TË HIDHET POSHTË "PAKETA E AHTISARIT" PLANI FAMËKEQ QË PO E RICOPËTON KOSOVËN!

Parashikimi i Lëvizjes Vetëvendosje, çdo ditë që po kalon po del më i saktë:

“Decentralizimi do ta ricopëtoj Kosovën”!

“Negociatat, do ta bllokojnë Kosovën nën pavarësi të plotë”!

Kështu, paralajmëronte, kjo flakadane e kombit shqiptar!

Shkruan: Fadil SHYTI

Siç u bë e njohur mbrëmë në lajmet e RTK-së, kjo zëdhënëse e denjë e vendimeve kundërhistorike që në këto vite të turbullta po i marrin herë nga OKB-ja, herë GK, herë Rusia e herë dreqi e i biri, vendime këto që ngadalë, por sigurt po e rikthejnë Kosovën shqiptare dhe vise të tjera shqiptare në darët e robërisë së përgjakur të shteteve okupatore sllave: Serbisë, Maqedonisë, Malit të Zi dhe Greqisë.

Vendimi i Ban Ki Mun-it, për njohjen legjitime nga qarqe të diplomacisë ndërkombëtare; formimin e komunave serbe në Kosovë, është edhe një goditje e fortë, thikë prapa shpine për kombin shqiptar! Kjo është dhe një hap më tej drejt lejimit të hapjes së "kutisë së Pandorës", e cila shqiptarët o do t´i detyrojë të ngriten sërish në vorbullat e stuhishme të mbrojtjes së territoreve të veta si dikur në kohën e lavdishme të Lidhjes Shqiptare të Prizrenit (1878), o do t´i detyrojë të pajtohen me turpin duke i njohur këto vendime si të arsyeshme "si rrjedhime të natyrshme" të proceseve "demokratike", e slogane të tjera bajate që tani më as qentë nuk ua hanë këto "trohane" të ftohura e të përziera me kripë gënjeshtrash të politikanëve "kosovarë"!

Sot, qe takimi i burrave euro-atlantik, në Slloveni; atje vetëm u dhanë premtime se do t´i ndihmohet Kosovës të zhvillohet ekonomikisht dhe të integrohet bashkë me Serbinë, Malin e Zi, Kroacinë në Evropë; por aty nuk u tha më kryesorja që: “Kosova të shpëtojë nga ricopëtimi i territorit të saj që po i kanoset; aty nuk u tha që do të konsiderohen ilegjitime 17 komunat serbe, aty nuk u tha që serbët që jetojnë në ato komuna, duhet ta njohin shtetin e Kosovës, aty nuk u tha as që Serbia për të hyrë në Evropë - duhet doemos ta njeh edhe pavarësinë e Kosovës, madje kjo nuk u theksua as për Malin e Zi, as për Maqedoninë dhe Greqinë, e cila prej kohësh i ka thyer këto “barriera”, pra është anëtare e plotë e shteteve sovrane në Evropë, ndërsa, nuk i plotëson as për së afërmi kushtet në raport si i trajton shqiptarët e Çamërisë!

Përkundër faktit që këta puthadorë të mjerë politikë prej kohësh i kanë devijuar rrugët, të cilat hapnin shtigjet drejt bërjes së Shqipërisë Natyrale, duke kalëruar si djajtë nëpër natën e historisë sonë të përflakur e të përgjakur; (që nga Rambuja e deri në Vjenë) me kompromiset e tyre të zeza në dëm të kombit; punët i sollën në zgrips të një gjendje tepër të rëndë sa të rrezikohet sërish Kosova me ndarje të thikave "paqësore" të Evropës Plakë; sipas vendimeve të "decentralizimit" dhe të krijimit të komunave të reja "serbe, që dikur as figuronin si katunde të mëdha... Për t´dalë ballë këtij rrebeshi, i cili e ka hapë kanalin për gllabërimin e trojeve tona nga shtetet okupatore; klasa politike e Kosovës; duhet doemos të këndellet nga goditjet që i ka marrë gjatë këtyre viteve të "tranzicionit" apo më saktë gjatë goditjes së reaksionit kombëtar dhe ndërkombëtar! Po, si mund ta merr veten do të shtrohej pyetja? Kjo klasë politike e dështuar fund e krye përballë faktorëve përparimtarë të brendshëm dhe të jashtëm duhet të bëjë dy gjëra, të cilat ndofta do ta shpëtonin nga turpet dhe nga përgjegjësia historike që ka përballë kombit shqiptar!

1. Kjo klasë politike duhet ta flakë nga realizimi praktik (ani se e ka pranuar teorikisht) me një këmbëngulje të vendosur për jetë a vdekje; planin famëkeq, i ashtuquajtur "Paketa" e Ahtisarit!

2. Ose, nëse nuk ka kurajo ta bëjë këtë hap të madh historik, le të merr kurajën e madhe; (ndonëse e dhimbshme për të), por e këndshme për fatet kombëtare; le të jep dorëheqje të parevokueshme - duke hapë dritën e gjelbër për zgjedhje të parakohshme në Kosovë.

Duke bërë këtë do t´i thuhej zëshëm diplomacisë ndërkombëtare: ne luftuam dhe pas luftës çlirimtare (të cilën ju e quani konflikt ndëretnik!!!) me të gjitha format paqësore u përpoqëm të mbjellim liri, kurse ju sërish në trojet tona; na servuat robëri! Tani, u mbushë kupa, më tej ne nuk mund të përmbahemi, nuk mund të sundojmë si pashallarë të mesjetës së përgjakur! Nga kjo vendosmëri e politikës shqiptare në Kosovë, me siguri do të marrin leksione "nxënësit" e mësimeve të demokracisë në botë.

Në të kundërtën këta politikanë me apo pa vetëdije po e fusin më tej popullin shqiptar në rrugë prapakthehu apo: do ta detyrojnë të zgjohen nga letargjia e mashtrimit të fitores së "pavarësisë" dhe të ecën përpara drejt hapave të mëtejshëm për ta bërë Kosovën, vërtetë ashtu siç është Shqipëri, e jo të lejojë të bëhet konglomerat komunash shqiptaro-serbe; pra e ricopëtuar për më shumës e në kohët e krajlëve të egër të Serbisë etj…

Pse udhëheqja e Kosovës ka arsye të plotë të veproj me guxim dhe t´i lëvizë gjërat për së mbari: Sepse, diplomacia ndërkombëtare pandalshëm po e injoron këtë dhe po e tradhton, duke marrë qëndrime, të cilat edhe vet i ka aprovuar! Kujtojmë këtu që të paktën siç thoshin “politikanët tanë: atyre u është premtuar që pas tri vjetësh së vendosjes së UNMIK-ut në Kosovë, do t´u lejohet REFERENDUMI , që populli i Kosovës do të vendoste vet për ardhmërinë e tij! Por, kjo nuk ngjau kurrë, përkundrazi Serbia u shpërblye me Korniza dhe standarde në dëm të Kosovës! Tani, nga diplomacia ndërkombëtare po shkelet edhe ekstremi i keq, toleranca më absurde, siç është Paketa e Ahtisarit! Po lejohet të sundojë Serbia në Kosovë, nëpërmes UNMIK-ut, si fuqi kolonialiste që i ka skaduar koha dhe i ka dalë boja si mos më keq!

Po, dyfishohet kolonizimi i Kosovës me EULEX-in, administratë kjo që nuk garanton aspak siguri dhe rend në Kosovë! Rendin dhe sigurinë kombi shqiptar i ka rregulluar prej shekujsh që prej themelimit të shtetit ilir! Udhëheqja e Kosovës i bëri të gjitha ato sakrifica jo në dëm të vet, për vete ajo bëri privilegje të mëdha; por në dëm të interesave gjithëkombëtare ,(sipas iluzioneve apo shpresave të saj) për ta bërë Kosovën të pavarur: e hoqi flamurin kombëtar, e hoqi himnin e këtij flamuri, (e solli një flamur përçarës me ngjyra euro-sllave, duke mos lënë asgjë shqiptare në fushën e tij; e “shpiku” një himn pa tekst- sikur të ishte himn morti!...

I rehabilitoi nga gabimet e pafalshme, kolonët serbë ata që kurrë nuk i njohën institucionet e Kosovës, dhe i shpërbleu ata jo rrallë me kushte maksimale (duke iu ndërtuar banesa, rrugë, e të tjera elemente strukture dhe infrastrukture; për jetesë aq shumë sa as shqiptarët autoktonë nuk i kanë!

E nxori një Kushtetutë, e cila ia ndalon Kosovës ribashkimin me shtetin amë - Shqipërinë! Vallë, po përse nuk e nxorën një nen ata “mendjendritur” që do ta ndalonte edhe bashkimin e serbëve që jetojnë në Kosovë, me shtetin e tyre amë - Serbinë! Populli shqiptar, vërtetë u ndeshë dhe po ndeshet gjatë me armiqtë shekullorë-mizorë; por kam bindjen që: nëse ky popull ka lejuar deri tani t´i shkelen pamëshirë shumë elemente të shenjta kombëtare, ka lejuar që t´i mohohen e t´i përçudnohen shumë vlera kulturore shkencore etj; për këto nuk ka heshtur nga frika; por ka heshtur (ani se jo pazëshëm), por nuk ka reaguar fuqishëm si komb; jo nga frika, por nga mashtrimi i kësaj klase politike nga Prishtina, Tirana, Shkupi e më tej! Them kështu, sepse kombi shqiptar e ka vrarë frikën që nga bërja e tri luftërave çlirimtare! Tani kombi shqiptar duhet ta vret edhe mashtrimin!

Natyrisht, kjo nuk është e lehtë; sepse mashtrimi është i mbështjellë me lëkurën pistë të shpresave, të pritjes sipas motos: "në mos sot, nesër do të bëhet mirë"; e të tjera slogane boshe që mund t´i pjellë politika ditore-mizore!

Duke vrarë mashtrimin kombi shqiptar e vret kolonizimin dhe ricopëtimin!!!

Duke vrarë mashtrimin, kombi shqiptar e vret ndarjen dhe do të arrijë ta kryej amanetin e Lidhjes Shqiptare të Prizrenit, (LSHP), do ta bëjë RIBASHKIMIN!

Suedi, më 10 Qershor 2008