MOJ PARTIA 99, QINDI KURR MOS U BËFTË ...

Shkruan : Ajet Nuro

Sapo dëgjova që në Tiranë u krijua një formacion politik me emrin G99 e para gjë që më vajti në mendje është një këngë kushtuar Tepelenës ku thuhej pikërisht « Tepelena 99, qindi kurr mos u bëftë ». Mos më pyesni nëse kjo ka qenë ndonjë urim, mallkim apo thjesht diçka që rimon. Fakti është se Tepelena u bë njëqind e më shumë, doli nga Kalaja dhe u ngrit në rang qyteti ndonëse vitet e fundit ka firuar por, jo aq sa për tu mbyllur përsëri në kala... Duke lënë anën folklorike të çështjes nuk mund të le mënjanë përshtypjen që të le emri i formacionit politik që ka marr përsipër të quhet G99. Ndonëse me 99 janë të lidhur shprehje si « ai është 99ç apo i të 99ave » kjo nuk ka të bëjë me formacionin në fjalë. Problemi qëndron në ekskluzivitetin që të jep kjo shifre dhe ngurtësimi që ajo i bënë anëtarësimit në këtë formacion. Ndoshta një zgjidhje e shkëlqyer për marketing politik, G99 e ka marr emrin nga një grup intelektualësh të të gjitha fushave që angazhohen në një formacion politik i pagëzuar pikërisht G99 për të shprehur pikërisht numrin e këtyre intelektualëve partiformues.

Gjer këtu asgjë të keqe.

Çfarë ndodh me të njëqindin intelektual. A do të ketë ky qindshi të drejtën morale të jetë i barabart me 99çit ? Ata që janë 99 u ndodhën aty afër ndërsa të tjerët pak më larg. Vetëm të parët do të kenë të drejtën të quhen 99ç. Nëse 99 ka një vlerë sasiore duhet thënë se ka patur formacione të tjera politike që e kanë filluar dhe më mbarë. Një nga këta është përjetësuar edhe në këngë: Me dyqind petita...Por numri i themeluesve nuk është gjithmonë domethënës. Domethënës është numri i pasuesve.

Një parti politike nuk është vetëm marketing

Le ta lemë mënjanë emrin sepse tek e fundit emrin e bënë jeta dhe veprimtaria e përditëshme sidomos për një formacion politik. Arsyeja që më bëri të shkruaj këto rreshta është marrja e një emaili nga ky formacion ndonëse të them të drejtën unë nuk dija tua kisha dhënë emailin tim. Duke e vrarë mendjen se si mund të ketë ndodhur ky aksident e gjeta... dikur kisha regjistruar emailin për të marr informcione nga një OJQ. Që nga ajo ditë është hera e dytë që një parti politike më kontakton... A thua një OJQ ndanë bazën e të dhënave me parti politike ? Pse jo... E pra, sot isha i ftuar të vizitoja faqen internet të G99. Përshtypja e parë ishte se këta të 99s paskan shumë ide që janë dhe ide të miat të shprehura në shkrime të mëparshme. Edhe unë jam shprehur për atë që emigrantët shqiptar duhet të votojnë si qytetar që janë, edhe unë jam shprehur kundër kryetarëve padronë ashtu si dhe shefi i G99 Veliaj. Veç unë nuk jam 99 sepse ndoshta i bie të jem 199, 299 apo... Nejse...

Kush është G99 ?

Nuk mund ta kuptoj sesi një lider ndihet keq kur e pyesin se çfarë krahu politik i përket G99. Në një interivstë të Erion Veliajt, lideri i G99, pyetjes se çfarê krahu i përket G99 i përgjigjet po me pytje duke aluduar se në politikën e sotme nuk ka rëndësi krahu. Dikujt tjetër mund ti falet por Veliajt jo. Ai e di mirë se megjithë ndryshimet e ndodhura në përkatësit politike apo në atë që quhet klivazh e majtë e djathtë, ndarja ende egziston. Pse nuk e deklaron lideri i G99 perkatësinë socioideologjike të G99 ? Dy mund të jenë arsyet. E para, marketingu ose shitja e kësaj partie sa majtas dhe djathtas dhe e dyta mungesa e kurajos për të thënë se kjo parti i përket së majtës. Duke i qëndruar kësaj ideje, lideri nuk e qartëson pozicionin e tij kur pyetet nëse partia e tij është oborri i mbrapëm i partisë socialiste... Ora e së vërtetës nuk do jetë e largët sepse nëse lideri i G99 shprehu opozitën ndaj Berishës, nëse ai nuk është aleat i Ramës ai do bëhet « armiku » numër një i këtij të fundit sepse ai është i pari në list për tu bërë kryeministër si shef i opozitës zyrtare. Do të pranoj njëri apo tjetri ti lëshoj vendin tjetrit ? Në politik duhet pranuar që ka një parim « O me mua o kundër meje (Rama mund t'ja thotë Veliajt) rrugë të mesma nuk ka »... Pra çfarë mund të jetë G99 nëse nuk ka kurajon të pozicionohet në spektrin politik shqiptar. Mbase populizmi është fitimprurës. Gjer në çfarë pike ?

Sidoqoftë, G99 është lindja e një shprese. Askush nuk mund ta mohoj faktin se Shqipëria duhet të bëhet ndryshe. Nëse nga 1990 Shqipëria ka bërë sikur ka ndryshuar, G99 të paktën pretendon ta ndryshoj. Nuk do tia vlente të shkruaja për një formacion politik në Tiranë nëse ky formacion nuk do të tërhiqte vëmendjen e qytetarëve shqiptar. Në Tiranë kam dikë me të cilin diskutoj tek tuk politikë (kur fletë në telefon nga Kanadaja politika ngelet vrima e fundit e kavallit...). Nejse, kur diskutoj me të afërmin tim ai është barometri politik i Tiranës. Nga ai zbulova se ishte kthyer nga një pdist i pakusht në një votues i Ramës. Pse ? Përgjigjen nuk e prisja. Ata (Pdshënimi im) sapo morën pushtetin më larguan nga puna (një institucion i qeverisë) ndonëse unë isha nga ata që nuk e meritoja një gjë të tillë si nga ana profesionale dhe politike. Miku i m ka qenë i persekutuar... Por para ca ditësh më çuditi me një deklaratë tjetër: Unë jam me ata të 99s më tha. Jam me Erion Veliajn, shtoi.

Njeriu im nuk është politikan. Është nga ata që punojnë shumë për të mbajtur familjen. Dhe ai ka bërë një zgjedhje që është e tija. Dhe nëse G99 ka arritur të depërtoj në periferi do të thotë shqiptarët janë gati për ndryshime. G99, pavarësisht kush janë dhe ku shkojnë, e kanë brumin aty. Varet nga ata nëse do të dinë ta gatuajnë. Por veç një gjë, shpresoj dhe uroj që shqiptarët mos të zhgënjehen edhe një herë më shumë.

Nga Mjaft tek G99

Duke i hedhur një sy ekipit të G99 (të paktën sa më lejoi web siti i G99) vura re se një pjesë e mirë e aktivistëve janë ish aktivist të Mjaft. Të them të drejtën shumë herë kisha menduar se një organizëm si Mjaft që i kundërvihet gjithçkaje që nuk shkon në Shqipëri, pse të mos aktivizohet aktivisht në një formacion dhe të realizojnë atë çka u kërkojnë të tjerëve? Dhe ja sot ne kemi një formacion që përveç ish kryetarit të Mjaft ka dhe pjestarë të ish stafit të Mjaft. Ndonëse ky transformim duket i thjesht, i takon stafit të G99 të tregoj se janë të aftë të punojnë në kushte të tjera dhe të dinë të transformojnë simpatinë e mbështetësve të tyre në kapital politik. Bile gjer më sot ata nuk kanë ndonjë meritë tek G99. Meritat e tyre kanë ngelur tek Mjaft. Varet nga ata nëse do të dinë ti transformojnë energjitë e tyre në një produkt të mirë politikë që mund të ndryshoj Shqipërinë. Jemi në pritje...

11 qershor 2008 Montreal, Kanada

Tribuna Shqiptare