interesave të ekonomisë informale dhe personale klanore.

Qysh në fillim të demokracisë këta të zgjuarit e botës dënuan fitoret e LANC-it dhe arritjet e popullit shqiptar 1945-1990 në çdo fushë të jetës së vendit dhe në mjedisin ndërkombëtar me strategjinë e yshtur në veshët e tyre puthadorë të atyre ustallarëve të vjetër e të rinj që shqiptarët i kanë hale në sy dhe i duan vetëm për t'u mbushur ujë dhe për t'u bërë fresk sa here që u teket, se shteti socialist ligjor shqiptar e lulëzoi vendin me djersën e popullit të vet kryesisht e jo me atë të huaj si me planin Marshall, këta demokrat të krisur i kthyen në gërmadha fabrikat dhe uzinat, kombinatet e hidrocentralet, kooperativat e fermat, ujësjellësit e kanalet e kullimit të tokave prodhuese, prenë pemëtarinë kudo, vodhën depot plot të rezervave shtetërore për rastet e nevojave urgjente, vodhën depozitat bankare dhe thesarin e floririt etj., pa ua bërë syri tërr se duhej krijuar doemos kapitalistët tanë të çdo kallëpi. Këta hodhën parullën mashtruese se Amerika do t'ua ribënte gjithçka të florinjta. Për popullin kujtohen vetëm në fushatat zgjedhore për t'i vjedhur votën me çdo mashtrim dhe demagogji trashanike. Dhe këto strategji primitive s'kanë të sosur edhe sot e kësaj dite,duke varfëruar popullin, duke sulmuar kushtetutën e bërë si top futbolli, duke u ngrënë si qentë në kocka për kolltukë e trafiqe duke kaluar nga Gërdeci në Gërdec dhe te paktet e kopsitura PD-PS me liliputët në koalicione i thënçin, Ndërkohë shqiptarë e gjorë tashmë l8 vjet po kacavaren gomoneve, maleve e përrenjve si klandestine biblike dhe dyerve të ambasadave të huaja duke paguar shuma marramendëse dhe duke u trajtuar si skllevër e mall pa zot. Kështu floriri e djersa e shqiptarëve shkon në xhepat e miqve fqinjë se këtu s'prodhohet asgjë për të ngrënë, veçse sherre,grindje e mllefe dhe korrupsion e trafiqe, gjithkush pasha në pritën e çifligun e vet klanor e partiak.

Pra ky është regjimi i lumtur dhe shembullor demokrat që na e lavdërojnë edhe ca ndërkombëtarë trutharë që majmen nga korrupsioni vendës e i huaj siç po tregon trafiku i karburanteve Millosheviçit, trafiqet e armëve, piramidat etj. Mërgimi për çdo popull është plagë e pashërueshme, por prijësit tanë e mburrin në botën e sotme, megjithse po bëhet problem tej shqetësues dhe bota po ecën drejt përkeqësimit ekonomik, politik, ushtarak, kulturor, me sëmundje të pashërueshme, me kriza në rritje vijuese, me luftëra lokale që mbarsin luftëra të pashmangshme në t'ardhmen, qofsha unë i gabua,se fitilat janë gati për t'u ndezur, pasi kompromiset nuk po pine më ujë as në KS të OKB-së, as në NATO, as mes fuqive të mëdha që luajnë me njëra tjetrën si macja me miun para botës në institucionet gjoja demokrate. Në vend që këta demokrat, që mbetën dakord për kalimin e pushtetit nga dora e djathtë tek e majta me zor dhe ndërsjelltas me hile, nuk bëjnë asnjë reagim për t'iu përgjigjur poshtërimeve të ndryshme të shqiptarëve kudo brenda e jashtë vendit pasi e kanë mendjen tek mbushja e xhepave mafiozë, teknikë që e përvetësuan mire këto 18 vjet, duke mos treguar asnjë shenjë dinjiteti kombëtar, pa le sovraniteti, asnjë reciproritet diplomatik e njerëzor në marrëdhëniet me fqinjët dhe shtetet në bashkëpunim, veçse servilizëm e gjunjëzim mafioz. Këta mbledhin vetëm lëvdata bajate për të mbuluar gjykimet e drejta kundër qeverisjes sonë të keqe nga institucione ndërkombëtare apo BE. Qeverisjet tona nuk pyesin për standardet që u kërkohen drejt integrimit euroatlantik, duke i kaluar me ca reforma surrogate, me demagogji dhe të shara e të qeshura histerike ndaj klane e partive të ndërsjella po në qeverisjen mafioze 18 vjeçare.

Rrjedhimisht populli braktisi vendin, të mbeturit po varfërohen skajshëm, janë të përçarë sipas partive pas të cilave shkojnë qorrazi si puna e dhelprës me rrush në pjergull, janë të përgjumur dhe nuk guxojnë të protestojnë se u presin edhe ndonjë lëmoshë që u jepet apo nuk u legalizojnë tokat e vjedhura me pushtim antiligjor me bekimin demokrat, apo banesat e ngritura në trojet e pronarëve ligjorë, apo ende livadhisin me lloj lloj mashtrimesh e trafiqesh, që kjo demokraci i lejon e i nxit që të punojë pa u shqetësuar dhe lufta kundër korrupsionit po quhet arrestimi i peshqve të vegjël, të cilët lirohen pasi vilen mire xhepat e tyre ose lirohen për mangësi provash apo me gjykim të shkurtuar apo të ikur në drejtim të paditur dhe bëjnë qejf me parat e grabitura apo të trafiqeve në vende ku strehohen pasi depozitojnë parat e marrin zotim se s'do bëjnë krime. Shkurt, fajtorë mbeten sërish shqiptarët edhe për gjëra që si kanë kryer, por kur ka zë nuk është pa gjë, thotë populli se vërtet fajin e ka ky popull që ende nuk ngre zërin demokrat e liridashës të protestave ligjore e zakonore të traditave fisnike mbarëshqiptare dhe nuk merr masa për rivendosjen e shtetit ligjor të uzurpuar nga politika klanore primitive. Përçarja e thellë e shqiptarëve kudo në trojet tona në dhjetëra parti dhe rendjet pas miqve të rremë dhe pasurimit amoral e qejfeve poshtëruese në kundërshtim me traditat tona shekullore dhe shpërfytyrimi i skajshëm i 18 viteve demokrate me të drejtë na fajësojnë rëndë para botës, por qeverisjet tona turpin e hanë me bukë. Edhe mbledhja e punimet e parlamentit këto ditë, tregojnë klimën dhe qeverisjen që meritojmë...

(Gazeta Ndryshe)